2 Sámwel 9 - Bokyi Bible

Otu Dívit ne Mefyíbóshet

¹ Dyicí dyibónge, Otu Dívit o/bí o/fu, onet o/tôong nang obónge ké kyikû-banet-Otu Sôl? Â onet mu kô, me kyi-nyîn n mě ńkyí ndacángê dyityém ne onet ámu, ké bubwô-Jónátan.

² Ba-sét ǎ ba/fu, ḿgbán mú kyikû-banet-Otu Sôl mu kô obónge, mú odabángê Zíba. Ba-sét Zíba ba/fu, oca kyikit-Otu Dívit. Otu Dívit o-bí ǎ o/fu, wo a-bángê e Zíba? Nyǐ o-faa o/fu, nkyi éné, ǎ bonchí.

³ Otu Dívit o-bí ǎ o/fu, onet o/waa nang obónge ké kyikû-Otu Sôl? mú me nda ǎ ekye ofê n-cángê dyityém to ne nyǐ? wǎ eringe n/ryí Osówo ocím n/fu, n-chi i? Zíba o-faa ǎ o/fu, wǎn-Jónátan obónge o/tôong. Nyǐ o-chi i nkwa-onet.

⁴ Otu Dívit o-bí ǎ o/fu, nyǐ mu nyá. Zíba o-faa ǎ o/fu, mu ké kyise-Mákyi mú wǎn-Ámyel, ké Lódéba.

⁵ Otu Dívit o-twóm kâng o/fu, bada-kpî ǎ.

⁶ Nkéré mú Mefyíbóshet mú wǎn-Jónátan, mú wǎn-wǎn-Otu Sôl o/ribi, o/siring kyísí ké bushú-Otu Dívit, o-kye ǎ ofê. Otu Dívit o-kó ǎ o/fu, Mefyíbóshet. Nyǐ o-faa o/fu, me n-chi i ḿgbán eyên, ǎ bonchí.

⁷ Otu Dívit o-faa ǎ o/fu, *dachi a-shî*. Me n/chi n-cángê dyityém ne wo, ké bubwô-bonchí eyên Jónátan. Me n/chi m-bwa esim ne esí emúmú n-kye ǒ, nyí e/já bonchí-bonchí eyên mú odabángê Otu Sôl, ne wo kángkáng nkéré, kûbaryí byiryíng ké ókpákpúrúk mú ejí.

⁸ Mefyíbóshet o-chîsiring kyísí, o-raa o/fu, me n*da/cángê n-shwôm kyikwón-kabyî* ǎ bonchí*. Ebóng kâng ne wo amu a-jang ng ecángê dyityém ńdyín ne me.

⁹ Otu Dívit o-kó kâng Zíba mú ḿgbán-Otu Sôl, o-sét ǎ o/fu, me mu n-kyâ Mefyíbóshet mú wǎn-wǎn-bonchí eyên kángkáng byěm ḿbyí byi/já Otu Sôl ne kyikû-banet emen.

¹⁰ Wo ne bwǎn eyên ne bǎmgbán eyên ba/chi ba-kûchi byifát ké esí ányi ké bubwô ḿbú Otu Sôl mú bonchí eyên ne kyikû-banet emen, ba-kûfuu byiryíng ámbyi ba-kyâ banet-Otu Sôl. Nké Mefyíbóshet oyén o/chi o-kûryí byiryíng ne me kángkáng nkéré. Zíba o/mû ne bwǎn-banyinchéng ashí onyiryiká ne bǎmgbán bujam.

¹¹ Zíba o-faa o/fu, me n-chi i kángkáng byěm ḿbyí a/sét mě, ǎ otu ejí. Mefyíbóshet o-kûryí kâng byiryíng ké ókpákpúrúk mú [otu,] wǎ eringe bwǎn-otu mbe ba-ryí i.

¹² Mefyíbóshet o/mû ne kaǎwán-onyinchéng ńké kadabángê Máka. Kángkáng banet ḿbé mbe ké kyikû-banet ńkyí Zíba ba-firi bǎmgbán-Mefyíbóshet.

¹³ Mefyíbóshet mú byiká byi/mû bii/búnê ǎ byimúmú o-kûkyú kâng ké Jerúsélem, o-ryí i byiryíng kángkáng nkéré ké ókpákpúrúk-otu.