2 Sámwel 8 - Bokyi Bible

Otu Dívit o/kpógê Byití

¹ Ké nkéré ńkyín kii/shwôm, Otu Dívit o/chîkye banet-Fyilíta bunwa, o-kpógê kámbé, o-koo kámbé busa [ké esí ányi.]

² O-kpógê to banet-Mówep. O-chi banet ebe ḿbé o/kám kámbé ké byití ba-rí kyísí sáre, o-kûfîm banet bafee bafee ké burwám-banet bachât nang bará, o-ju. Banet-Mówep ba-firi kâng ké bubwô emen, ba-kû ǎ ekye akpuga-dyishí.

³ Ne o-kpógê to kâng Otu Hadadéze mú wǎn-Réhop, mú otu mú Syírya, nkéré mú Otu Hadadéze o/mû o-kú o-wâa ng o-chîdakoo esí nyí bushûyû ḿbú kace ńké Yuférétyis.

⁴ Otu Dívit o/kám égot-basúja nyí onyinchéng ámu nyíryinyi ne kyicê, ḿbé banyû bubyî-orá, o-kám to égot-basúja emen etánge etánge ké byikit bujam, ḿbé ba/mû abe kyísí. O-tî bujê-bubyî-orá ḿbú budaman etut bajam-bamútu batánge, o-bún ḿbú áku kángkáng acit bu-firi bankwa.

⁵ Nkéré mú banet-Syírya ḿbé oshê mú Damásákus ba/twóm banet-súja ba/fu, baba-chwáp Otu Hadadéze, Otu Dívit o/kye kámbé bunwa o-ju égot-basúja ebe etánge etánge ké byikit bujam esim diǐkpú. [

⁶ O-bi kâng bampyep-byití ányi ké] esí ebe, mbé ba-firi kâng ké bubwô emen, ba-kû ǎ ekye akpuga-dyishí. Óburúkpâbí o/chi Otu Dívit o-kpógê byití ké kángkáng byikit.

⁷ Otu Dívit o/koo édem nyí ba/chi ké gûl nyí banet-ashí-basúja-Otu Hadadéze, o-kúng kányí o-ba-jâ ne nyǐ Jerúsélem.

⁸ O-kúng to bujê-biǐré ḿbyí badakó borôn ké Béta ne Berótya, eshê nyí e/mû ké bubwô ḿbú Otu Hadadéze.

⁹ Otu Tô mú o/fím Hámat o-jwo ba/fu, Otu Dívit oo/kpógê basúja-Otu Hadadéze bamúmú.

¹⁰ O-twóm kâng wǎn emen mú odabángê Jóram, o/fu, oda-ta Otu Dívit kyiraa, o-kó ǎ to agafwó ké okpóge mú o/kpógê Otu Hadadéze, ké nǎ, nyǐ ne Otu Tô ba/mû baa/nwa ne barî kampén chwóó. Jóram o-bâ Otu Dívit ne byěm-eyáré ḿbyí ba/chi ké gûl ne syílyíba ne borôn.

¹¹ Otu Dívit o-kúng kámbyí o-kye o/fu, batî kámbyí wǎ byěm ḿbyí byi/já Óburúkpâbí, cibicibi ne syílyíba ne gûl to ḿbyí o/kúng ké eshê nyí nyǐ oo/kpógê kányí.

¹² Eshê ányi e/mû Édom ne Mówep ne Ámon ne Fyilíta ne Amálek, cibicibi to ne kyicê-byěm ḿbyí o/koo ne Otu Hadadéze.

¹³ Dyizîn-Otu Dívit dyi/bwa dyi-chîrêe oréng dyi-shwôm, nkéré mú o/fím byití o-fyi, ḿbyí o/ju égot-banet-Édom etánge etánge ké byikit onyiryiká ne byichât, ké ndege-esí mú bano. [

¹⁴ O-bi bampyep-byití] ké esí-Édom emúmú, banet ámbe ba-firi ké bubwô emen. Óburúkpâbí o/chi Otu Dívit o-kpógê byití ké kángkáng byikit.

¹⁵ Otu Dívit o/kyú otu mú esí-Ézerel emúmú, o-ri to o/fu, kángkáng nkéré, mbe ba-tún n banet emen ké bukwóp ḿbú bunong ne ḿbú baa*ryí orî acît*.

¹⁶ Jówap mú boné emen o/mû o-bángê e Zerúya nké o/mû onet-dyishí-basúja emen. Johósháfat mú wǎn-Ahílut nké o/mû onet-dyishí-byěm ḿbyí mbe ba-sáng ng ba-tî ng kyísí.

¹⁷ Zádok mú wǎn-Ahítup, ne Ahímélek mú wǎn-Abyǎta nké ba/mû banchi kyifen-Osówo. Seráya nké o/mû nsâng banwet mú esuk.

¹⁸ Benáya mú wǎn-Jehóyáda nké [o/mû onet-dyishí]-basúja ḿbé mbe ba-bám m Otu Dívit. Ne bwǎn-Otu Dívit nké ba/mû banchi kyifen-Osówo.