2 Sámwel 7 - Bokyi Bible

Nátan o/sét Otu Dívit Kyitwóm

¹ Otu Dívit o/mû kanong ké kyibám-butu emen, ne Óburúkpâbí oo/chi ǎ o-fem ké abwô nyí kángkáng banet-bushwôn emen.

² Ne Otu Dívit o-raa kâng ne Nátan mú mkpábé mú odasét byiraa-Osówo o/fu, me mu nyín me ké kyise ńkyí ba/bi ké byichí ḿbyí byinong byinong, nké mkpukpu-byěm-Osówo ba/tî kámú ké mpyep mú ba/bi ké kyídí.

³ Nátan o-faa ǎ o/fu, chi nang ebóng ńkyí nkyi ǒ ké dyityém, ké nǎ, Óburúkpâbí mu ne wo.

⁴ Nké ké buchú ámbu, Óburúkpâbí o/sét Nátan o/fu,

⁵ ca a-da-sét Otu Dívit mú ḿgbán ejí a/fu, *chí nyǐ nké oda mě ebi kiǐtí-kyise-kyifen ejí echi ńkyí ndakyú ké nkyí*.

⁶ Kyi-fím ké nkéré mú me n/nyii banet-Ézerel ké abwô nyí banet-Éjip, tete kyi-ribi kántîk, me n*da/kyú ne ké kiǐtí-kyise-kyifen ejí echi*. Me nn/kyú ké mpyep mú badabi ké byídí, n-cen n n-wáp ng.

⁷ Ké kángkáng bucen ejí ḿbú mu n-cen n ne banet-Ézerel, me n*da/bí ne [onet-dyishí]-Ézerel nang obónge mú n/cá ǎ* n/fu, ebóng ne wo a*da mě ebi kiǐtí-kyise-kyifen ejí echi ńkyí byichí ḿbyí byinong byinong*.

⁸ Ké bubwô ámbu, sét kâng Otu Dívit mú ḿgbán ejí a/fu, me Óburúkpâbí mú o/rêe o-shwôm mu n-sét ng ǎ n/fu, me n/yip ǎ ké kyikit ńkyí o/mû o-bám m etám-ebû ké dyikán, n-chi ǎ o-firi onet-dyishí-banet ejí ḿbé Ézerel.

⁹ Me nn/kyú ne wo ké kángkáng byikit ḿbyí wo aa/ce, ne mm/kpógê kángkáng banet-bushwôn eyên eringe nyí wo amu a-tín n a-câ kashú. Me n/chi ǒ a-kyú kiǐtí-onet wǎ biǐtí-banet ḿbyí! ḿbyí mbyi ké ejíí.

^10-11 Me nn/cá kyikit n-tî banet ejí ḿbé Ézerel, ne nn/tî kámbé ba-kyú ányi, kyikit ńkyí ba/chi ba-kyú baa*cít to kámbé*. Kyi-fím ké nkéré mú mbé ba/nung ké esí ńnyín, bankyê byiraa baa/kye kámbé bunwa, nké ńkyín kii*ba/chi kyi-chîchi*. Me n/ryí ocím n/fu, n-nyii ng ǒ ké kángkáng abwô nyí banet-bushwôn eyên, n-kye ǒ banet ké kyikû eyên.

¹² Â a/kpú ba-ryii ǒ ne banchí eyên ḿbé kpákpá, me n/chi n-chi wǎn eyên o-ryí butu, ne n/chi n-tî butu emen shwaneshwane.

¹³ Nyǐ nké o/chi o-bi kiǐtí-kyise-kyifen ejí echi o-kye mě, ne n/chi n-chi ké ntûntû n/fu, butu bu-man bu-waa ké kyikû emen ne banyá.

¹⁴ Me n/chi n-kyú bonchí emen, ne nyǐ to o/chi o-kyú wǎn ejí. Â nyǐ o/chi kyibî, me n/chi n-kye ǎ busông wǎ eringe bonchí odakye wǎn emen busông.

¹⁵ Nké me mm*ba/chi m-mîng ǎ busa efé* wǎ eringe m/mîng Otu Sôl busa efé* mú n/fîm ǎ eringe wo adafiri otu*.

¹⁶ Wo a/chi a-kyú ne banet ké kyikû eyên kángkáng nkéré, ne n/chi n-chi butu eyên bu-waa ne banyá. Butu eyên boo*ba/chi bu-man ne banyá*.

¹⁷ Nátan o-sét Otu Dívit kángkáng byěm ḿbyí Osówo o/sét ǎ.

Nshwam-Otu Dívit mú Asǎma ekó

¹⁸ Otu Dívit o-dim kâng o-ca ké mpyep mú Óburúkpâbí mu o-kyú u, o-kyú me, o-fé nshwam o/fu, me n*da/kwárê* ǎ Óburúkpâbí mú mu Otu Kyítá*, nang kyikû-banet ejí ba*da/kwárê ké ńkyí wo aa/chi a-kye bě*.

¹⁹ Nké nang ké nkyi éné, kántîk, wo amu a-chi i ochǐng kyi-jê kyi-shwôm, ǎ Óburúkpâbí mú mu Otu Kyítá. Wo aa/ryí ocím kyi-kim ne banet ḿbé ba/fím ké kyikû ejí, ké aje nyí nyi a-bâ ké kashú. Ne [wo aa/mîng onet o-ri ńkyín,] ǎ Óburúkpâbí mú mu Otu Kyítá.

²⁰ Me n-chî ng ǒ esét ebóng. Wo amu a-nyît ng mě me mú ḿgbán eyên.

²¹ Kyi/mû ké ńkyí wo amu a-ryuu ng ne ké okabe eyên to nké a/chi ńkyín. Wo aa/chi kángkáng biǐtí-byěm ḿbyín eringe nyí ada mě etángê chwǒm.

²² Wo a/rêe kanong kanong, ǎ Óburúkpâbí mú mu Otu Kyítá. Onet o*fí nang obónge mú mu wǎ wo*. Be byimu byi-nyît ng kángkáng nkéré byi/fu, wo kǎnchí nké amu Osówo.

²³ Oshê o*fí ké ejíí nang obónge mú mu wǎ Ézerel* nyǐ wo a/nyii kámbé ké búsóng eringe adachi kámbé ba-firi banet ḿbé eyên*. Biǐtí-byěm ne akat-byěm ḿbyí wo a/chi a-kye [kámbé] bii/káng ne dyizîn eyên ké ejíí emúmú. [Wo a/ró] eshê ekíri ne bakye ebe eringe banet ḿbé eyên mbe ba-tín n ba-câ, banet ḿbé wo a/nyii kámbé ké Éjip a/fu, bafiri ḿbé eyên.

²⁴ Wo aa/chi banet-Ézerel ba-firi banet ḿbé eyên ne banyá, ne wo, ǎ Óburúkpâbí, a/firi Osówo mú ebe.

²⁵ Kántîk kâng, ǎ Osówo Óburúkpâbí, kángkáng nkéré, chi ńkyí wo aa/ryí ocím kyi-kim ne me ne kyikû-banet ejí, ne chi to ńkyí a/fu, a/chi i.

²⁶ Dyizîn eyên dyi/chi dyi-rêe, ne kángkáng nkéré to, banet ba/chi ba-kûraa ba/fu, Óburúkpâbí mú o/rêe o-shwôm o-chi i Osówo mú mu o-tún n Ézerel. Ne wo a/chi a-tî butu ejí kángkáng nkéré.

²⁷ Ô Óburúkpâbí mú o/rêe o-shwôm, Osówo mú Ézerel, me mu ne dyityém shwaneshwane ńdyí mu n-fâ nshwam mún n-kyâ ǒ, ké nǎ, wo aa/sét mě me mú mu ḿgbán eyên kángkáng byěm ḿbyín, ne aa/sét mě a/fu, wo a/chi a-chi banet ḿbé ba/fím ké kyikû ejí ba-ryí butu.

²⁸ Kántîk kâng, ǎ Óburúkpâbí mú mu Otu Kyítá, wo a-chi i Osówo. Wo kángkáng nkéré, a-tî ng ocím eyên mú a/ryí, ne wo aa/ryí mě ocím mún, mú mu kiǐtí-ocím eryí.

²⁹ Me mu m-bí ng ǒ n/fu, jware banet ḿbé ba/fím ké kyikû ejí eringe nyí mbé ba/chi ba-nyît kanong ńké eyên. Wo, ǎ Óburúkpâbí mú mu Otu Kyítá nké aa/ryí ocím mún, ne ojware eyên o/chi o-waa ne banet-kyikû ejí ne banyá.