2 Sámwel 5 - Bokyi Bible

Otu Dívit o/firi Otu mú Ézerel ne Júda

¹ Byikû-banet-Ézerel byimúmú byi-dim kâng byi-kâm Otu Dívit ké Héboron, ba-raa ne nyǐ ba/fu, be byi-chi i baróng ḿbé eyên ne enyam-byiko nyí eyên.

² Ké nkéré mú o/shwôm ké esim, nang ké nkéré mú Otu Sôl o/mû o/tôong otu eten, wo a/kpî banet-Ézerel ba-ca byití. Ne Óburúkpâbí o/mû o/ryí ǒ ocím o/fu, wo a/chi a-kyú onet-dyishí-banet emen, a-firi to otu ebe.

³ Banet-ashí-banet-Ézerel kángkáng ba-dim kâng ba-kâm Otu Dívit ké Héboron. Ba-ryí ocím ne barî ba-sem Óburúkpâbí, ba-kúng ǎ butu, o-firi otu-Ézerel.

⁴ Dívit o/mû oo/rí aje bujam esim diǐkpú ńdyí ba/kúng ǎ butu, ne o/kyú otu ké bajam-aje bafee.

⁵ Nyǐ o/kyú otu ké Héboron, o-kûtún Júda, ké aje káchâtkányi ne kyicê, ne o/kyú to ké Jerúsélem, o-kûtún esí-Ézerel emúmú ne Júda, ké aje bujam esim diǐkpú ne achât.

⁶ Nkéré o/baribi mú Otu Dívit ne banet emen ba/dim ba-wâa banet-Jerúsélem bunwa edakye. Banet-Jébus ḿbé ba/mû ba-kyú u ányi ba/mû ba/kabe ba/fu, Otu Dívit oo*ba/chi o-man ekpógê oshê ámu*. Ba-raa kâng ne nyǐ ba/fu, wo aa*ba/chi a-man enung nyín*. Nang bansêe achi ne bankwa ba-man n ǒ eró ba-tî kyíjí.

⁷ Nké Otu Dívit o/koo kyise ebe ńkyí ba/mû ba-bwom m ba-nwa ng byití, ńkyí Záyon, ne ba-kûkó kánkyí Oshê-Otu Dívit. [

⁸ Dyicí ándyi, Otu Dívit o/bí banet emen o/fu, onet mu kô nyín nang obónge mú banet-Jébus mbe ba-sa ng ǎ kafâ eringe odaju kámbé wǎ me dí. Onet ámu oyú kâng o-shwôm ké kafâ-kyikit ńkyí omu odasen ne o-nung ké kafâ-oshê, o-kye bansêe achi ne bankwa ámbe bunwa. Éné nké mbe ba-raa ng ba/fu, bansêe achi ne bankwa baa*ba/chi ba-nung ké kyise ńkyí Óburúkpâbí*.]

⁹ Nkéré mú Otu Dívit oo/koo kyise-mbâm ánkyi, nyǐ o/kyú ké nkyí ne o-fé kánkyí dyizîn, Oshê-Otu Dívit. O-bi oshê o-wáp kánkyí o-fé ké kafâ. O/kpet kámú ebi ké kyikit ńkyí ba/mû ba/wuri ecing ba-fé ányi, ké kyicê ńkyí esû edabyí.

¹⁰ Nyǐ o/mû mu o-shwane e o-câ kashú kángkáng nkéré, ké nǎ, Osówo Óburúkpâbí mú o/rêe o-shwôm o/mû ne nyǐ.

¹¹ Otu Hyíram mú o/fím Táya o-twóm banet-kyitwóm ba-bâ kyikit-Otu Dívit. O-kye ǎ byikim-byichí ḿbyí byinong byinong ne búpyínta ne bankêt aká, o/fu, babi ǎ kyibám-butu.

¹² Ne Otu Dívit o-nyît kâng o/fu, Óburúkpâbí oo/tî ǎ nyǐ wǎ otu mú Ézerel, ne mu o-chi i butu emen bu-kán n bu-câ kashú ké bubwô ḿbú banet emen.

¹³ Nkéré mú Otu Dívit o/dim ké Héboron o-jâ Jerúsélem, nyǐ o/bé banyi bakíri ḿbé bakínkán ne ḿbé bwǎsíng, ne o-fwon bwǎn bakíri ḿbé banyinchéng ne ḿbé banyinyi.

¹⁴ Nyín něen bwǎn ḿbé ba/fwon ba-kye ǎ ké Jerúsélem, Shámwa ne Shóbap ne Nátan ne Sólómon

¹⁵ ne Éba ne Elyíshwa ne Néfek ne Jáfya

¹⁶ ne Elyíshama ne Elyǎda ne Elyífélet.

Otu Dívit o/kpógê Banet-Fyilíta

¹⁷ Banet-Fyilíta ba/jwo ba/fu, baa/kúng Otu Dívit butu ké Ézerel, basúja ebe ba-dim kâng ba-wâa edakám Otu Dívit. Nkéré mú Otu Dívit o/jwo kyi-kim ne nkyí, o/shû o-jâ kyísí ké kyikit-dyirem.

¹⁸ Banet-Fyilíta ba-ba-ribi ké ndege-esí mú Réfyam, ba-koo ba-kyú.

¹⁹ Otu Dívit o-bí Óburúkpâbí o/fu, nkye banet-Fyilíta bunwa dí. Wo a/chi a-chi mě m-kpógê kámbé dí. Óburúkpâbí o-faa o/fu, âa, kye kámbé bunwa. N/chi n-chi ǒ a-kpógê kámbé.

²⁰ Otu Dívit o-dim kâng o-ca ké Bâl-Perázim, o-kpógê banet-Fyilíta ányi. O-raa o/fu, Óburúkpâbí oo/kpû banet-bushwôn ejí ké byiko wǎ kace. Kyi-fím ányi kâng, ba-kú ba-kó ng kyikit ánkyi, Bâl-Perázim.

²¹ Nkéré mú banet-Fyilíta ba/chêe, ba/mîng erím-bakye ebe ányi. Otu Dívit ne basúja emen ba-wuri kányí.

²² Banet-Fyilíta ba-bwa esim ba-jâ ké ndege-esí mú Réfyam, ba-chîkpet ekyú ányi.

²³ Otu Dívit o-chîpem ne Óburúkpâbí. Óburúkpâbí o-faa ǎ o/fu, *dakye kámbé bunwa kyicê ńkyín* nké wáp a-ca, a-kpá byiko ḿbyí adakye kámbé bunwa ké kyicê ńkyí áku, fáráng ne byichí ḿbyí básam.

²⁴ Â a/jwo kyicoge-byití kyíbóng-byichí ámbyi, kye kámbé kâng bunwa, ké nǎ, me n/chi n-kûcen n-câ ǒ ké kashú, eringe nyí ndakpógê basúja-Fyilíta.

²⁵ Otu Dívit o-chi ńkyí Óburúkpâbí o/sét ǎ, ne o/man eró kâng banet-Fyilíta ké oshê mú Géba, tete ba-ribi ké Géze.