2 Sámwel 4 - Bokyi Bible

Ba/ju Otu Eshíbóshet

¹ Nkéré mú wǎn-Otu Sôl mú odabángê Otu Eshíbóshet o/jwo ba/fu, baa/ju Ábina ké Héboron, bushî bu/kám ǎ, ne kángkáng banet-Ézerel bushî bu/róng kámbé to.

² Otu Eshíbóshet o/mû ne banet-ashí-basúja ashí afee ḿbé ba/mû banet-ashí-byikim-basúja ḿbé mbe ba-câ byití. Mbé ba/mû ba-bángê e Bána ne Rékap, ḿbé bonchí ebe o/mû o-bángê e Ryímon, mú o/fím Byírot, ké kyikû-banet ńkyí Běnjámin. Oshê ámu mbe ba-pan n kámú wǎ kyicê-kyikû-banet ńkyí Běnjámin.

³ Banet ḿbé ba/mû ba-kyú u ányi ba/mû baa/chêe ba-jâ Gyítyam, mú mbe ba-kyú u tete kurún.

⁴ Onet okíri mú o/mû o/fím ké kyikû-Otu Sôl, o/mû wǎn-Jónátan mú odabángê Mefyíbóshet, mú o/mû oo/rí aje atánge ńdyí ba/ju Otu Sôl ne Jónátan. Nkéré mú ba/fím oshê-Jézerel ba-ba-sét kyi-kim ne bukyû ebe, onyinyi mú o/mû mu o-kám m ǎ, o/kúng ǎ ba-chêe. Nké nyǐ o/mû mu o-dûu ng kanong kanong mú o/fem ǎ o-róng, o-byíryî, o-firi nkwa.

⁵ Rékap ne Bána ba-dim ba-wâa ké kyise-Otu Eshíbóshet. Ba-ribi áku ányi esû e-kú e-kán n, ńdyí Otu Eshíbóshet o/mû o-kú o-jáng ng. [

⁶ Burê bu/mû bu-kú bu-nwa ng mú onyinyi mú o/mû ké ocím-dyifyi, ńdyí mu o-cage ng esang-byichí, ne o/mû oo/róng to ké mbú erê. Rékap ne Bána ba-nyábê kâng ba-nung ké kyise.]

⁷ Nkéré mú ba/nung ké kyise, ba/shwôm ké nfût mú Otu Eshíbóshet, ké kyikit ńkyí o/mû oo/róng ké burê ḿbú o/róng! ba-ju ǎ. Ba-két ǎ kâng dyishí ba-dim ne ndyí. Ba-cen buchú búchu ké ndege-esí mú Jódan.

⁸ Ba-ba-kye Otu Dívit dyishí ándyi ké Héboron. Ba-sét ǎ ba/fu, nyín něen dyishí-Otu Eshíbóshet mú wǎn-Otu Sôl mú onet-bushwôn eyên, mú o/mû mu o-kan n o/fu, nyǐ o-ju ng ǒ. Kurún, Óburúkpâbí oo/bángê ǒ, ǎ otu eten, a-só Otu Sôl ne banet ḿbé ba/fím ké kyikû emen ewa.

⁹ Otu Dívit o-faa kámbé o/fu, me n/ryí ocím n-sem Óburúkpâbí mú mu okpó, mú oo/nyii mě ké kángkáng afaníkong.

¹⁰ Onet mú o/ba mě esét bukyû-Otu Sôl ké Zíkalak o/mû mu o-kabe ng o/fu, nyǐ o/ba mě esét kyitwóm ńkyí kyinong. N/kám ǎ, n-kye busa n/fu, baju. Ányi eyáré nyí n/kye ǎ ké kyitwóm emen ńkyí kyinong.

¹¹ Kyi/chi kyi-bên kâng kyi-shwôm ne banchi byibî ḿbé ba/ju onet mú o*da/chi chwǒm* mú o/mû mu o-rê ng ké kafâ-kyise ńkyí emen. Me mu m-bâ běn esó ewa kántîk, ké oju mú ben ba/ju ǎ, n-ju běn.

¹² Otu Dívit o-kye busa, basúja emen ba-ju Rékap ne Bána, ba-két kámbé abwô ne byiká, ba-kpong kyíbóng fáráng ne kiǐdé-kace ńkyí nkyi ké Héboron. Ba-yip dyishí-Otu Eshíbóshet ba-ryii ké dyikun ńdyí ba/ryii Ábina, ányi ké Héboron.