2 Sámwel 3 - Bokyi Bible

¹ Byití ḿbyí basúja ḿbé ba/mû ké kyicê ńkyí kyikû-banet ńkyí Otu Sôl ne ḿbé ba/mû ké kyicê ńkyí Otu Dívit byi/rí kanong kanong. Nkéré mú Otu Dívit o-kú o-jê ng ne busa o-câ kashú káshu, banet-bushwôn emen busa bu/kpet eman kámbé bu-câ ocǎng.

Bwǎn-Otu Dívit ḿbé Banyinchéng

² Nyín něen bwǎn-banyinchéng ashí nyâchât ḿbé ba/fwon ba-kye Otu Dívit ké Héboron, kyi-fím ké mú mbwôp kashú kyi-bwa kyísí. Ba/fwon Ámyinon mú boné emen o/mû o-bángê e Ahínom. Nyǐ o/mû o/fím Jézerel.

³ Ba-fwon Kyílap mú boné emen o/mû o-bángê e Abyígal, mú onyǐnkú-Nábal, mú o/mû o/fím Kámel. Ba-fwon Abyísálam mú boné emen o/mû o-bángê e Máka, mú o/mû wǎn-Otu Tamyâ mú o/fím Géshu.

⁴ Ba-ba-fwon Adónyija mú boné emen o/mû o-bángê e Hágit. Ba-ba-fwon Shefátya mú boné emen o/mû o-bángê e Abyítal.

⁵ Ba-ba-fwon to Etéram mú boné emen o/mû o-bángê e Égala. Bwǎn ḿbén bamúmú ba/fwon kámbé ké Héboron.

Ábina o/cibi ne Otu Dívit

⁶ Eringe byití mbyi byi-nwa ng éné byi-câ kashú, ḿbyí basúja ḿbé Otu Dívit ne ḿbé kyikû-banet ńkyí Otu Sôl, Ábina o/waa o-já ng busa o-câ kashú ké basúja ḿbé ba/mû ne Otu Sôl.

⁷ Dyicí dyibónge, Otu Eshíbóshet mú wǎn-Otu Sôl o/bât Ábina kyiraa o/fu, mú mǔ o/rí ne Ryízipa mú onyi-bonchí emen mú wǎsíng, mú wǎn-Áya.

⁸ Ńkyín kyi/chi Ábina kafâ ka-sa ǎ. O-bí Otu Eshíbóshet o/fu, wo a/kabe a/fu, me m-man n ebírî Otu Sôl esim dí. Wo a/kabe ké ntûntû a/fu, me mu m-bwom m banet-Júda ké esim? Kyi-fím ofím ké kiimkpet kyikû, me mu n-kyâ bonchí eyên Otu Sôl ofê, ne bwǎn-bané emen ne bacín emen, ne me nn/nyii ǒ, Otu Dívit o*da ǒ ekpógê ne*. Nké kurún, wo aa/bât mě kyiraa ké dyishí-onyinyi.

^9-10 Óburúkpâbí o/ryí Otu Dívit ocím o/fu, nyǐ o-koo ng butu ne Otu Sôl, ne banet ḿbé ba/fím ké kyikû emen, ne nyǐ o/chi o-chi Otu Dívit o-firi otu mú Ézerel ne Júda, kyi-fím ké bukô-esí bubónge tete kyi-ribi ḿbú áku. Kántîk kâng, kyi/bát Osówo oju mě, â n*da/chi ńkyín kyi-kyú ntûntû*.

¹¹ Otu Eshíbóshet o/mû o-shî ng Ábina kanong kanong, mú o*da/faa nang ojá*.

¹² Ábina o-twóm banet ba-ca kyikit-Otu Dívit. Otu Dívit o/mû [ké Héboron] ké nkéré ámu. O/fu, babí ǎ ba/fu, yeě o/chi o-kyú otu mú esí ńnyín. Byiryí ocím ne barî, ne me n/chi n-chwáp ǒ a-koo Ézerel emúmú e-firi kyicê ńkyí eyên.

¹³ Otu Dívit o-faa o/fu, nkyi kanong. Me n/chi n-ryí ǒ ocím ké chwǒm kyibónge ńkyí adaman a-chi. Wo a-man a-bâ ne Mákel mú wǎn-Otu Sôl a-ba-kye mě, â a/bê mě ebari.

¹⁴ Otu Dívit o-twóm to banet ba-ca kyikit-Otu Eshíbóshet o/fu, basét ǎ ba/fu, bwa esim ne Mákel mú onyi ejí a-kye mě. Me n/kye bonchí emen bajam-batî-banet-Fyilíta batánge ne m-bé ǎ.

¹⁵ Otu Eshíbóshet o-koo ǎ kâng ne Patyél mú wǎn-Láshi, mú o/mû o-kú o-bé ng ǎ.

¹⁶ Patyél o-dim ne Mákel ké kyikû tete ba-ribi oshê mú badakó Bahúrim, o-tii ng o-câ. Nké nkéré mú Ábina o/sét ǎ o/fu, bwa dyijê, mú mǔ o/chi éné.

¹⁷ Ábina o-dim o-kâm banet-ashí-banet-Ézerel, o-raa ne mbé o/fu, kaa/bwon kanong kanong mú ben ba/mû ba-ryuu ng ba/fu, Otu Dívit okyú otu enen.

¹⁸ Kántîk kâng, baa/já bukwóp. Zîim m̂ ba/fu, Óburúkpâbí oo/raa o/fu, me n/chi n-kúng Otu Dívit mú ḿgbán ejí n-nyii banet ejí ḿbé Ézerel ké abwô nyí banet-Fyilíta, ne ké nyí kángkáng banet-bushwôn ebe to ḿbé áku.

¹⁹ Ábina o-raa to ne banet ḿbé ba/fím ké kyikû ńkyí Běnjámin, ne o-dim kâng o-wâa Héboron edasét Otu Dívit ńkyí banet-Běnjámin ne ḿbé Ézerel baa/bángê echi.

²⁰ Nkéré mú Ábina o/ce Héboron kyikit-Otu Dívit ne banet ashí bujam ké kyikû, Otu Dívit o/chi dyijî o-kye kámbé.

²¹ Ábina o-sét Otu Dívit o/fu, me n/chi n-ca n-da-chi banet-Ézerel bamúmú wo a-firi kámbé otu. Mbé ba/chi ba-koo ǒ wǎ otu, ne kyi-fím ányi, wo a/chi a-já ńkyí a/mû amu a-ryuu ng, ne wo a/chi a-firi otu mú esí-Ézerel emúmú. Otu Dívit o-ryí Ábina ocím o/fu, onet oo*ba/chi o-ju mú mǔ* o-fu ǎ o-dim.

Ba/ju Ábina

²² Nkéré mú ńkyí ánkyi kii/shwôm, Jówap ne banet-ashí-basúja-Otu Dívit bakíri ba/fím ba-fyi ké byití ḿbyí ba/mû ba/ce. Mbé ba/fyi ne bujê-byěm ḿbyí ba/wuri. Nké Ábina o/mû o*fí to ányi ké Héboron ne Otu Dívit* ké nǎ, Otu Dívit o/mû oo/sét ǎ o/fu, onet oo*ba/chi o-ju ǎ* ne o-sét ǎ o-dim.

²³ Nkéré mú Jówap ne banet emen ba/ribi, ba/sét ǎ ba/fu, Ábina oo/bê kyikit-Otu Dívit, ne Otu Dívit oo/sét ǎ o-dim ne ocím mú o/ryí ǎ o/fu, onet oo*ba/chi o-ju ǎ*.

²⁴ Jówap o-dim kâng o-kâm Otu Dívit, o-raa ne nyǐ o/fu, ebóng ńkyí wo a/chi éné. Ábina o/bê kyikit eyên, ebóng ne wo a-mîng ǎ o-dim éné.

²⁵ Nyǐ o/bê nyín eringe oda ǒ ebanîm, ne eringe odakyé kyikû o-nyît kángkáng byěm ḿbyí amu a-chi i, ne kángkáng byikit to ḿbyí amu a-câ. Ké ntûntû, wo amu a-nyît ng ńkyí ánkyi.

²⁶ Nkéré mú Jówap o/dim o-mîng Otu Dívit, o/twóm banet o/fu, bada-kpî Ábina. Ba-da-kpî ǎ ké dyibíng-omu ńdyí Síra. Nké Otu Dívit o*da/jwo kyi-kim ne nkyí*.

²⁷ Nkéré mú Ábina o/nung ké Héboron, Jówap o/kpî ǎ ba-jâ ké bukô-dyifyi-oshê wǎ mu o-ryuu ng o-sét ǎ chwǒm ké booju. O-kpet ǎ kashwám ké dyifít. Ne ké bubwô ámbu, nyǐ o/ju Ábina, ké nǎ, mú mǔ o/mû o/ju wǎn-boné emen, Ásahel.

²⁸ Nkéré mú ba/sét Otu Dívit, nyǐ o/raa o/fu, Óburúkpâbí mu o-nyît ng o/fu, me ne bǎmgbán ejí byi*fí ne abwô ké kafâ nang kaǎnyín* ké oju mú ba/ju Ábina*.

²⁹ Kyi/bát busông ḿbú ké dyishí-Ábina bujâ Jówap ké byiko ne kyikû-banet emen. Ké kyitông-banet nang kyirá, kyi/bát onet okyú ké kyikû emen mú odarwôm basa, nang mú odarwôm kyibî-orwôm-enyam-byiko nang mú oo*man echi bǎmkpóngé ḿbé barî-banyinchéng badachi* nang mú bada ǎ eju ké byití, nang mú oo*jang ejá ńkyí odaryí*.

³⁰ Jówap ne wǎn-boné emen Abyísha ba/só Ábina ewa kâng ké oju mú o/ju wǎn-boné ebe Ásahel, ké byití ḿbyí Gyíbwon.

Ba/ryii Ábina

³¹ Otu Dívit o-sét kâng Jówap ne banet emen o/fu, baját byídí ké byiko, ba-bwá byídí-dyikán eta, ba-ta Ábina dyikán. Ne ké nkéré mú ba-kú ba-chi i bukyû, Otu Dívit oyén o/dim o-cen byichí ḿbyí ba/tû Ábina ké kyikû.

³² Ba/ryii Ábina ké Héboron, ne Otu Dívit o/tii kakânkakân ké dyikun, ne éné to nké kángkáng banet ba/tii.

³³ Otu Dívit o/kwán okwan-bafip mún o-fé Ábina. O/fu, ebóng kyi/chi ne Ábina o-kpú bukyû wǎ kaanyam.

³⁴ Ba*da ǎ ebwá abwô* ba*da ǎ ebwá byiká*. Nyǐ o/kpú wǎ onet mú banchi byibî bada ǎ eju. Ne banet ba-chî ǎ ekpet etii.

³⁵ Ké kyirim-dyicí ándyi, banet ba/kan ba/fu, mbé ba-chi i Otu Dívit o-ryí onyin-kyiryíng, nké nyǐ o/ryí ocím o-sem Osówo o/fu, kyi/bát Osówo oju mě, â n/ryí nang kaǎchwóm ne buchú bu-kûjí.

³⁶ Banet ba-ri ńkyí nyǐ o/fu éné, dyityém dyi-nyîn kámbé. Ké ntûntû, kángkáng byěm ḿbyí Otu Dívit o/chi byi/nyîn banet dyityém.

³⁷ Kángkáng banet-Otu Dívit ne kángkáng banet ḿbé ké Ézerel ba/nyît ba/fu, Otu Dívit o*da/fé abwô ké oju mú ba/ju Ábina*.

³⁸ Otu Dívit o-raa ne banet-ashí-basúja emen o/fu, ben ba*fí ba-nyît ng ba/fu, dyicí ńdyí kurún ńdyín, kiǐtí-onet-dyishí ké Ézerel oo/kpú dí*.

³⁹ Nang ké me mu otu mú Osówo o/cá mě, kurún, busa bu*fí mě*. Bwǎn-Zerúya ḿbén ba-chi i byiraa ḿbyí byida mě eman busa. Kyi/bát Óburúkpâbí okye banchi byibî ámbe busông wǎ eringe bu/kwárê ne mbé.