2 Sámwel 20 - Bokyi Bible

Shéba o/bírî Bunwa ne Otu Dívit

¹ Onyinchéng obónge o/mû ányi ké Gyígal, mú édúú emen e/mû e*fí kanong* mú o/mû o-bángê e Shéba, ne bonchí emen o/mû o-bángê e Byíkiri, mú o/mû o/fím ké kyikû-banet ńkyí Běnjámin. O-jwá ntán, o-wonge o/fu, Otu Dívit oo/róng. Be bii*jwo ńkyí emen* ǎ banet-Ézerel* byidim m̂ dyijê.

² Banet-Ézerel ba-mîng kâng Otu Dívit, ba-dim ne Shéba ké kyikû. Nké banet-Júda ba/waa mbe ba-kyâ Otu Dívit ofê, ba-dim ne nyǐ ké kyikû kyi-fím ké Jódan ba-ribi Jerúsélem.

³ Nkéré mú Otu Dívit o/ribi ké kyibám-butu emen, ké Jerúsélem, o/yip banyi emen ḿbé bwǎsíng ámbe ashí diǐkpú ḿbé o/mû o/mîng kámbé o/fu, bakyú ba-tún n kyibám-butu, o-tî kámbé o/fu, ba-kûbám kámbé. O-kye kámbé byěm, nké nyǐ o*da/chîrí ne mbé*. Mbé ba/waa ké kafâ-kyise tete ba-kpú, ba-kyú u éné wǎ banyǐnkú.

⁴ Otu Dívit o-raa ne Amása o/fu, da-kpî banet-Júda ba-ba-cibi kyikit kyibónge, ne bwa esim nyín ne mbé ací afee.

⁵ Amása o-dim o-wâa edakpî kámbé, nké nyǐ o*da/bwa esim ké nkéré mú Otu Dívit o/mû o/sét*.

⁶ Otu Dívit o-raa kâng ne Abyísha o/fu, Shéba o/chi o-kye bě busông o-shwôm Abyísálam. Yip basúja ejí a-dim a-ró ng ǎ a-câ, â kyi*fí éné* nyǐ o/chi o-da-koo eshê ekíri nyí shwaneshwane o-kyú, o-fem bě.

⁷ Basúja-Jówap kâng ne ḿbé mbe ba-bám m otu ne kángkáng basúja ḿbé áku ba-dim ké Jerúsélem ne Abyísha eringe nyí badaró Shéba ké kyikû.

⁸ Nkéré mú ba/ribi ké kiimbâng-buká, ké Gyíbwon, Amása o/kâm kámbé. Jówap o/mû o/fé byidóng-byití enwa, ne kashwám ké nkwóp bwábwá ké emâp emen. Nkéré mú o/tín o-ca kashú, kashwám ánke ka-róng kyísí.

⁹ Jówap o-bí Amása o/fu, byiko kâng, ǎ ocín ejí. O-níbî ǎ ké kyiti ké bubwô-etyebéng emen eringe nyí oda ǎ erwâm.

¹⁰ Amása o*da/bám byiko emen ké kashwám ńké Jówap o/níbî éné ké bubwô ḿbú áku* Jówap o-kpet ǎ kánké ké dyifít, efong e-byí e-pwôo kyísí. O-waa ányi ké abe o-kpú, ne Jówap o*da ǎ echîkpet kashwám*. Jówap ne wǎn-boné emen Abyísha ba-shwôm kâng mbe ba-ró ng Shéba ba-câ.

¹¹ Súja-Jówap obónge o-bwom ké kyikwóm-Amása o-wonge kyíbóng kyíbóng o/fu, nang yeě nang yeě mú o/bwom ne Jówap ne Otu Dívit oca ne Jówap ké kyikû.

¹² Kyikwóm-Amása kyi/mû ányi sáre ké otyém-bukwóp ne baróng ké byiko byimúmú sabesabe. Súja-Jówap ámu o/ri o/fu, nang yeě mu o-bâ ng ebwom ányi, o-tut kâng kánkyí ké bukwóp o-twóp ké kyifát, o-yip kiǐmbim o-cít kánkyí.

¹³ Nkéré mú baa/yip kyikwóm-Amása ké bukwóp, nang yeě nang yeě o/dim ne Jówap ké kyikû ba-ró ng Shéba ba-câ.

¹⁴ Shéba o/shwôm esí-byikû-banet-Ézerel emúmú, o-nung ké oshê mú Ébel-Bét-Máka, ne kángkáng banet ḿbé ba/fím ké kyikim-banet ńkyí Byíkiri ba-cibi kyikit kyibónge, ba-dim ne nyǐ ké kyikû ba-nung ké kafâ-oshê.

¹⁵ Basúja-Jówap ba-jwo ba/fu, nyǐ mu ányi, ba-ca kâng ba-da-wâng oshê ámu ba-fé ké kafâ. Ba-sím azu-ecing ba-zû ké ekpe nyí kyíjí, ba-kpet esím ké kyikû-ekpe eringe nyí ekpe ányi edamyii.

¹⁶ Onyinyi obónge o/mû ké oshê ámu mú o/mû ne bubong, nyǐ o/bwom ké ekpe o-wonge o/fu, fwôo n̂g atông ba-jwo. Sét n̂g Jówap o-bâ kwán. Mu n-ryuu ng m-pem ne nyǐ.

¹⁷ Jówap o-dim o-ca. O-bí ǎ o/fu, wo nké adabángê Jówap? Jówap o-faa ǎ o/fu, âa, me m-bángê e Jówap. Mú onyinyi ámu o-faa o/fu, fwôo atông a-jwo mě, ǎ bonchí. Jówap o-faa ǎ o/fu, mu n-jwo ng.

¹⁸ Onyinyi ámu o-faa o/fu, ké nkéré mú o/shwôm ké esim, ba/mû ba-raa ng ba/fu, ca ké oshê-Ébel ba-faa ǒ ḿbím eyên, ne éné to nké ba/mû ba-chi i.

¹⁹ Oshê mú eten o-chi i kiǐtí-oshê, mǔ mu ne bunyîn-dyityém ne ofê o-shwôm ké esí-Ézerel. Ebóng ńkyí wo amu a-kan n a/fu, a-bên n kámú. Wo amu a-kyé ng a/fu, a-bên n chwǒm ńkyí kyi/já Óburúkpâbí dí.

²⁰ Jówap o-faa ǎ o/fu, n*fí n-ryuu ng n-chi éné ne banyá*. Me mm*ba/chi n-shí oshê eyên*.

²¹ *Chí éné nké byi/tî okabe byi/fu, byi-chi i*. Onyinchéng obónge mú odabángê Shéba, mú wǎn-Byíkiri, mú o/fím ké esí nyí eku éku, nyí Éferem, oo/bírî o-kú o-nwa ng byití ne Otu Dívit. Kye mě onyinchéng mún nké nke, ne me n/chi n-zú abwô ké oshê mún. Onyinyi ámu o-faa ǎ o/fu, be byi/chi byi-twóp ǒ dyishí emen ké ekpe.

²² O-bwa kâng esim ne okabe ámu o-kâm banet-oshê. Ba-két Shéba dyishí, ba-twóp ké ekpe, ba-kye Jówap, Jówap o-jwá ntán o-sét basúja emen o/fu, bamîng oshê ámu, ba-bwa esim dyijê. Jówap o-bwa kâng dyijê ké Jerúsélem o-kâm Otu Dívit.

Banet-Ashí-Bǎmkpóngé ḿbé Otu Dívit

²³ Jówap nké o/mû onet-dyishí-basúja ḿbé Ézerel. Benáya mú wǎn-Jehóyáda nké o/mû onet-dyishí-basúja ḿbé ba/mû ba-bám m Otu Dívit.

²⁴ Adonyíram nké o/mû onet-dyishí-básóng ḿbé ba/mû ba-chi i bǎmkpóngé. Jehósháfat mú wǎn-Ahílut nké o/mû onet-dyishí-byěm ḿbyí mbe ba-sáng ng ba-tî ng kyísí.

²⁵ Shéba nké o/mû nsâng banwet ḿbé esuk. Zádok ne Abyǎta nké ba/mû banchi kyifen-Osówo.

²⁶ Ne Éra mú o/fím Jáyi nké o/mû to nchi kyifen-Osówo mú Otu Dívit o/cá.