2 Sámwel 2 - Bokyi Bible

Ba/kúng Dívit Otu mú Júda

¹ Nkéré mú ńkyín kii/shwôm, Dívit o/bí Óburúkpâbí o/fu, nca n-da-kyú onet-dyishí mú oshê-Júda obónge dí. Óburúkpâbí o-faa ǎ o/fu, âa, ca. Dívit o-bí ǎ o/fu, oshê orá. Óburúkpâbí o-sét ǎ o/fu, Héboron.

² Dívit o-dim kâng o-jâ Héboron, o-kpî banyi emen ashí afee, Ahínom mú o/mû o/fím Jézerel, ne Abyígal mú o/mû onyǐnkú-Nábal, mú o/mû o/fím Kámel.

³ O-kpî to basúja emen ne banet ebe, ne ba-kûkyú ké eshê nyí e/fárâng ne Héboron.

⁴ Banet-Júda ba-bâ kâng ké Héboron ba-ba-kúng Dívit otu mú Júda. Nkéré mú Otu Dívit o/jwo ba/fu, banet-Jábeshi ḿbé mbe ké esí nyí Gyílet baa/ryii Otu Sôl,

⁵ o-twóm banet ba-ca áku ne kyitwóm ńkyín. O/fu, kyi/bát Óburúkpâbí ojware běn ké ofê mú ba/kye otu enen, ké oryii mú ba/ryii ǎ.

⁶ Ne kántîk to, kyi/bát Óburúkpâbí ocángê dyityém o-fé to dyityém emen ne ben. Me to n/chi n-kû běn echi kanong ké bubwô-chwǒm ńkyí ben baa/chi.

⁷ Kyú n̂g shwaneshwane, ne *da n̂g eshî*. Otu Sôl mú otu enen oo/kpú, ne banet ḿbé Júda baa/kúng mě butu.

Ba/kúng Eshíbóshet Otu mú Ézerel

⁸ Onet-dyishí-basúja-okúsí-Otu Sôl mú odabángê Ábina o/mû o/chêe ne wǎn-Otu Sôl mú odabángê Eshíbóshet ba-nyáng Jódan ba-jâ Mahánam.

⁹ Ábina o-chi ǎ áku o-firi otu mú esí nyí Gyílet ne [Ásha] ne Jézerel ne Éferem ne Běnjámin, ne ké ntûntû, nyǐ o/mû otu mú esí-Ézerel emúmú.

¹⁰ Nyǐ o/mû oo/rí bajam-aje bafee ńdyí ba/kúng ǎ otu-Ézerel, ne nyǐ o/ryí butu ámbu ké aje afee. Nké kyikû-banet ńkyí Júda ba/mû mbe ba-kyâ Otu Dívit ofê,

¹¹ ne nyǐ o/kyú otu mú Héboron, mú esí nyí Júda ké aje káchâtkányi ne kyicê.

Byití ḿbyí Ézerel ne Júda

¹² Ábina ne banet-ashí-basúja ḿbé Otu Eshíbóshet ba/dim ké Mahánam ba-ca ké oshê-Gyíbwon.

¹³ Jówap mú boné emen o/mû o-bángê e Zerúya, ne banet-ashí-basúja-Otu Dívit bakíri ba/dakwárê ne be Ábina ké kiǐdé-kace, ké kyikit ńkyí mbé ashí amúmú ba/kyú me, kyikim-banet kyibónge ké bukô-kiǐdé ḿbú áku, ne ńkyí kyibónge to ké ḿbú bubónge.

¹⁴ Ábina o-raa ne Jówap o/fu, byifîm esu-byisat ekíri ké byicê byimúmú ba-kan kpá byití enwa. Jówap o-faa o/fu, nkyi kanong.

¹⁵ Banet ashí diǐkpú ne afee kâng ḿbé ba/bwom ké dyishí-Otu Eshíbóshet ne kyikû-banet ńkyí Běnjámin ba-nwa ne banet-Otu Dívit to ashí diǐkpú ne afee.

¹⁶ Nang yeě nang yeě ké burwám ebe o/kám orî ké dyishí, o-kpet ǎ kashwám ké bukô-ofan. Ne ké bubwô ámbu, mbé ashí amúmú banet bujam esim banyii ba/myii ányi kyísí ashí amúmú ba-kpú. Ne éné nké mbe ba-kó ng kyikit ánkyi ké Gyíbwon, Kyikit-Bushwám.

¹⁷ Byití-busa-dyityém byi-ba-róng kâng. Ne banet-Otu Dívit ba-kpógê Ábina ne banet-Ézerel.

¹⁸ Bwǎn-Zerúya ashí achât ba/mû ányi, Jówap ne Abyísha ne Ásahel. Ásahel mú o/mû o-zóngê e ochéé wǎ ekún,

¹⁹ o-kpet ezóngê o-ca ne Ábina ké kyikû, o-zóngê e o-câ ǎ ocǎng ké kyikû dángdáng.

²⁰ Ábina o-bírî achi ké esim, o-raa ne nyǐ o/fu, ányi wo, ǎ Ásahel? Nyǐ o-faa o/fu, âa, me.

²¹ Ábina o-sét ǎ o/fu, mîng ne me ezóngê ké kyikû. Zóngê ne onet-súja okíri a-koo ǎ byěm ḿbyí mu ne mbyí. Nké Ásahel o/wâa o-zóngê e o-câ ne nyǐ ké kyikû.

²² Ábina o-chîraa ne nyǐ o/fu, mîng ezóngê ne me ké kyikû. Ebóng amu a-kyé ng a/fu, nju ǒ. N-cen n nǎ ne n-ta Jówap mú wǎn-boné eyên kyiraa ne bunyîn-dyityém.

²³ Nké Ásahel o*da/mîng ezóngê ne nyǐ*. Ábina [o-bwa kâng ne kyíbye esim ésim] o-tím ǎ ké dyifít kyi-tím kyi-sát esim. Ásahel o-myii kyísí o-kpú. Ne nang yeě mú o/byí ké kyikit ánkyi ńkyí o/rí éné, o/bwom ányi.

²⁴ Nké Jówap ne Abyísha ba/wâa ba-zóngê e ba-câ ne Ábina ké kyikû. Ne ké dyikurúku, ba/daribi ké kaku ńké Áma, ńké nke ké kyicê ńkyí esû edabyí, ńkyí oshê mú badakó Gyâ, ké bukwóp ḿbú a-kú a-wâa ng ké kyikim-dyikán ńkyí Gyíbwon.

²⁵ Banet ḿbé ba/fím ké kyikû ńkyí Běnjámin ba-chîdacibi ba-wáp Ábina ba-fé ké kafâ, ba-bwât ba-bwom kyíbóng-kaku.

²⁶ Ábina o-wonge o-kó Jówap, o-bí ǎ o/fu, byiwaa byi-nwa ng byití byi-câ kashú dí. Wo a*fí a-nyît ng a/fu, ké nryî esim, chwǒm kyikíri kii*ba/chi kyi-kyú* kyi-cibi ne kafâ esa dí. Be byi-chi i banet-oshê obónge. Kyi-bwon n nǎ ne wo a-sét banet eyên a/fu, bamîng bě eró ké kyikû.

²⁷ Jówap o-faa ǎ o/fu, me n/ryí ocím n-sem Osówo mú mu okpó n/fu, â wo a/mû a*da/raa éné* banet ejí ba/mû ba-ró ng ǒ ké kyikû tete dyicí dyi-cé.

²⁸ Jówap o-jwá kâng ntán o-sét banet emen o/fu, bamîng banet-Ézerel eró ba-ca ké kyikû. Ne bunwa kâng bu-man.

²⁹ Ábina ne basúja emen ba-cen ba-shwôm ké ndege-esí mú Jódan ké buchú ámbu bumúmú. Ba-nyáng Jódan, ne ńdyí baa/cen ké orî-dyicófóróng ándyi dyimúmú, ba/bwa esim dyijê ké Mahánam.

³⁰ Nkéré mú Jówap o/mîng ezóngê ne banet-Ézerel ké kyikû, o/cibi basúja emen kyikit kyibónge, o-ri o/fu, banet emen ashí onyiryiká ne anyii ba*fí* â a/fîm Ásahel.

³¹ Ḿbé basúja-Otu Dívit ba/ju banet-Ábina égot ebónge ne bajam-banet nyíryinyi, ké kyikû-banet ńkyí Běnjámin.

³² Jówap ne banet emen ba-kúng kyikwóm-Ásahel ba-ryii ké dyikun-kyikû-dyibóng, ké Bételehêm. Ba-cen kâng ké bushú bumúmú, ne ké dyicófóróng, ba-bwa esim dyijê ké Héboron.