2 Sámwel 18 - Bokyi Bible

Ba/kpógê Abyísálam, ba-ju ǎ

¹ Otu Dívit o/kó basúja emen ba-cibi kyikit kyibónge, o-kyii kámbé ké byikim ké byikim, ḿbyí égot etánge etánge ne ḿbyí bajam-banet batánge batánge, o-tî kámbé banet-ashí.

² O-twóm kámbé kâng ba-dim ké byikim byichât, ne Jówap ne wǎn-boné emen Abyísha ne Étya mú o/fím Gât, onet nang orá ne kyikim-banet kyibónge. Otu Dívit o-raa ne mbé o/fu, me to oyén n-câ ne ben.

³ Mbé ba-faa ǎ ba/fu, wo aa*man a-ca ne be*. Banet-bushwôn eten baa*ba/chi ba-kérê* â be ashí amúmú byi/bírî esim byi-díp ne ochéé* nang â mbé ba/ju kyicê-banet eten*. Nké wo amu kiǐtí a-shwôm égot-banet eten nyí ee*nwa epan*. Kyi/chi kyi-kyú kanong kyi-shwôm, â wo a/kyú nyín ké oshê a-kû bě etwóm ochwâp.

⁴ Otu Dívit o-faa kámbé o/fu, me n-chi i nang ebóng chwǒm ńkyí ben ba/kabe ba/fu, kyi/nwa kyi-shwôm. O-bwom kâng fáráng ne bukô-dyifyi ńdyí ké dyishí-oshê, nkéré mú banet emen mbe ba-shwôm m ba-byí i ké byikim ké byikim, ḿbyí égot etánge etánge ne ḿbyí bajam-banet batánge batánge.

⁵ O-sét Jówap ne Abyísha ne Étya o/fu, ké bubwô ejí, *da n̂g echi ba-chi Abyísálam mú wǎn ejí kyibî*. Ne kángkáng basúja ba/jwo ejá ányi nyí Otu Dívit o/sét banet-ashí-basúja emen.

⁶ Basúja-Otu Dívit ba/dim ba-ca ba-da-nwa ne banet-Ézerel, ké kyizinge ńkyí ké Éferem.

⁷ Banet-Otu Dívit ba-kpógê banet-Ézerel. Ba/kpógê kámbé dyikpóge ńdyí dii*nwa eri* ba-ju bajam-égot-banet batánge ké dyicí ándyi.

⁸ Bunwa bu-kpû ké kyikim-oshê ánkyi, ne bujê-banet ba/kpú ké kyizinge ba-shwôm ḿbé ba/kpú ké byití.

⁹ Abyísálam o-da-kwárê okwáráng ne banet-Otu Dívit bakíri. Nyǐ o/mû mu o-yú u o-câ ké kabyî-orá, ne ńdyí nké ka/danung ké dyifít-kiimbâng-kyichí ńkyí badakó ôok, dyishí-Abyísálam dyi/dakpong ké byire-kyichí ánkyi. Kabyî-orá ánke nke ka-zóngê e ka-câ kashú, Abyísálam o-waa ányi kpoong.

¹⁰ Onet-Otu Dívit obónge o-ri ǎ, o-sét Jówap o/fu, bonchí, n/ri Abyísálam kpongkpong ké kyichí ńkyí badakó ôok.

¹¹ Jówap o-faa ǎ o/fu, â a/mû a/ri ǎ, ebóng wo a*da/waa kyikit ánkyi a-ju ǎ*. Me oyén m/mû n-kyâ ǒ byikim-akpuga-syílyíba diǐkpú ne emâp.

¹² Nké onyinchéng ámu o/faa o/fu, â nang a/mû a/kye mě égot-byikim-syílyíba etánge, me m/mû mm*bêem bubwô ejí n-chi wǎn-otu chwǒm*. Be ashí amúmú byi/jwo ké Otu Dívit o/sét ǒ ne Abyísha ne Étya, o/fu, ké bubwô ejí, *da n̂g echi Abyísálam mú wǎn ejí chwǒm*.

¹³ Ne â me m/mû n/né ejá nyí otu, n-ju Abyísálam, otu o/mû o-jwo ng kyi-kim ne nkyí. Nyǐ mu o-jwo ng kyi-kim ne kángkáng byěm, ne wo a/mû aa*ba/chi a-sét a-kye mě*.

¹⁴ Jówap o-faa ǎ o/fu, me mm*ba/chi n-chîbên nkéré ne wo n-ca kashú*. O-yip byíbye byichât o-tím Abyísálam ké kakim, ányi o/tôong okpó, kpoong ké dyisín-kyichí.

¹⁵ Basúja-Jówap ashí diǐkpú ba-king kâng ba-fárâng Abyísálam, ba-man ne nyǐ.

¹⁶ Jówap o-kye busa o/fu, bajwá ntán ba-mîng byití enwa. Ne basúja emen ba-bwa kâng esim, ba-mîng ezóngê ne banet-Ézerel.

¹⁷ Ba-yip kyikwóm-Abyísálam ba-twóp ké kiǐríbíríbí-dyibíng, ké kafâ-kyizinge, ba-yip dyizu-aká ba-cít ányi. Kángkáng banet-Ézerel ba-chêe, nang yeě nang yeě o-jâ ké oshê mú emen.

¹⁸ Nkéré mú Abyísálam o/mû okpó, nyǐ o/mû o/mee byiko emen o-tî ké ndege-esí mú otu, ké nǎ, nyǐ o/mû o*fí to ne wǎn-onyinchéng mú odachi dyizîn emen dyi-waa ké ejíí*. Nyǐ o/fé chwǒm ńkyí o/mee éné dyizîn kyi-kim ne dyizîn emen, tete kurún, mbe ba-kó ng chwǒm ánkyi dyizîn, Abyísálam.

Ba/sét Otu Dívit Bukyû ḿbú Abyísálam

¹⁹ Ahímaz mú wǎn-Zádok o-raa kâng ne Jówap o/fu, mîng mě n-zóngê n-da-sét Otu Dívit onínǒng-kyitwóm ńkyín n/fu, Óburúkpâbí oo/nyii ǎ ké abwô-banet-bushwôn emen.

²⁰ Jówap o-faa ǎ o/fu, aa*wááng* kurún wo aa*ba/chi a-kúng kyitwóm ńkyí kyinong nang kyibónge*. Dyicí dyikíri wo a-man n echi éné, nké *chí kurún* ké nǎ, wǎn-otu oo/kpú.

²¹ O-sét kâng ósóng emen mú o/fím Sudân o/fu, ca a-da-sét Otu Dívit ńkyí wo aa/ri. Ósóng ámu o-siring kyísí ké bushú-Jówap, o-byí ne ochéé.

²² Ahímaz o-tú dyishí o/fu, me n*fí n-kérê ng ké ńkyí kyidachi* kamgbe, mîng mě n-ca to ne kyitwóm ánkyi. Jówap o-bí ǎ o/fu, ebóng ńkyí wo amu a-ryuu ng a-chi éné, ǎ wǎn ejí. Baa*ba/chi ba-kye ǒ eyáré ké nkyí*.

²³ Ahímaz o-chî ǎ efaa o/fu, nang kyi-chi nǎ, me mu n-ryuu ng n-ca. Jówap o-sét ǎ o/fu, ca kâng. Ahímaz o-zóngê kâng o-dim o-shwôm ké ndege-esí mú Jódan, ne ka*da/bwon* o-shwôm ósóng ámu.

²⁴ Otu Dívit o/mû me ké otyém ne otyém mú afyi nyí ké kafâ ne nyí kyíjí, nyí ké oshê. Onet mú mu o-bám m oshê o/yú o-jâ kyíbóng-ekpe, o-bwom kyíbóng-nfût mú ba/bi kyíbóng-dyifyi-oshê. O-kan achi o-rángê onyinchéng obónge ké mu o-zóngê e o-bâ kǎnchí.

²⁵ O-wonge o-sét Otu Dívit. Otu Dívit o-faa o/fu, â nyǐ mu kǎnchí, éné mu o-bâ ne kyitwóm ńkyí kyinong. Onet mú mu o-zóngê e éné mu o-fárâng ng ofáráng o-bâ.

²⁶ Onet mú mu o-bám m oshê o-chîri onet okíri mu o-zóngê e o-bâ to kǎnchí, o-wonge o-kó onet mú mu o-bám m dyifyi, o/fu, dǐi, onet okíri mu o-zóngê e o-bâ o. Otu Dívit o-faa o/fu, mú ányi to mu o-bâ ne kyitwóm ńkyí kyinong.

²⁷ Onet mú mu o-bám m oshê éné o-raa o/fu, me n/kabe n/fu, mbwôp kashú-onet mu o-zóngê e wǎ Ahímaz. Otu Dívit o-faa o/fu, nyǐ o-chi i onet mú onong, ne nyǐ mu o-bâ ne kyitwóm ńkyí kyinong to.

²⁸ Ahímaz o-ta Otu Dívit kyiraa, o-siring ányi kyísí ké bushú emen. O-raa o/fu, kpee Óburúkpâbí mú Osówo eyên, mú oo/chi ǒ a-kpógê banet ḿbé ba/bírî bunwa ne butu eyên.

²⁹ Otu Dívit o-bí ǎ o/fu, Abyísálam mú wǎn ejí mu okpó dí. Ahímaz o-faa ǎ o/fu, nkéré mú Jówap mú onet-dyishí-basúja eyên o/twóm mě, ǎ bonchí, me n/ri byěm éné byiryibyiryi, nké me mm*man esét kyi-kim ne nkyí*.

³⁰ Otu Dívit o-sét ǎ o/fu, shwôm a-bwom áku. Nyǐ o-shwôm o-bwom áku.

³¹ Ósóng ámu o-ba-ribi kâng, o-raa ne Otu Dívit o/fu, me mu ne kyitwóm ńkyí kyinong, ǎ otu, ńkyí nda ǒ esét. Kurún, Óburúkpâbí oo/chi ǒ a-kpógê kángkáng banet ḿbé ba/bírî bunwa ne wo.

³² Otu Dívit o-bí ǎ o/fu, Abyísálam mú wǎn ejí mu okpó dí. Mú ósóng ámu o-faa ǎ o/fu, me mu n-fâ nshwam n/fu, ńkyí kii/chi ǎ kyi-man n echi kángkáng banet-bushwôn eyên, ǎ bonchí, kyi-chi to kángkáng banet ḿbé ba/bírî bunwa ne wo.

³³ Bafip ba-waa ba-sú Otu Dívit ké byiko. O-yú o-jâ kyíbóng ké nfût mú ba/bi kyíbóng-dyifyi-oshê, o-wonge ne bukyû. Nkéré mu o-cen n o-câ éné, o/wonge ne bukyû o/fu, ô, wǎn mú ejí. Abyísálam mú wǎn ejí. Abyísálam mú wǎn ejí. Â me m/mû m/kpú, wo a-waa, Abyísálam mú wǎn ejí, Abyísálam mú wǎn ejí.