2 Sámwel 12 - Bokyi Bible

Kyitwóm ńkyí Nátan ne Byiko ḿbyí byi/kpú Otu Dívit

¹ Óburúkpâbí o/twóm Nátan mú mkpábé mú odasét byiraa emen kyikit-Otu Dívit. Nátan o/dim o-kâm ǎ, o-raa ne nyǐ o/fu, banyinchéng ashí afee ba/mû mbe ba-kyú u ké oshê obónge. Obónge o/mû nfang-onet, mú obónge onet-kyikpu.

² Nfang-onet ámu o/mû ne bampong chwóó ne etám-ebû to chwóó.

³ Nké mú onet-kyikpu o/mû ne kyisu-etám-ebû kyibónge nké nke, ńkyí o/ré. O/mû mu o-tún n kánkyí, kyi-kán ké kafâ-kyise emen cibicibi ne bwǎn emen. O-kúng ng ne byiryíng ḿbyí emen nyǐ oyén o-nen n kyisu-etám-ebû ánkyi, o-mîng ng kánkyí kyi-jwáp ng ne omu ké nkôp mú emen, o-kúng ng kánkyí o-fâ ne ké byiká. Kyisu-etám-ebû ánkyi kyi/mû ǎ wǎ wǎn emen mú onyinyi.

⁴ Dyicí dyibónge, ocinónet o-ba-nung nfang-onet ámu. Nyǐ o/mû o*fí o-ryuu ng o/fu, nyǐ o-ju ng kyitú ńkyí emen nyǐ oyén o-rám o-kye ocinónet ámu*. Nké nyǐ o/kám kyisu-etám-ebû ńkyí onet-kyikpu ámu o-rám o-kye ocinónet ámu.

⁵ Kafâ ka-sa Otu Dívit ne nfang-onet ámu, ne o-raa o/fu, me n/ryí ocím n-sem Óburúkpâbí mú mu okpó n/fu, onet mú o/chi chwǒm ánkyi, o-man o-kpú.

⁶ Ké bubwô-dyizong-kyibî-chwǒm ńkyí nyǐ o/chi éné, nyǐ o-man o-só ewa ké nkyí kampén kanyii.

⁷ Nátan o-faa Otu Dívit o/fu, wo a-chi i onet mú o/chi chwǒm ánkyi. Ne nyín něen ńkyí Óburúkpâbí mú Osówo-Ézerel mu o-raa ng. O/fu, nyǐ o/chi ǒ otu-Ézerel, nyǐ o-nyii ǒ ké abwô nyí Otu Sôl.

⁸ Nyǐ o-kye ǒ butu ḿbú Otu Sôl ne banyi emen. Nyǐ o-chi ǒ a-firi otu mú Ézerel ne mú Júda. Â ńkyí ánkyi kyi/mû kyi*da ǒ ekwárê* nyǐ o/mû o/chi o-chî ǒ ekye kampén kafee kyi-shwôm éné.

⁹ Ebóng kâng ne wo aa/né ńkyí nyǐ o/sét ǒ. Ebóng kyi/chi ne wo a-chi kyibî-chwǒm ńkyín. Wo a/chi ba-ju Oráya ké byití. Wo a/mîng banet-Ámon ba-ju ǎ, a-koo onyi emen.

¹⁰ Kántîk kâng, ké kyitông-banet nang kyirá, banet bakíri ḿbé ba/fím ké kyikû-banet eyên ba/chi ba-kûkpú kyibî-bukyû, ké nǎ, wo aa/né ńkyí nyǐ o/sét ǒ, ne aa/koo onyi-Oráya.

¹¹ Nyǐ o/ryí ǒ ocím o/fu, nyǐ o/chi o-chi onet obónge mú o/fím ké kyikû eyên o-bâ ǒ ne afaníkong ké byiko. Wo a/chi a-ri ńkyín ké nkéré nyǐ oo/kúng banyi eyên o-kye onyinchéng okíri, ne nyǐ o/chi o-rí ne mbé ne esû wááng.

¹² Wo a/chi kyibî ké kadip, nké nyǐ o/chi o-chi ńkyín kyi-chi ké esû wááng eringe kángkáng banet-Ézerel badari.

¹³ Otu Dívit o-faa o/fu, me nn/chi kyibî ké bushú ḿbú Óburúkpâbí. Nátan o-faa o/fu, Óburúkpâbí oo/pwoo ǒ. Aa*ba/chi a-kpú*.

¹⁴ Nké ké nǎ, wo aa/cábê Óburúkpâbí ké ńkyí a/chi éné, wǎn eyên ámu o/chi o-kpú.

¹⁵ Nátan o-bwa kâng dyijê. Óburúkpâbí o-chi wǎn ámu, mú Bashéba o/fwon o-kye Otu Dívit, o-kpet erwôm kanong kanong.

Wǎn-Otu Dívit o/kpú

¹⁶ Otu Dívit o-fé nshwam o-kye Osówo o/fu, ochi wǎn emen ámu o-nyange. O-né byiryíng eryí. Ne buchú nang burá nyǐ mu o-da ng enung ké nfût emen o-rí ké dyibe-esí tete dyi-cé.

¹⁷ Banet-ashí-bǎmkpóngé emen ba-dim ba-kâm ǎ, ba-kan ba/fu, mú mǔ obûu nensang, nké nyǐ o*da/bángê* ne o*fí o-bángê e eryí nang kaǎchwóm ne mbé*.

¹⁸ Kyipyán kyi-ba-shwôm kyibónge, wǎn amu o-kpú, ne banet-ashí-bǎmkpóngé-Otu Dívit ba/mû mbe ba-shî ng ǎ esét. Ba/fu, nkéré mú wǎn mún o/tôong okpó, Otu Dívit o*da bě efaa ojá nkéré byi/pem ne nyǐ*. Be byi-cen n nǎ ne byi-sét ǎ byi/fu, wǎn mún oo/kpú. Kakíri nyǐ o/chi o-némê byiko emen.

¹⁹ Nkéré mú Otu Dívit o/ri kámbé mbe ba-pem m ne barî ké booju, o-nyît o/fu, wǎn ámu oo/kpú. O-bí kâng kámbé o/fu, wǎn ámu oo/kpú dí. Ba-faa ǎ ba/fu, âa, oo/kpú.

²⁰ Otu Dívit o-bûu ké dyibe-esí, o-kôo omu, o-sabe bakút, o-yángê byídí. O-dim kâng o-ca ké kyise-Óburúkpâbí o-da-kye ǎ ofê. Nkéré mú o/bwa esim ké kyibám-butu, o-bí o/fu, bakye ǎ byiryíng, o-koo kámbyí o-ryí.

²¹ Banet-ashí-bǎmkpóngé emen ba-raa ne nyǐ ba/fu, be byi*fí byi-nyît ng eringe ńkyín kyi/byí*. Nkéré mú wǎn mún o/mû o/tôong okpó, wo a/mû amu a-tii ng ǎ, byiryíng a*da/bángê eryí*. Nké ńdyí nyǐ o-kpú u o-bâ, wo a/bûu nensang a-ryí byiryíng.

²² Otu Dívit o-faa kámbé o/fu, âa, me m/mû n/rí esong n-tii bukyû nkéré nyǐ o/mû o/tôong okpó. Me m/mû n/kabe n/fu, kakíri Óburúkpâbí o/chi o-ri mě bafip, oo*bángê wǎn ámu o-kpú*.

²³ Nké kántîk mú nyǐ oo/kpú, me n-chî ng erí esong ebóng. Me m-man n echi wǎn ámu o-chîbwa esim ké dyikpen? Dyicí dyibónge, me to n/chi n-ca ké kyikit ńkyí nyǐ mu, nké nyǐ oo*ba/chi o-chîman ebwa esim o-kâm mě*.

Ba/fwon Sólómon

²⁴ Otu Dívit o-fé kâng Bashéba mú onyi emen dyityém. O-rí ne nyǐ, o-fwon wǎn-onyinchéng. Otu Dívit o-fé ǎ dyizîn, Sólómon. Wǎn ámu o/mû mu o-jê ng Óburúkpâbí.

²⁵ Ne Óburúkpâbí o-sét Nátan mú mkpábé mú odasét byiraa emen o/fu, ofé wǎn ámu dyizîn, Jedyídya, ké nǎ, mú mǔ mu o-jê ng ǎ nyǐ.

Otu Dívit o/koo Oshê mú Rába

²⁶ Ké nkéré ámu, Jówap mu o-câ kashú ne byití emen ne oshê mú Rába, dyityém-oshê ńdyí banet-Ámon, ne o/mû o-kú o-bâ ekoo oshê ámu.

²⁷ O-twóm banet o/fu, basét Otu Dívit ba/fu, nyǐ oo/kye oshê-Rába bunwa, ne nyǐ oo/koo byikit ebe ḿbyí badató omu.

²⁸ Cibi kâng basúja eyên ḿbé áku kángkáng, a-kye oshê mún bunwa, a-koo kámú wo oyén. Me n*fí n-ryuu ng n/fu, bakpee mě me ké mǔ ekoo*.

²⁹ Otu Dívit o-cibi kâng basúja emen, o-ca ne mbé Rába, o-kye kámbé bunwa, o-kpógê kámbé.

³⁰ Otu Dívit o-bâa [orím-bukye mú banet-Ámon mú odabángê Myíkom] etam-butu nyí ba/chi ké gûl, ké dyishí. Etam ányi e/mû bakyílogaram bujam esim onyiryiká ké burô, ne ba/fé to buká bubónge ḿbú budashwane kasî kanong kanong ké nyǐ. Otu Dívit o-yip kányí o-cít ké dyishí ńdyí emen. Nyǐ o/wuri to byěm chwóó ké oshê ámu.

³¹ O-tî banet-oshê ámu ba-kûchi bǎmkpóngé ne bushwám-asháng ne byijwap ne akye, o-chi kámbé ké busa [ba-kûchi] bǎmkpóngé ḿbé byirim-ecing ḿbyí badafwá ofwáng. Éné to nké nyǐ o/chi kángkáng banet ḿbé mbe ké eshê-Ámon ekíri. Nyǐ ne banet emen ba-bwa kâng esim ké Jerúsélem.