2 Sámwel 11 - Bokyi Bible

Otu Dívit ne Bashéba

¹ Ké orî-ashí-kyifang, ké nkéré mú batu badafwam ece byití, Otu Dívit o/twóm Jówap ne banet-ashí-basúja emen ne basúja ebe ba-dim byití. Ba-nwa ne basúja-Ámon ba-kpógê kámbé, ba-wâng oshê mú badakó Rába ba-fé ké kafâ. Nké Otu Dívit oyén o/waa ké Jerúsélem.

² Dyicí dyibónge, ányi esû e-kú e-jwâa ng e-câ, Otu Dívit o/jwóbê ké achi nyí o/mû mu o-nya ng, o-yú o-jâ kyíbóng-kyibám-butu. Ńdyí mu o-koo ng bufú áku kyíbóng, o/ri onyinyi obónge mu o-kôo ng omu. Onyinyi ámu o/nwa búsé kanong kanong.

³ O-twóm kâng onet o/fu, oda-kyé kyikû o-nyît kyi-kim ne onyinyi ámu. Ne o-jwo kâng ba/fu, mú mǔ o-bángê e Bashéba, mú wǎn-Élyam, ne o-chi i onyi-Oráya mú o/fím Hyítat.

⁴ Otu Dívit o-twóm banet o/fu, bada-kpî ǎ. Ba-kpî ǎ ba-ba-kye Otu Dívit. Otu Dívit o-rí ne nyǐ. Onyinyi ámu o/mû oo/ri baróng, o-chi kyifen ńkyí byiko esoo. O-bwa kâng esim dyijê.

⁵ Nkéré mú kaa/rí, o-ba-nyît o/fu, nyǐ oo/koo dyifít. O-twóm kyitwóm ba-sét Otu Dívit.

⁶ Otu Dívit o-twóm kâng kyitwóm ba-sét Jówap o/fu, twóm mě Oráya mú o/fím Hyítat. Jówap o-twóm kâng Oráya kyikit-Otu Dívit.

⁷ Nkéré mú Oráya o/ribi, Otu Dívit o/bí ǎ â Jówap ne basúja ḿbé áku mbe kanong, ne eringe bunwa to mbu bu-câ kashú.

⁸ O-sét kâng Oráya o/fu, ca ké kyise eyên a-da-jáng ké kaǎnyín-nkéré. Oráya o-dim. Otu Dívit o-twóm eyáré e-dim ké kyise-Oráya.

⁹ Nké Oráya o*da/ce ké kyise emen* o/waa o-rí ányi ké ocím-dyifyi-kyibám-butu ne basúja ḿbé mbe ba-bám m Otu Dívit.

¹⁰ Nkéré mú Otu Dívit o/jwo ba/fu, Oráya o*da/ce ké kyise emen* nyǐ o/raa ne nyǐ o/fu, ofyiofyi nké aa/fyi něen ké orî mú a/jang erí kyíjí, ebóng ńkyí a*da/ce ké kyise eyên*.

¹¹ Oráya o-faa ǎ o/fu, basúja ḿbé Ézerel ne ḿbé Júda mbe kyíjí ké byití, ne mbé mbe áku ne mkpukpu-byěm-Osówo, ne onet-dyishí-basúja eten mú odabángê Jówap ne banet-ashí-basúja emen mbe áku ké bampyep kyíjí. Me n-cen n nǎ kâng ne n-dim ké kyise, n-kûryí byiryíng n-jwáp ng bato, n-rí ne onyi ejí. Me n/ryí ocím n-sem Óburúkpâbí mú mu okpó n/fu, me mm*man echi dyizong-chwǒm ándyi*.

¹² Otu Dívit o-sét ǎ kâng o/fu, kyú kâng nyín ké dyicí ńdyí kurún, ne nencí n/chi n-twóm ǒ a-bwa esim ké byití. Oráya o-kyú kâng ké Jerúsélem ké dyicí ándyi ne orî-dyicí.

¹³ Otu Dívit o-sét ǎ o-ba-ryí byiryíng-dyikurúku ne nyǐ, o-kye ǎ bato ba-kû ǎ ebwóm. Nké buchú ámbu to, Oráya o*da/ce ké kyise emen*. Nké o/rí ké [kiǐmbim] emen ké kyibám-butu, ké nfût mú bambâm kyibám-butu.

¹⁴ Ké orî-dyicí, Otu Dívit o-sáng léta o-kye Oráya o/fu, okye Jówap.

¹⁵ O/sáng o/fu, tî Oráya ké kashú-byití, ké kyikit ńkyí bunwa mbu bu-sóng ng bu-shwôm, a-bwa kâng esim ésim, a-mîng ba-ju ǎ.

¹⁶ Ké bubwô ámbu, nkéré mú Jówap mu o-wâng ng oshê ámu o-fé ké kafâ, o/twóm Oráya ké kyikit ńkyí o/nyît o/fu, banet-bushwôn ebe mbe ba-shwane e.

¹⁷ Basúja ḿbé áku ba-byí ké kafâ-oshê ba-ba-nwa ne basúja ḿbé Jówap. Ba-ju banet-ashí-basúja-Otu Dívit bakíri, ba-ju to Oráya.

¹⁸ Jówap o-twóm kâng kyitwóm o/fu, basét Otu Dívit kyi-kim ne byití.

¹⁹ O-sét onet mú o/twóm ǎ éné o/fu, â aa/sét Otu Dívit kángkáng kyi-kim ne byití,

²⁰ katô kafâ ka/chi ka-sa ǎ, o-bí ǒ o/fu, ebóng ne ben ba-jang ece éné fáráng ne oshê ba-da-nwa ne mbé. Ben ba/mû ba*fí ba-nyît ng ba/fu, mbé ba-man n ebwom kyíbóng-ekpe nyí e/wáp oshê e-fé ké kafâ ba-ché báre dí*.

²¹ Ben ba*fí to ba-zîim m eringe ba/ju Otu Abyímélek mú wǎn-Gyídyon*? Ba/ju ǎ ké Tébez, kyikit-onyinyi obónge o/bwom kyíbóng-ekpe nyí e/wáp oshê e-fé ké kafâ o-twóp kiimbâng-buká bu-ju ǎ. Ebóng kâng ne ben ba-jang ece fáráng ne ekpe ányi. Â Otu Dívit o/bí ǒ éné, sét ǎ a/fu, ba/ju to Oráya mú onet-dyishí-basúja eyên.

²² Onet-kyitwóm ámu o-dim kâng o-ca kyikit-Otu Dívit, o-sét ǎ ńkyí Jówap o/sét ǎ o/fu, osét.

²³ O/sét ǎ o/fu, banet-bushwôn eten ba/mû mbe ba-shwane e ba-shwôm bě, ne ba-byí kâng ké kafâ-oshê ba-bâ ebanwa ne be kwán kyíjí. Nké byi/ró kámbé ba-bwa ké dyifyi ńdyí ké dyishí-oshê.

²⁴ Ba-bwom kyíbóng-ekpe kâng ba-kpet bě eché báre, ne mbé ba/ju banet-ashí-basúja eyên bakíri, ǎ otu, ba-ju to Oráya mú onet-dyishí-basúja eyên.

²⁵ Otu Dívit o-raa ne onet-kyitwóm ámu o/fu, fé Jówap busa, a-sét ǎ to a/fu, o*dachi o-sa kafâ* ké nǎ, onet o*fí nang obónge mú odaman esét onet mú odakpú ké byití*. Sét ǎ o-kye bunwa ḿbú shwaneshwane ké oshê ámu, o-koo kámú.

²⁶ Nkéré mú Bashéba o/jwo ba/fu, baa/ju otyép emen, o/ta ǎ dyikán.

²⁷ Nkéré mú oo/ta dyikán dyi-man, Otu Dívit o/twóm, Bashéba o-ba-jâ ké kyibám-butu. O-firi onyi emen, o-fwon ǎ wǎn-onyinchéng. Nké Óburúkpâbí dyityém dyi*da ǎ enyîn ké ńkyí Otu Dívit o/chi*.