2 Sámwel 10 - Bokyi Bible

Otu Dívit o/kpógê Banet-Ámon ne ḿbé Syírya

¹ Nkéré mú ńkyín kii/shwôm, Otu Náhashi mú o/fím Ámon o/bakpú, ne wǎn emen mú odabángê Hánun o-firi otu.

² Otu Dívit o-raa o/fu, m-man n-tông Otu Hánun bucín ḿbú ofê wǎ eringe Otu Náhashi mú bonchí emen o/tông mě. Otu Dívit o-twóm kâng banet o/fu, bada-saa mú mǔ byiko. Nkéré mú banet ámbe ba/nung ké Ámon,

³ banet-ashí-banet-Ámon ba/raa ne otu ebe ba/fu, wo a/kabe a/fu, nkyi ké ofê mú bonchí eyên nké Otu Dívit o/twóm banet ḿbén o/fu, baba-saa ǒ byiko? Ké ntûntû, kyi*fí éné*. Nyǐ o/twóm kámbé nyín wǎ banet-boǒfêp-esí eringe badakyé kyikû kyi-kim ne oshê, eringe nyí nyǐ oda bě eman ekpógê.

⁴ Otu Hánun o-kám banet ḿbé Otu Dívit o/twóm éné, o-kwárê kámbé kyiti ogba obónge obónge, o-két kámbé ocím-byídí, o-fu kámbé ba-dim.

⁵ Éshwân e-wuri kámbé kanong kanong eringe nyí badabwa esim dyijê. Nkéré mú Otu Dívit o/jwo kyi-kim ne ńkyí kyi/chi éné, o-twóm ejá o/fu, basét ḿbé mbé ba-kyú áku ké Jéríku tete byitii ebe byi-bwât byi-kán.

⁶ Banet-Ámon ba-nyît ba/fu, mbé baa/chi Otu Dívit o/firi onet-bushwôn ebe, ba-yámê kâng égot-basúja-Syírya etánge etánge ké byikit bujam, ḿbé ba/fím Bét-Réhop ne Zóba. Ba-yámê to égot-basúja etánge etánge ké byikit diǐkpú ne byifee, ḿbé ba/fím Tôp, ne otu mú Máka to o-bâ ne égot-basúja nyí emen etánge.

⁷ Otu Dívit o-jwo kyi-kim ne nkyí, ne o-twóm Jówap o/fu, oca byití ne mbé ne basúja ebe bamúmú.

⁸ Basúja-Ámon ba-byí ba-bâ, ba-bwom ké byikit ebe ké dyifyi ńdyí oshê mú Róba, oshê mú mu dyityém-oshê ebe, ḿbé áku ḿbé ba/fím Syírya ne Tôp ne Máka ba-bwom ké byikit ḿbyí gbúúl.

⁹ Jówap o-ri o/fu, basúja ḿbé banet-bushwôn ebe ba/chi ba-kye ǎ bunwa kashú ne esim, o-cá kâng bachíchí-basúja-Ézerel o-tî kámbé ké byikit ba-bírî kashú ne basúja ḿbé Syírya.

¹⁰ O-tî ḿbé ba/waa ké abwô nyí wǎn-boné emen mú odabángê Abyísha, mú mǔ o-tî kámbé ké byikit ba-bírî kashú ne basúja ḿbé banet-Ámon.

¹¹ Jówap o-sét ǎ o/fu, â a/ri a/fu, basúja-Syírya ba-kú ba-kpógê ng mě, bâ a-ba-chwáp mě. Ne â ḿbé Ámon to ba-kú ba-kpógê ng ǒ, me n/chi m-bâ m-ba-chwáp ǒ.

¹² Kyú shwaneshwane, ne dyityém to dyirêe ǒ. Byinwa byití kíngkíng byi-kye banet eten, byi-nwa to byi-kye eshê nyí Osówo eten. Ne kyi/bát ńkyí Óburúkpâbí mu o-ryuu ng kyichi.

¹³ Jówap ne banet emen ba-tín ba-ca kashú eringe badakye bunwa, basúja ḿbé Syírya ba-chêe.

¹⁴ Nkéré mú basúja ḿbé Ámon ba/ri basúja ḿbé Syírya ké ba-kú ba-chêe ng ba-câ, mbé to ba-chêe Abyísha ba-bwa esim ésim ké kafâ-oshê. Jówap o-bírî kâng esim ké byití ḿbyí o/mû o/dim enwa ne banet-Ámon, o-bwa esim ké Jerúsélem.

¹⁵ Basúja-Syírya ba-nyît ba/fu, banet-Ézerel baa/kpógê kámbé, ba-kó kâng basúja ebe kángkáng ba-ba-cibi kyikit kyibónge.

¹⁶ Otu Hadadéze o-twóm ba-da-kpî basúja-Syírya ḿbé ba/mû ké kyicê-kace-Yuférétyis ńkyí esû edabyí, ba-bâ ké Hélam, ké busa ḿbú Shóbak, mú o/mû onet-dyishí-basúja ḿbé Otu Hadadéze mú o/fím Zóba.

¹⁷ Nkéré mú Otu Dívit o/jwo kyi-kim ne nkyí, o-cibi basúja-Ézerel kyikit kyibónge, ba-nyáng kace ńké Jódan, ba-cen ba-ribi Hélam, kyikit ńkyí basúja-Syírya ba/bwom ké byikit ḿbyí ebe ba-bírî ǎ kashú. Bunwa bu-kpet kyikû,

¹⁸ ne basúja ḿbé Ézerel ba-ró ḿbé Syírya ba-bwa esim. Otu Dívit ne banet emen ba-ju égot-basúja-Syírya echât ne kyicê, ḿbé badatut bamútu ḿbé bubyî-orá budatut, ba-ju to égot-banyû-bubyî-orá etánge etánge ké bajam-byikit bafee, ba-némê to Shóbak mú onet-dyishí-basúja-banet-bushwôn ebe, mú o/kpú ké byití.

¹⁹ Nkéré mú batu ḿbé mbe ké bubwô ḿbú Otu Hadadéze ba/nyît ba/fu, banet-Ézerel baa/kpógê kámbé, ba/chi kyikwáré ne banet-Ézerel, ba-firi ké bubwô ebe. Banet-Syírya ba-kpet eshî kâng ba/fu, bachîchwáp banet-Ámon.