2 Pyíta 3 - Bokyi Bible

Otu Kyítá o/ryí Ocím o/fu, Nyǐ mu o-bâ

¹ Bacín-dyityém ejí, nyín něen nnyinyěng-léta mú me nn/sáng n-kye běn. Ké mbé bamúmú, me nn/kan běn efé ekabe nyí enong ké atyém enen, ké byěm ḿbyín ḿbyí mu n-zîim m běn.

² Me mu n-ryuu ng n/fu, ben, zîim m̂ byěm ḿbyí bamkpábé ḿbé badasét byiraa-Osówo ba/raa ké nkéré mú o/shwôm ké esim chwóó, ne kyije to ńkyí banet-kyitwóm-Jisos ba/kye běn, ńkyí kyi/fím ne Otu Kyítá mú mu Onet-Onyii.

³ Ké mbwôp kashú, ben ba-man ba-nyît ba/fu, banet bakíri ba/chi ba-byí ké bankuli kyikû-ací ḿbé akpen ebe a/firi ké busa ḿbú babép ebe. Ba/chi ba-fát běn kiikuku,

⁴ ba-kûraa ba/fu, ná nyǐ o/ryí ocím o/fu, nyǐ mu o-bâ. O*da/ryí dí*. Nyǐ mu nyá. Banchí eten baa/kpú nyáá. Nké kángkáng byěm byi/tôong eringe ebónge wǎ eringe kyi/mû kyi/fím ké nkéré mú Osówo o/chi ejíí.

⁵ Mbé ba/tigi otigíng ba-né ochíchí-chwǒm mún mú Osówo o/chi bubóng ne esí ké ejá emen nyí o/raa ké nkéré mú o/shwôm ké esim chwóó. Osówo o/chi esí ké omu, ne e/byí ké omu.

⁶ Ne kyi/mû ké omu to mú buce bu/sú bu-cít ejíí emúmú nké Osówo o/bên ejíí nyí kpákpá.

⁷ Nké ejá ányi ebónge nyí Osówo nké nyi e-tî ng bubóng ne esí nyí nyi něen kántîk, nyí o/chi o-shí kányí ké okwâ. Osówo mu o-tî ng kámbyí byi-ribi dyicí ńdyí nyǐ o/chi o-két mpan o-bên banet ḿbé ba*fí ba-fâ ǎ* ne o-ju kámbé.

⁸ Nké *da n̂g echi ba-ráp chwǒm ńkyín kyibónge* ǎ bacín-dyityém ejí*. Dyicí dyibónge ne égot-aje etánge byi*da/yángê ké bushú ḿbú Otu Kyítá*. Mbyí byifee mbyi eringe ebónge ké bushú ḿbú emen.

⁹ Otu Kyítá o*fí o-dángê e ké chwǒm echi ńkyí nyǐ o/ryí ocím o/fu, nyǐ o-chi i* wǎ eringe nyí banet bakíri mbe ba-kabe ng*. Nké nyǐ mu dyityém chee ne ben, ké nǎ, nyǐ o*fí o-ryuu ng o/fu, o-ju ng onet nang obónge*. Nké mu o-ryuu ng o/fu, kángkáng banet byiko byikpú kámbé, ba-mîng byibî ebe.

¹⁰ Nké Dyicí ńdyí Otu Kyítá dyi/chi dyi-bâ wǎ onet-kajii. Ké Dyicí ándyi, bubóng bu/chi bu-rím ne kiimbâng-kyirime. Byěm ḿbyí ké bubóng byi/chi byi-shí, byi-bên, ne esí ne kángkáng byěm ḿbyí mbyi ké nyǐ byi/chi byi-rím.

¹¹ Ké Osówo o/chi o-bên kángkáng byěm ḿbyín ké dyizong-bukwóp ḿbún, ebóng dyizong-banet ńdyí ben badakyú. Akpen enen a-man a-kyú kanong, ne a-man a-chi ńkyí nkyi kyi-nyîn n Osówo

¹² ké nkéré bamu ba-bwom m Dyicí ńdyí Osówo, ne kan n̂ byiko enen ḿbyí badachi kándyí dyi-bâ abeabe, Dyicí ńdyí Osówo o/chi o-shí bubóng o-bên kámbú, ne kiinsóngé ánkyi kyi/chi kyi-nyange byěm ḿbyí mbyi kyíbóng.

¹³ Nké be byimu byi-bám m bubóng ḿbú bufyîfî ne esí nyí efyîfî ḿbyí kanong echi kadakyú, ḿbyí Osówo oo/ryí ocím.

¹⁴ Ké bubwô ámbu, ǎ bacín ejí, wǎ eringe nyí bamu ba-bám m Dyicí ándyi, kan n̂ byiko enen ba-kyú kpárám, baa*kyú ne ébîn ké bushú ḿbú Osówo* ne ba-kyú to ké bunyîn-dyityém ne nyǐ.

¹⁵ Atyém enen akyú ké dyityém chee ńdyí Otu Kyítá wǎ mpât mú nyǐ mu o-kyâ běn, mú Osówo oda běn enyii, wǎ eringe nyí Pôl mú wǎn-boné eten mú dyityém o/sáng o-kye běn ké bubong ḿbú Osówo o/kye ǎ.

¹⁶ Ńkyín nké nyǐ mu o-sét ng ké kángkáng baléta emen, ké nkéré mú o-kú o-sáng ng kyi-kim ne nkyí. Byěm byikíri mbyi kô ké baléta emen ḿbyí mbyi byi-sóng ng, ḿbyí banet ḿbé mbe buubuu ḿbé baa*nyît chwǒm* mbe ba-sét ng kyikû ńkyí kyi*fí ntûntû* wǎ eringe nyí mbe ba-chi i ké byicê-nwet byikíri ḿbyí ké ejá-Osówo nyí ba/sáng kyísí. Ké bubwô ámbu, mbé mbe ba-bâ ne bukyû ké byiko ebe.

¹⁷ Nké ben bacín ejí baa/nyît ńkyín kyikû ké esim. Bám m̂ byiko enen kâng, eringe nyí byisédéng ḿbyí banet ḿbé ba*fí ba-tî ng byije* bii*ba/chi byi-chi běn ba-róng ba-pín esim ba-mîng kyikit enen ńkyí kyinong ńkyí ba/bwom*.

¹⁸ Nké kan n̂ ba-ca kashú ké ochwâp mú Osówo ne ké Jisos Karâs enyît mú mu Otu Kyítá eten ne Onet-Onyii eten. Busan ḿbú ragerage bukyú ne nyǐ kántîk, ne dyicí ńdyí nkéré mú ne banyá o/chi o-byí. Kyi/bát kyikyú éné.