2 Pyíta 1 - Bokyi Bible

¹ Me Sámon Pyíta mú mu ḿgbán ne onet-kyitwóm-Jisos Karâs nké mu n-sáng ng n-kye banet ḿbé ké bubwô-mpan mú Osówo eten ne Onet-Onyii eten Jisos Karâs o/két o-nwa kámbé, oo/kye kámbé dyityém efé ne nyǐ ńdyí ndyi kanong wǎ ńdyí eten.

² Kyi/bát ochwâp mú Osówo ne bunyîn-dyityém byijê běn kerededet ké bubwô ḿbú bamu ba-nyît ng Osówo ne Jisos, Otu Kyítá eten.

Osówo o/kó Běn o-cá Běn

³ Busa ḿbú Osówo boo/kye bě kángkáng byěm ḿbyí byimu byi-ryuu ng ké dyikpen ńdyí dyidanyîn Osówo ekyú, ké bubwô ḿbú be byimu byi-nyît ng nyǐ mú o/kó bě o/fu, be byida-kyú ké busan emen ḿbú ragerage ne ké kanong emen.

⁴ Ké bukwóp ḿbún, nyǐ oo/kye bě ochíchí-kiǐtí-eyáré nyí nyǐ o/ryí ocím, eringe ké bubwô-eyáré ńnyín, ben ba/chi ba-fem ké kyibî-édúú ńkyí nkyi ké ejíí ńnyín, ńkyí kyi/fím ké byěm eryuu, ba-firi wǎ Osówo oyén.

⁵ Ké bubwô ḿbún, kan n̂ byiko enen, eringe nyí badasû kanong echi ké dyityém enen ńdyí ba/fé ne Osówo, eringe nyí badasû byinyídíng ké kanong echi,

⁶ eringe nyí badasû byiko enen ekám ké byinyídíng, eringe nyí badasû dyityém ecíp ké byiko enen ekám, eringe nyí badasû dyikpen ńdyí dyidanyîn Osówo ekyú ké dyityém ecíp,

⁷ eringe nyí badasû kyijé ńkyí wǎn-boné ké dyikpen ńdyí dyidanyîn Osówo ekyú, ne eringe nyí badasû kyijé ké kyijé ńkyí wǎn-boné.

⁸ Ḿbyín nké mbyi byěm ḿbyí badaryuu, ne â ben bamu ne mbyí chwóó, byi/chi byi-chi běn ba-firi kanong ne busa ké Jisos Karâs, Otu Kyítá eten enyît.

⁹ Nké nang yeě mú o*fí ne mbyí* onet ámu oo*rángê* ké ebóng, oo*ri chwǒm ńkyí tete* ne oo/ráp to o/fu, byibî emen ḿbyí kpákpá Osówo oo/soo kámbyí.

¹⁰ Ké bubwô ámbu kâng, ǎ bwǎn-bané ejí, kan n̂ ba-shwôm oshwǒm, eringe nyí badabwom kíngkíng ké dyikô ńdyí Osówo o/kó běn ne ocâ emen mú o/cá běn. Ké ebóng, â bamu ba-chi i éné, baa*ba/chi ba-róng*.

¹¹ Ké bukwóp ḿbún, Osówo o/chi o-kye běn busa bumúmú ḿbú badanung ké Butu ḿbú ne banyá, ḿbú Jisos Karâs, Otu Kyítá eten ne Onet-Onyii eten.

¹² Ké bubwô ḿbún, me n-kû ng běn ezîim kángkáng nkéré kyi-kim ne byěm ḿbyín, nang ké ben baa/nyît kámbyí, ne baa/bwom kíngkíng ké ntûntû mú ben baa/koo.

¹³ Me n/kabe n/fu, nkyi mě kiǐtí-chwǒm ńkyí nda běn echi ba-zîim byěm ḿbyín, â me n/tôong m-kpen n n-câ kashú.

¹⁴ Ké ebóng, me mu n-nyît ng n/fu, me n/chi m-pii kiintaa-enyam-byiko ńkyín kántîk n-twóp wǎ eringe Jisos Karâs, Otu Kyítá eten o/sét mě wááng.

¹⁵ M-man n-kan ké busa ejí kâng n-kyé bukwóp n-tî běn ḿbú badakûzîim byěm ḿbyín kángkáng nkéré, ké nkéré me mm/kpú.

Banet ḿbé ba/ri Busan ḿbú Karâs ḿbú Ragerage

¹⁶ Ké nǎ, be byi*da/kúng biǐshwô ḿbyí banet ḿbé kpákpá ba/rim ne mbyí ne byi-kû běn echi ba-nyît kyi-kim ne kiǐtí-obyî mú Jisos Karâs, Otu Kyítá eten*. Be byi/ri busan emen ḿbú ragerage ké achi eten.

¹⁷ Be byi/mû ányi ké nkéré mú Osówo Bonchí o/kye ǎ ofê ne kiǐtí-busan kyiyén ńkyí ragerage, ké nkéré ejá e/fím ké kiǐtí-busan kyiyén ńkyí ragerage e-kâm ǎ, e-raa e/fu, nyín něen, Wǎn ejí mú dyityém, mú nkyi kyi-nyîn n mě kanong kanong ne nyǐ.

¹⁸ Be bayén byi/jwo ejá ńnyín, nyí e/fím kyíbóng ké nkéré byi/mû ne nyǐ ké kaku ńké ka/já Osówo.

¹⁹ Ké bubwô ámbu kâng, be byimu dyityém dyibónge byi-shwôm oshwǒm ké kyitwóm ńkyí bamkpábé ḿbé badasét byiraa-Osówo ba/sét. Ben ba/chi ba-chi kanong ńkyí ben badafwôo atông ké nkyí, ké nǎ, kyitwóm ánkyi nkyi wǎ otyuryíkáng mú mu o-san n ké kyikit-kyifip tete Dyicí dyi-cé, ne kiinwángé-ókpére-dyicófóróng kyi-san běn ké atyém.

²⁰ Zîim m̂ kâng ńkyín ba-shwôm kángkáng byěm ba/fu, onet o*fí mú odaman esét ké busa ḿbú emen nyǐ oyén kyikû ne dyishí-chwǒm ńkyí mkpábé mú odasét byiraa-Osówo o/sét ké ejá-Osówo nyí ba/sáng kyísí*.

²¹ Ké ebóng, kyitwóm nang kyibónge kyi*fí ńkyí mkpábé-Osówo o/sét ńkyí kyi/fím ké okabe mú onet*. Nké Busun-Osówo nké bu/kúng banet ámbe ké nkéré mú ba/sét kyitwóm ńkyí kyi/fím ne Osówo.