2 Kyîng 9 - Bokyi Bible

Ba/kúng Jéhu Otu mú Ézerel

¹ Ké nkéré ámu, Elásha mú mkpábé mú odasét byiraa-Osówo o/kó mkpábé obónge mú o/tôong kyisat, o-sét ǎ o/fu, kpá byiko a-ca Rímot, ké Gyílet. Kúng kaatyu-bakút-ólif ńkén a-ca ne nké,

² ne â a/ribi áku, kyé Jéhu mú wǎn-Otu Jehósháfat, mú bonchí-bonchí emen o/mû o-bángê e Nyímishi. Kúng ǎ a-ca ne nyǐ ké nfût mú banet ba*fí* eringe nyí bábe baa*ri ǎ*.

³ Pwó ǎ bakút-ólif ḿbén ké dyishí, a-sét ǎ a/fu, Óburúkpâbí o/sét o/fu, nyǐ oo/chi ǒ a-firi otu mú Ézerel. Â a/chi éné, dim a-bwa esim ochéé óchee.

⁴ Ne mkpábé mú wǎsíng ámu o-dim o-wâa Rímot,

⁵ o-da-kâm banet-ashí-basúja ké baa/kyú ké ncibi. O-raa o/fu, bonchí, mu ǒ ne kyitwóm. Jéhu o-bí ǎ o/fu, wo a/raa ne yeě ké burwám eten. Nyǐ o-faa ǎ o/fu, wo, ǎ bonchí.

⁶ Ne mbé ashí afee ba-dim kâng ba-nung ké kafâ-kyise, ne mú wǎsíng-mkpábé ámu o-yip bakút-ólif ámbe o-pwó ǎ ké dyishí, o-sét ǎ o/fu, Óburúkpâbí mú mu Osówo mú Ézerel o/sét o/fu, me nn/chi ǒ a-firi otu mú banet ejí ḿbé Ézerel.

⁷ Wo a-man a-ju otu mú mu bonchí eyên, mú wǎn-Otu Éhap, eringe nyí ndakye Jézébel busông ḿbú o/ju bamkpábé ḿbé badasét byiraa ejí ne bǎmgbán ejí bakíri.

⁸ Kángkáng kyikû-banet ńkyí Otu Éhap ne bwǎn emen ba-man ba-kpú. M-man n-ju wǎn-onyinchéng nang orá ké kyikû emen, nang wǎsíng nang okínkán.

⁹ N/chi n-chi kyikû-banet emen wǎ eringe nyí n/chi byikû-banet ḿbyí Otu Jérobâm mú Ézerel ne Otu Básha mú Ézerel.

¹⁰ Baa*ba/chi ba-ryii Jézébel*. Bubyî bu/chi bu-ryí kyikwóm-enyam-byiko emen ké kyikim-esí ńkyí Jézerel. Ké nkéré mú oo/sét ǎ éné, mú wǎsíng-mkpábé ámu o-byí ké kafâ-kyise o-chêe.

¹¹ Jéhu o-bwa esim o-kâm bábe-banet-ashí-basúja, ḿbé ba/bí ǎ ba/fu, kángkáng byěm mbyi kanong dí. Onet-kyifún ámu mu o-ryuu ng ebóng ne wo. Jéhu o-faa kámbé o/fu, ben bamu ba-nyît ng ńkyí mu o-ryuu ng.

¹² Mbé ba-faa ǎ ba/fu, be byi*fí byi-nyît ng*. Sét bě ńkyí o/fu. Jéhu o-faa o/fu, nyǐ o/sét mě o/fu, Óburúkpâbí o/sét o/fu, me nn/chi ǒ otu mú Ézerel.

¹³ Ké abe ányi, bábe-banet-ashí-basúja ba-tát byídí ebe ké kiǐnyáám-kyikit ba/fu, Jéhu ocím byiká ké mbyí, ne ba-jwá bantán, ba-wonge ba/fu, Jéhu o/firi otu.

Otu Jéhu o/ju Otu Jóram mú Ézerel

^14-15 Ne Otu Jéhu kâng o-nam o/fu, nyǐ o-ju ng Otu Jóram, mú o/mû ké Jézerel, ké kyikit ńkyí o/ce o/fu, basoo ǎ byinêm ḿbyí ba/némê ǎ ké byití ḿbyí ké Rímot, ḿbyí o/nwa ne Otu Házil mú Syírya. Ne Otu Jéhu o-sét bábe-banet-ashí-basúja o/fu, â ben bamu ne me ké kyikû, *da n̂g echi ba-mîng onet nang obónge o-chêe ké Rímot* o-da-sét banet ḿbé mbe ké Jézerel*.

¹⁶ Ne o-yú ké mútu emen mú bubyî-orá budatut o-dim ḿbú Jézerel. Otu Jóram o/mû o*da/nyange ne* ne Otu Aháza mú Júda o/mû áku o-ri ng ǎ.

¹⁷ Onet-mbâm mú o/mû ké bǎmkpóngé ké kiǐnyáám-kyikit-mbâm ké Jézerel o/ri Otu Jéhu ne banet emen ké mbe ba-bâ, ne o-sét o/fu, me nn/ri banet ké mbe ba-yú u ké bamútu ba-bâ. Otu Jóram o-faa o/fu, twóm onet-kabyî-orá obónge o-da-kyé kyikû â mbe ba-bâ ké bunyîn-dyityém nang ké bushwôn.

¹⁸ Onet-kyitwóm ámu o-yú ké kabyî-orá o-kâm Otu Jéhu o-sét ǎ o/fu, otu mu o-ryuu ng o/fu, nyǐ o-nyît ng â wo amu a-bâ wǎ ocín. Otu Jéhu o-sét ǎ o/fu, ńkyí ánkyi kyi*da ǒ ekim*. Shwôm a-bâ mě ké kyikû. Onet-mbâm mú o/bwom ké kiǐnyáám-kyikit-mbâm o-twóm ejá e-kâm otu o/fu, onet-kyitwóm ámu oo/kâm banet ámbe, nké o*fí o-bwa ng esim*.

¹⁹ Ba-twóm onet-kyitwóm okíri mú o/dabí Otu Jéhu dyizong-ḿbím ándyi dyibónge. Otu Jéhu o-chîfaa o/fu, ńkyí ánkyi kyi*da ǒ ekim*. Shwôm a-bâ mě ké kyikû.

²⁰ Mú onet-mbâm o-chîsét o/fu mú onet-kyitwóm oo/kâm banet ámbe, nké o*fí o-bwa ng esim*. O-chînye o-sét o/fu, onet-dyishí-dyizu-banet ándyi mu o-yú u ké mútu emen o-bâ wǎ onet-kyifún, wǎ Jéhu.

²¹ Otu Jóram o-kye busa o/fu, kpá n̂g byiko ne mútu ejí mú bubyî-orá budatut. Ba-chi éné, ne nyǐ ne Otu Aháza ba-yú ba-dim, nang yeě nang yeě ké mútu mú emen, ba-da-kâm Otu Jéhu. Ba/kâm ǎ ké kyifát ńkyí kyi/mû kyi/já Nábot.

²² Otu Jóram o-bí ǎ o/fu, amu a-bâ ké bunyîn-dyityém dí. Otu Jéhu o-faa ǎ o/fu, bunyîn-dyityém bu-cen n nǎ ne bu-kyú mú be byi/tôong ne bací ne bakye esháng ḿbé Jézébel mú boné eyên o/kpet ne mbyí.

²³ Otu Jóram o-wonge o/fu, oo/bwom bunwa ne be, ǎ Otu Aháza. Ńdyí o/bírî mútu emen o/fu, nyǐ o-chêe ng,

²⁴ Otu Jéhu o/tut búre emen ne busa emen kángkáng o-ché ǎ, dyibán dyi-tím ǎ ké esim dyi-kám ǎ ké dyityém. Otu Jóram o-myii ké kafâ-mútu emen o-kpú.

²⁵ Ne Otu Jéhu o-sét Byídaka mú ókpúrúbíp emen o/fu, fîm kyikwóm-enyam-byiko emen a-twóp ké kyifát-Nábot. Zîim a/fu, ké nkéré mú me ne wo byi/mû byi-yú u byi-bâ Otu Éhap mú bonchí-Otu Jóram ké kyikû, Óburúkpâbí o/raa byiraa ḿbyín kyi-kim ne Otu Éhap o/fu,

²⁶ me n/ri ńdyí ba/ju Nábot ne bwǎn emen kyísóng. Ne n-ryí ocím n/fu, me n/chi n-kye ǒ busông ké kyifát ńkyín. Otu Jéhu o-sét ókpúrúbíp emen o/fu, ké bubwô ámbu, kúng kyikwóm-enyam-byiko ńkyí Otu Jóram a-twóp ké kyifát-Nábot, eringe ńkyí Óburúkpâbí o/sét kyidachi.

Otu Jéhu o/ju Otu Aháza mú Júda

²⁷ Otu Aháza o/ri ńkyí kyi/chi, ne ké bubwô ámbu, o-chêe ké mútu emen mú bubyî-orá budatut o-jâ ḿbú oshê mú Bét-Hágan, Otu Jéhu o-câ ne nyǐ ké kyikû. Otu Jéhu o-sét banet emen o/fu, ju n̂g ǎ to. [Ne ba-némê ǎ] ké nkéré mu o-tut ng mútu emen ké bukwóp ḿbú mbu bu-jâ Gôo, fáráng ne oshê mú Ébyam. Nké nyǐ o/nwa o-zóngê o-ca kashú tete o-ribi oshê mú Megído ne o-kpú.

²⁸ Banet-ashí-bǎmkpóngé emen ba-kúng kyikwóm-enyam-byiko emen ké mútu mú bubyî-orá budatut ba-bâ ne nyǐ ké Jerúsélem ba-ba-ryii ǎ ké akun-batu, ké oshê mú Otu Dívit.

²⁹ Otu Aháza o/mû o/ryí butu ké Júda ńdyí Otu Jóram mú wǎn-Otu Éhap oo/ryí butu ḿbú Ézerel ké aje diǐkpú ne din.

Otu Jéhu o/ju Jézébel

³⁰ Otu Jéhu o/baribi ké Jézerel. Jézébel mú o/mû oo/jwo ńkyí kii/chi, o/sabe bakút ké achi, o-nabe eji emen kanong kanong, o-bwom ké kyibám-butu o-fé bushú ké wíndu mu o-tún n achi ké otyém-oshê.

³¹ Ńdyí Otu Jéhu o/nung ké dyifyi-oshê, Jézébel o-kó ǎ o/fu, Zímiryi mú nju banet, ebóng a/bê nyín.

³² Otu Jéhu o-bírî achi kyíbóng o-bí o/fu, yeě mu ké kyicê ńkyí ejí. Banet-ashí-kyibám-butu ashí afee nang achât ba-tông bushú ké wíndu, ba-ri ǎ.

³³ Ne Otu Jéhu o-sét kámbé o/fu, jê n̂g ǎ o-róng kyísí. Ba-jê ǎ o-róng kyísí, baróng emen ba-myî ké ekpe ne ké bubyî-orá. Otu Jéhu o-yip bubyî-orá ne mútu emen mú bubyî-orá budatut o-yú o-shwôm ké kyikwóm-enyam-byiko emen,

³⁴ o-da-nung ké kyibám-butu, o-ryí byiryíng. Ké nkéré mú oo/ryí byiryíng, o/raa o/fu, kúng n̂g kyikwóm-enyam-onyinyi ámu ba-da-ryii, ké nǎ, o-chi i wǎn-otu.

³⁵ Nké banet ḿbé ba/dim ǎ edakúng ba-ryii ba*da/ri chwǒm kyikíri* kyi-cibi ne kiǐfâa-dyishí emen* ne byikúú emen ḿbyí abwô ne byiká*.

³⁶ Ńdyí ba/bwa esim ba-da-sét Otu Jéhu, nyǐ o/raa o/fu, éné nké Óburúkpâbí o/mû o/sét o/fu, kyi/chi kyi-chi, ké nkéré mú o/raa ké ocím mú Elája mú ḿgbán emen o/fu, bubyî bu/chi bu-ryí kyikwóm-enyam-byiko ńkyí Jézébel ké kyikim-esí ńkyí Jézerel.

³⁷ Enyam emen e/chi e-pwôo ányi byiryibyiryi wǎ abîng, eringe nyí onet oo*ba/chi o-cêe ǎ*.