2 Kyîng 7 - Bokyi Bible

¹ Elásha o-faa otu o/fu, fwôo atông a-jwo ńkyí Óburúkpâbí mu o-sét ng. Ké nkéré mún nencí, wo a-man n ekúng akpuga-syílyíba abónge a-ré bakyílogaram-esang-byichí-wît bachât, nang bakyílogaram-esang-byichí-bályi nyâchât nyín ké Samérya.

² Ókpúrúbíp-otu o-sét Elásha o/fu, ńkyí ánkyi kii*man echi* nang Óburúkpâbí oyén o-bwa o-twóm omu o-na kántîk*. Elásha o-faa ǎ o/fu, wo a/chi a-ri nkéré mú kyi/chi kyi-chi, nké byiryíng ámbyi nang onyin wo aa*ba/chi a-ryí*.

Basúja ḿbé Syírya ba/dim Dyijê

³ Banyinchéng ashí anyii ḿbé ba/mû ba-rwôm m kyibî-orwôm ba/mû ké esim-oshê mú Samérya nyí kyíjí, ne ba-raa ne barî ba/fu, ebóng byidawaa nyín byi-kpú.

⁴ Bukwóp bu*fí ḿbú byidachîbwa esim ké kafâ-oshê ne byi-já ochwâp* ké nǎ, byi-waa ng áku byi-kyú esong. Nké nang byi-bwa byi-kyú nyín byi-kpú u. Ké bubwô ámbu, byidim byi-wâa ké kyikit ńkyí basúja ḿbé Syírya mbe. Â kyi/bên kyi-shwôm, oju nké bada bě eju, nké katô baa*ju bě*.

⁵ Ne ké nkéré kyifip kyi-kú kyi-jîi ng kâng, ba/dim ba-wâa ké kyikit ńkyí basúja ḿbé Syírya mbe. Nké ké nkéré mú ba/ribi áku, nang onet ba*da/ri*.

⁶ Óburúkpâbí oo/chi basúja ḿbé Syírya ba-jwo kyicoge éné wǎ bujê-basúja nké mbe ba-bâ ne bubyî-orá ne bamútu ḿbé bubyî-orá budatut, ne basúja ḿbé Syírya ba-kabe ba/fu, otu mú Ézerel oo/yámê batu ḿbé Hyítat ne [Éjip] ne basúja ebe o/fu, baba-nwa ne mbé.

⁷ Ké bubwô ámbu, ké dyikurúku ándyi, banet ḿbé Syírya ba/chêe, ba-mîng bampyep-byití ebe ne bubyî-orá ne boonyam-atû ebe, ba-mîng kyikit ánkyi wǎ eringe nyí kyi/mû kpákpá.

⁸ Ké nkéré mú banyinchéng ámbe ashí anyii ba/ribi ké bukô-bampyep ámbe, ba-da-nung ké mpyep obónge, ba-ryí byiryíng ba-jwáp bato ḿbé ba/ri ányi, ba-wuri syílyíba ne gûl ne byídí ḿbyí ba/ri, ba-yip kámbyí ba-da-rôo. Ba-bwa esim ba-da-nung ké mpyep okíri ba-chi eringe ebónge.

⁹ Nké ba/waa ányi ba-raa ne barî ba/fu, kii*nwa ńkyí byidachi něen*. Be byimu ne chwǒm ńkyí kyinong ńkyí byidasét. Kii*nwa ńkyí kyidawaa ne be nké nke*. Â byi/mîng dyicófóróng dyi-cé ne byi-sét, ba-man ba-kye bě busông. Byidim kâng kántîk byi-da-sét banet-ashí-bǎmkpóngé-kyibám-otu.

¹⁰ Ne ba-dim kâng ké kyikit ńkyí banet-Syírya ba/mû ba-kyú u, ba-bwa esim ké Samérya, ba-kó banet ḿbé ba/mû ba-bám m afyi-oshê, ba-sét kámbé ba/fu, be byi/ce ké kyikit ńkyí basúja ḿbé Syírya ba/mû ba-kyú u, nang onet ké achi byi*da/ri* nang ké atông byi*da/jwo*. Bubyî-orá ne boonyam-atû bu/tôong ányi tútú, ne boompyep bu/tôong wǎ eringe nyí banet ḿbé Syírya ba/dim ba-mîng kámbú.

¹¹ Bambâm afyi-oshê ba-kúng kiǐshwô ánkyi ba-sét ké oshê, ne ba-yip kánkyí ba-da-sét ké kyibám-otu.

¹² Kyi/mû kyi/tôong buchú, nké otu o/bûu ké karíng emen o-kó banet-ashí-basúja emen o/fu, me n/chi n-sét běn ńkyí banet ḿbé Syírya mbe ba-nam m. Mbé mbe ba-nyît ng kyi-kim ne esong nyí e/róng nyín, ké bubwô ámbu, ba/mîng bampyep ebe ba-da-rem ké bakô. Mbe ba-kabe ng ba/fu, be byi/chi byi-mîng oshê byi-dim byiryíng edakyé, ne ké bubwô ámbu, mbé ba/chi ba-kám bě okpó, ba-koo oshê eten. [

¹³ Onet-dyishí-basúja emen obónge o-sét ǎ o/fu, banet ḿbé mbe nyín ké oshê baa/kpú okpúng, wǎ banet ḿbé baa/kpú. Ké bubwô ámbu, mîng byi-twóm kyicê-banet ne bubyî-orá butánge ḿbú bu/waa, eringe nyí byidanyît ńkyí kii/chi.]

¹⁴ Ba-cá kyicê-banet, ne otu o-twóm kámbé ké bamútu bafee ḿbé bubyî-orá budatut, o-sét kámbé o/fu, baca ba-da-kyé kyikû kyi-kim ne ńkyí kii/chi basúja ḿbé Syírya.

¹⁵ Banyinchéng ámbe ba/cen tete ba-ribi ké Jódan, ne ké bukwóp bumúmú ḿbú mbe ba-cen n ba-câ, ba/ri byídí ne byěm-byití ḿbyí banet-Syírya ba/pwó ńdyí mbe ba-chêe ng. Ne ba-bwa esim kâng ba-da-sét otu.

¹⁶ Banet ḿbé Samérya ba-zóngê ba-da-wuri byěm ké bampyep ḿbé banet-Syírya ba/mû ba-kyú u. Ne wǎ eringe nyí Óburúkpâbí o/mû oo/sét, ba/kúng bakyílogaram-esang-byichí-wît bachât ḿbé banong banong ne bakyílogaram-esang-byichí-bályi ḿbé banong banong nyâchât ba-shee ké akpuga-syílyíba abónge.

¹⁷ Otu mú Ézerel o/mû o/kúng ókpúrúbíp emen o-tî wǎ onet-dyishí mú bambâm dyifyi-oshê. Ba-cím ókpúrúbíp emen ámu ányi ké byiká ba-ju, wǎ eringe nyí Elásha o/mû o/sét ńdyí otu o/ce ǎ edari.

¹⁸ Elásha o/mû o/sét otu o/fu, ké nkéré mún ké orî-dyicí, bakyílogaram-esang-byichí-wît ḿbé banong banong bachât ne bakyílogaram-esang-byichí-bályi ḿbé banong banong nyâchât ba/chi ba-shee ké akpuga-syílyíba abónge ké Samérya,

¹⁹ ne ókpúrúbíp-otu ámu o-faa o/fu, ńkyí ánkyi kii*chi* nang Óburúkpâbí oyén o-twóm omu o-na kántîk*. Ne Elásha o/mû o/faa ǎ o/fu, wo a/chi a-ri ké nkéré mú kyi/chi kyi-chi, nké wo aa*ba/chi a-ryí byiryíng ámbyi nang byibónge*.

²⁰ Ne eringe ányi nké kyi/chi ǎ. O/kpú, ké nǎ, banet ḿbé mbe ba-shwôm m ké ocím-dyifyi-oshê ba/cím ǎ ké byiká ba-ju.