2 Kyîng 6 - Bokyi Bible

Ba/ri Dyikye ńdyí dyi/tánê

¹ Dyicí dyibónge, bamkpábé ḿbé badasét byiraa-Osówo, ḿbé Elásha o/mû kámbé onet-dyishí, ba/sét Elásha ba/fu, kyikit ńkyí byimu byi-kyú u kyi/sîi kyi-shwôm.

² Kye bě busa byi-ca ké Jódan byi-da-két byichí eringe byidaman ebi kyikit ńkyí byidakyú. Elásha o-sét kámbé o/fu, baca.

³ Onet obónge ké burwám ebe o-tírîng ǎ o/fu, oca ne mbé ké kyikû, ne Elásha o-bángê,

⁴ ne ba-dim burwám. Ńdyí ba/ribi ké Jódan, ba/kpet bǎmkpóngé echi.

⁵ Ńdyí onet obónge mu o-twom m kyichí, dyikye emen dyi/zûu dyi-róng ké kafâ-kace. Onet ámu o-wonge o-sét Elásha o/fu, bonchí, me n-chi i nǎ. Dyikye ńdyín m/pwoo ne onet.

⁶ Elásha o-bí ǎ o/fu, dyi/róng nyá. Onyinchéng ámu o-tông ǎ kyikit ánkyi. Elásha o-két kyichí o-twóp ké kafâ-kace, dyikye ándyi dyi-byí dyi-kpet esen kyíbóng taa.

⁷ Elásha o-sét ǎ o/fu, fîm kándyí. Ne onyinchéng ámu o-siring kyísí o-fîm kándyí.

Ba/kpógê Basúja ḿbé Syírya

⁸ Otu mú Syírya o/nwa byití ne Ézerel. O-tóbê ne banet-ashí-basúja emen, ne o-cá kyikit ńkyí badabi bampyep-byití emen.

⁹ Nké Elásha o/twóm ejá e-kâm otu mú Ézerel o-nyibi ǎ butông o/fu, o*dachi o-ca o-fárâng kyikit ánkyi* ké nǎ, banet ḿbé Syírya baa/ját kámbé ányi.

¹⁰ Ne otu mú Ézerel o-kuri kâng banet ḿbé mbe ba-kyú u ányi ekó, ba-bwom ba-kûbám. Ńkyín kyi/chi kampén kampén.

¹¹ Kafâ ka-bírî otu mú Syírya kanong kanong ké dyizong-chwǒm ándyi, ne o-kó banet-ashí-basúja emen, o-bí kámbé o/fu, yeě ké burwám enen mu ké kyicê ńkyí otu mú Ézerel.

¹² Onet obónge ké burwám ebe o-faa o/fu, átá-otu, nang onet obónge o*fí*. Elásha mú mkpábé mú odasét byiraa-Osówo mu o-sét ng otu mú Ézerel ńkyí wo amu a-raa ng, nang a/bwa a-kyú ké kafâ-nfût eyên.

¹³ Otu o-kye busa o/fu, kyé n̂g kyikit ńkyí mu, n-kám ǎ. Ké nkéré mú ba/sét ǎ ba/fu, Elásha mu ké Dótan,

¹⁴ nyǐ o/twóm bujê-basúja chwóó ne bubyî-orá ne bamútu ḿbé bubyî-orá budatut. Ba-da-ribi ké oshê ámu ne buchú, ba-wâng kámú.

¹⁵ Ké orî-dyicófóróng pirípirí, ḿgbán-Elásha o/jwóbê o-byí kyíjí o-da-ri basúja ḿbé Syírya ne bubyî-orá ebe ne bamútu ḿbé bubyî-orá budatut ké baa/wâng oshê. O-bwa esim o-kâm Elásha, o-da-sét ǎ o/fu, bonchí bii/kpú. Be byi-chi i nǎ.

¹⁶ Elásha o-sét ǎ o/fu, *dachi a-shî*. Banet ḿbé mbe ké kyicê ńkyí eten ba/jê ba-shwôm ḿbé mbe ké ńkyí ebe.

¹⁷ Ne o-fé nshwam kâng o/fu, ô Óburúkpâbí, bâa ǎ achi, a-mîng ǎ o-ri. Óburúkpâbí o-jwo nshwam emen, ne ḿgbán-Elásha o-bírî achi o-ri ké kaku kamúmú kaa/sú ne bubyî-orá-okwâ ne bamútu-okwâ ḿbé bubyî-orá badatut, ké boo/wâng Elásha bu-fé ké otyém.

¹⁸ Ké nkéré mú banet ḿbé Syírya ba/kye bunwa, Elásha o/fé nshwam o/fu, ô Óburúkpâbí, sé basúja ḿbén achi. Óburúkpâbí o/jwo nshwam emen, o-sé kámbé achi.

¹⁹ Ne Elásha o-dim kâng o-kâm kámbé, o-raa ne mbé o/fu, ben baa/mume kiǐfáng. *Chí oshê mún nké bamu ba-kyé ng*. Bâ n̂g ne me ké kyikû, me n/chi n-tông běn onet mú bamu ba-kyé ng. Ne o-kúng kámbé o-ribi ne mbé Samérya.

²⁰ Ńdyí ba-nung ng ké oshê ba-bâ, Elásha o/fé nshwam o/fu, Óburúkpâbí, bâa kámbé achi ba-ri. Óburúkpâbí o-jwo nshwam emen, o-bâa kámbé achi, ne mbé ba-ri ba/fu, mbé baa/nung ké kafâ-Samérya.

²¹ Ké nkéré mú otu mú Ézerel o/ri basúja ḿbé Syírya, o-bí Elásha o/fu, bonchí, nju kámbé dí.

²² Elásha o-faa ǎ o/fu, aa*wááng*. Nang basúja ḿbé a/kám kámbé ńdyí bamu ba-nwa ng byití, aa*ju kámbé*. Kye kámbé chwǒm ba-ryí ne bato ba-jwáp, a-mîng kámbé ba-bwa esim ba-kâm otu ebe.

²³ Ne otu mú Ézerel o-chi kámbé kâng kiǐtí-dyijî. Ké nkéré mú baa/ryí byiryíng, ba-jwáp bato, o-twóm kámbé ba-bwa esim ba-kâm otu mú Syírya. Kyi-fím ké dyicí ándyi kyi-ca kashú, banet ḿbé Syírya ba/mîng ekye banet ḿbé Ézerel bunwa.

Otu-Syírya o/kye Samérya Bunwa

²⁴ Ké nkéré mú kaa/rí, Otu Benhádat mú Syírya o/kúng kángkáng basúja emen o-ba-wâng Samérya.

²⁵ Ké owâng mú ba/wâng oshê éné, byiryíng byi/kaa ké oshê, ḿbyí ba-kú ba-shee ng dyishí-kaanyam-atû ké bajam-akpuga-syílyíba banyii, ne égot-bagarâm-abîng-kanurung ebónge e/mû e-ryí i akpuga-syílyíba atánge.

²⁶ Otu mú Ézerel o/mû mu o-cen n o-shwôm m kyíbóng-ekpe-oshê, ne onyinyi obónge o-wonge o-kó ǎ o/fu, átá-otu, chwáp mě.

²⁷ Nyǐ o-faa ǎ o/fu, â Óburúkpâbí o*fí o-chwáp ng ǒ* ebóng ochwâp mú me nda ǒ ekye. Me mu ne esang-byichí aa, aa bato?

²⁸ Ebóng nkyi afaníkong eyên. Mú onyinyi ámu o-faa ǎ o/fu, dyicí ńdyí áku, onyinyi mún o/sét mě o/fu, be byiryí wǎn mú ejí, ké orî-dyicí, byiryí mú emen.

²⁹ Ké bubwô ámbu, byi/rám wǎn ejí byi-ryí. Ké orî-dyicí, me n/sét ǎ n/fu, obâ ne wǎn emen byi-ryí, nké oo/kúng ǎ o-rôo.

³⁰ Ńdyí otu o/jwo ńkyín, byiko byi/kaa ǎ, o-ját byídí emen ké byiko, ne banet ḿbé ba/mû ba/bwom fáráng ba-ri ba/fu, otu o/mû o/bwá byídí-dyikán eta ké kafâ.

³¹ O-raa o/fu, Osówo oju mě, â ba*da/fîm Elásha dyishí ne buchú bu-jí*.

³² Ne o-twóm o/fu, bakó Elásha. Ké nkéré ámu, Elásha o/mû ké kyise emen ne ḿbé bakínkán ḿbé ba/ce ǎ edari. Ne onet mú otu o/twóm ǎ o-ribi áku, Elásha o/sét ḿbé bakínkán ámbe o/fu, nju banet ámu oo/twóm onet o/fu, oba-ju mě. Â o/ribi nyín, fín n̂ dyifyi, *da n̂g ǎ ebángê o-nung*. Otu oyén mu o-bâ ǎ ké kyikû.

³³ Nang ejá e*da/róng kyísí* [otu] o/baribi, o-raa o/fu, Óburúkpâbí nké oo/bê bě ne afaníkong ńnyín. Me n-cen n nǎ ne n-chî ǎ ebám n/fu, ochi chwǒm.