2 Kyîng 5 - Bokyi Bible

Elásha o/chi Orwôm mú Náman o-man

¹ Náman mú o/mû onet-dyishí-basúja ḿbé Syírya o/mû onet mú o/mû o-nyîn n otu mú Syírya, ne o/mû o-kyâ ǎ ofê, ké nǎ, ké bubwô ḿbú Náman nké Óburúkpâbí o/chi banet ḿbé Syírya ba-kpógê byití. Nyǐ o/mû kiǐtí-súja, nké o/mû o-rwôm m kyibî-orwôm.

² Ké byití ebe byibónge ḿbyí ba/nwa ne Ézerel, banet ḿbé Syírya ba/kám kaǎwán-onyinyi-Ézerel obónge mú o/bírî o-firi ḿgbán mú onyi-Náman.

³ Dyicí dyibónge, mú wǎn-onyinyi o/raa ne boné-kyise emen o/fu, kyi/mû kyi/chi kyi-nwa ńkyí bonchí ejí odace kyikit-mkpábé mú odasét byiraa-osówo, mú mu o-kyú u ké Samérya. O-man n ǎ echi orwôm emen o-man.

⁴ Ké nkéré mú Náman o/jwo kánkyí, o/dim o-kâm otu ebe, o-da-sét ǎ ńkyí mú wǎn-onyinyi o/fu.

⁵ Otu o-sét ǎ o/fu, ca a-kâm otu mú Ézerel, a-koo léta mún a-kye ǎ. Ne Náman o-dim kâng, o-kúng égot-akpuga-basyílyíba etánge etánge ké byikit bujam esim diǐkpú ne égot-akpuga-gûl bujam esim diǐkpú ne agat-byídí nyí anong anong diǐkpú.

⁶ Léta mú o/kúng o-ca ne mǔ o/mû něen. O/fu, â a/ri léta mún a/chi a-nyît onet-dyishí-basúja ejí mú odabángê Náman. Me mu mu n-ryuu ng n/fu, wo achi ǎ orwôm emen o-man.

⁷ Ké nkéré mú otu mú Ézerel o/kó léta ámu, byiko byi/kaa ǎ, a-ját byídí emen ké byiko, o-raa o/fu, otu mú Syírya o-cen n nǎ ne o-sét mě o/fu, me nchi onyinchéng mún o-nyange. Nyǐ o/kabe o/fu, me n-chi i [Osówo] mú mu ne busa ḿbú dyikpen ne bukyû? Nkyi wááng kyi/fu, o-kú o-kan n eringe nyí odakpet bushwôn ne me.

⁸ Ké nkéré mú Elásha mú mkpábé mú odasét byiraa-Osówo o/jwo kyi-kim ne nkyí, o/twóm ejá e-kâm otu, o-sét ǎ o/fu, ebóng ofong mu o-két ng ǒ. Twóm onyinchéng ámu o-bâ oshê ejí, ne me n/chi n-tông ǎ n/fu, mkpábé mú odasét byiraa-Osówo mu kô ké Ézerel.

⁹ Ne Náman o-dim kâng ne bubyî-orá emen ne mútu emen mú bubyî-orá budatut o-da-bwom ké ocím-dyifyi-kyise ńkyí Elásha.

¹⁰ Elásha o-twóm ḿgbán emen obónge o/fu, oda-sét ǎ o-da-kôo omu kampén káchâtkányi ké kace ńké Jódan ne orwôm emen o/chi o-man.

¹¹ Nké Náman o/dim ké busa-dyityém o-raa o/fu, me m/mû n/kabe n/fu, onyinchéng ámu o/mû o/chi o-byí o-kâm mě, o-fé nshwam o-kye Osówo Óburúkpâbí emen, o-tare abwô emen [ké kyikit ńkyí orwôm mu mě ké byiko,] ne o-chi mě n-nyange.

¹² Kace ńké Abána ne Fápa bu*fí áku ké Damásákus*? ḿbú bu/nwa bu-shwôm kace nang kará ké Ézerel*? Něen m/mû nn/kôo omu ké mbú n-nyange.

¹³ Bǎmgbán-Náman ba-dim ba-kâm ǎ, ba-raa ne nyǐ ba/fu, bonchí, â mkpábé mú odasét byiraa-Osówo ámu o/mû o/sét ǒ o/fu, wo achi chwǒm ńkyí kyidasóng, a/mû a/chi a-chi kánkyí. Kántîk, ebóng wo aa*kôo omu eringe nyí o/sét ǒ* a-nyange*.

¹⁴ Ne Náman o-dim kâng ké Jódan, o-da-ríbî ké kafâ-kace kampén káchâtkányi wǎ eringe nyí Elásha o/mû o/sét ǎ, ne orwôm emen o-man. Enyam-byiko emen e-firi shwaneshwane kanong kanong wǎ nyí kaǎwásíng.

¹⁵ O-bwa esim-kyikit-Elásha ne kángkáng banet emen, o-sét ǎ o/fu, me nn/nyît kántîk n/fu, Osówo okíri o*fí to* kyi-cibi ne Osówo mú Ézerel*. Ké bubwô ámbu, ǎ bonchí, koo eyáré ké abwô ejí.

¹⁶ Elásha o-faa ǎ o/fu, ké bubwô ḿbú Óburúkpâbí mú mu okpó, mú me mu n-fâ ǎ, me n/sem n/fu, nn*koo eyáré nang ebónge*. Náman o-tú dyishí o/fu, okoo, nké nyǐ o/né.

¹⁷ Ne Náman o-sét ǎ kâng o/fu, â a/fu, wo aa*koo eyáré ejí* mîng mě m-kpere ecing nyí bubyî-orá bufee budatû n-jâ ne nyǐ oshê ejí, ké nǎ, kyi-fím kurún kyi-jâ kashú me mm*ba/chi n-chîchi byifen* nang ḿbyí badashí oshǐng* n-kye osówo okíri* kyi-cibi ne Óburúkpâbí*.

¹⁸ Ké bubwô ámbu, me n/kabe n/fu, Óburúkpâbí o/chi o-pwoo mě, â n/dim ne otu ejí ké kyikû byi-ca ké kyise-kyifen echi ńkyí Ryíman mú mu osówo mú Syírya byi-da-kye ǎ ofê. Ké ntûntû, Óburúkpâbí o/chi o-pwoo mě.

¹⁹ Elásha o-sét ǎ o/fu, ca dyijê ké bunyîn-dyityém, ne Náman o-dim. Náman o*da/cen o-tíbî*

²⁰ ne Geháze mú ḿgbán-Elásha o-raa ne byiko emen o/fu, bonchí ejí oo/mîng Náman o-dim, nang kaǎchwóm o*da/kye*. O/mû o/chi o-koo ńkyí onet-Syírya ámu o/kye ǎ. Ké dyizîn ńdyí Óburúkpâbí mú mu okpó, n/chi n-zóngê n-kâm onyinchéng ámu n-da-koo chwǒm ne nyǐ.

²¹ Ne o-dim kâng ne Náman ké kyikû. Ké nkéré mú Náman o/ri ké onet mu o-zóngê e o-bâ ǎ ké kyikû, nyǐ o/shû ké mútu emen mú bubyî-orá budatut, o/fu, nyǐ o-kâm m ǎ, o-bí ǎ o/fu, chwǒm kii/róng dí.

²² Geháze o-faa o/fu, aa*wááng*. Nké bonchí ejí nké o/twóm mě o/fu, me nsét ǒ n/fu, bamkpábé bafee ḿbé mbe ké burwám-bamkpábé ḿbé badasét byiraa-Osówo baa/fím ké esí-eku éku nyí Éferem ba-ribi kántîk, ne nyǐ mu o-ryuu ng o/fu, wo akye kámbé égot-akpuga-basyílyíba onyiryiká ne agat-byídí nyí anong anong afee.

²³ Náman o-sét ǎ o/fu, kamgbe, koo égot-akpuga-basyílyíba bujam esim diǐkpú. Náman o-chî ǎ esét o/fu, o-man o-koo éné, ne o-yip syílyíba ámu o-bwá ké biimbam byifee, o-kúng kányí ne agat-byídí ányi nyí anong anong afee o-kye bǎmgbán emen ashí afee o/fu, batû, Geháze o-câ kámbé ké kyikû.

²⁴ Ké nkéré mú ba/ribi ké kaku ńké Elásha o/mû o-kyú u, Geháze o-koo biimbam ámbyi byifee o-da-tî ké kyise. O-twóm bǎmgbán-Náman ba-bwa esim.

²⁵ O-bwa esim o-da-nung ké kyise, ne Elásha o-bí ǎ o/fu, wo a/mû nyá. Nyǐ o-faa o/fu, bonchí, me n*da/ce nang kyikit*.

²⁶ Nké Elásha o/sét ǎ o/fu, busun ejí bu/mû bu*fí ányi ńdyí onyinchéng ámu o/shû ké mútu emen mú bubyî-orá budatut o-kâm ǒ? Ńnyín *chí nkéré mú badakoo akpuga* ne byídí* ne byifát-byichí-ólif* ne byifát-byirim-byichí* ne ebû* ne bampong* ne bǎmgbán*.

²⁷ Kántîk, orwôm mú Náman o/chi o-bwa esim o-kâm ǒ, ne o/chi o-waa ne bwǎn eyên ne banyá. Ńdyí Geháze o/dim, orwôm ámu o/kám ǎ, enyam-byiko emen e-kpet ecé kpárádádát wǎ abíp.