2 Kyîng 4 - Bokyi Bible

Elásha o/chwáp Onyǐnkú mú mu Kyikpu

¹ Onyǐnkú mú onet obónge, mú o/mû ké burwám-bamkpábé ḿbé badasét byiraa-Osówo o/bê o-kâm Elásha, o-sét ǎ o/fu, bonchí, otyép ejí oo/kpú. Wǎ eringe nyí wo amu a-nyît ng, nyǐ o/mû onet mú o/mû o-shî ng Osówo, nké kántîk, onet mú nyǐ o/mû o/ryí ǎ dyifwá oo/bê bwǎn-banyinchéng ejí ashí afee eyip o-dim ne mbé wǎ básóng, ké dyifwá ńdyí otyép ejí o/ryí ǎ.

² Elásha o-bí ǎ o/fu, me nchi ǒ ebóng. Sét mě, wo amu ne ebóng ké kyise eyên. Mú onyinyi o-faa ǎ o/fu, chwǒm kyi*fí nang kyibónge* kyi-cibi ne kaatyu-bakút-ólif*.

³ Elásha o-sét ǎ o/fu, ca a-da-pwoo biǐfâa-etyu chwóó ḿbyí adari ne banet ḿbé mbe ǒ fáráng.

⁴ Â a/koo, wo ne bwǎn eyên, nung n̂g ké kafâ-kyise ba-cít dyifyi, ba-kpet bakút eján ké etyu ányi. Otyu nang orá nké o/sú, tín kámú a-tî ké bukô.

⁵ Ne mú onyinyi ámu o-dim o-da-nung ké kafâ-kyise emen o-cít dyifyi, o-yip kaatyu-bakút-ólif o-kpet eján ké etyu nyí bwǎn emen mbe ba-yip ng ba-kyâ ǎ.

⁶ Ké nkéré mú oo/ján bakút ké etyu emúmú, o-bí bwǎn emen â etyu ekíri e/tôong. Wǎn emen obónge o-sét ǎ o/fu, mú a/ján bakút éné nké mu nkuli kyikû, ne bakút ba-mîng ebyí ké kaatyu.

⁷ Mú onyinyi o-bwa esim o-kâm Elásha, ne Elásha o-sét ǎ o/fu, yip bakút-ólif ámbe a-shee, a-ré kángkáng afwá eyên. Akpuga a/chi a-waa nyí wo ne bwǎn eyên ba/chi ba-kpen ké nyǐ.

Elásha ne Nfang-Onyinyi mú o/fím Shúnem

⁸ Dyicí dyibónge, Elásha o/dim o-wâa Shúnem, ké oshê mú nfang-onyinyi obónge o/mû o-kyú u. Onyinyi ámu o-kó ǎ o/fu, oda-ryí byiryíng, ne kyi-fím ké dyicí ándyi kyi-ca kashú, nang nkéré orá nké o/ce Shúnem, o-da ng eryí byiryíng ké kyise-onyinyi ámu.

⁹ Onyinyi ámu o-sét otyép emen o/fu, me n/ri n/fu, onyinchéng mún mú mu o-bâ nyín kángkáng nkéré o-chi i onet-Osówo.

¹⁰ Mîng byi-bi nfût mú kaǎníng kyíbóng-kyise byi-tî karíng ne ókpákpúrúk ne égbúra ne otyuryíkáng ké kafâ eringe nyí odakûkyú ké mǔ nang nkéré orá nké o/bê bě eri.

¹¹ Dyicí dyibónge, Elásha o/bê ké Shúnem o-da-nung ké nfût emen o/fu, nyǐ o-jáng ng.

¹² O-twóm Geháze mú ḿgbán emen o/fu, oda-kó mú onyinyi ámu o-bâ. Ké nkéré mú mú onyinyi ámu o/bê,

¹³ Elásha o-sét Geháze o/fu, bí ǎ ńkyí mu o-ryuu ng o/fu, me nchi n-kye ǎ ké kángkáng afaníkong nyí oo/ri ne o-kye bě kángkáng byěm ḿbyí byimu byi-ryuu ng. Katô mu o-ryuu ng o/fu, me nca ké kyikit-otu nang ké ńkyí onet-dyishí-basúja n-da-sét kámbé chwǒm ńkyí kyinong n-kye ǎ. Mú onyinyi ámu o-faa o/fu, me mu ne kángkáng byěm ḿbyí mu n-ryuu ng ne banet ejí.

¹⁴ Elásha o-bí Geháze o/fu, ebóng chwǒm kâng ńkyí me ndachi n-kye ǎ. Geháze o-faa o/fu, o*fí ne wǎn-onyinchéng* ne otyép emen oo/kâa.

¹⁵ Elásha o-sét Geháze o/fu, sét ǎ o-bâ kwán. Mú onyinyi ámu o-bâ o-ba-bwom ké ocím-dyifyi,

¹⁶ ne Elásha o-sét ǎ o/fu, ké nkéré mún, ké dyije ńdyí ndyi dyi-bâ ké kashú, wo a/chi a-firi ne wǎn-onyinchéng ké abwô. Mú onyinyi ámu o-faa o/fu, kamgbe, ǎ bonchí, *da mě enîm kaǎnínǐm*. Wo a-chi i onet-Osówo.

¹⁷ Nké, wǎ eringe nyí Elásha o/mû o/sét, ké nkéré ámu, ké orî-dyije, o/fwon wǎn-onyinchéng.

¹⁸ Ké nkéré mú aje aa/shwôm, ké nkéré mú badafuu byiryíng, mú wǎn-onyinchéng ámu o/dim ké dyicófóróng dyibónge o/fu, nyǐ o-da ng ekâm bonchí mú o/mû ké kyifát ne banet ḿbé mbe ba-fuu ng ǎ byiryíng.

¹⁹ Ké abe ányi, o-wonge o-kó bonchí emen o/fu, dyishí ndyi dyi-bwo ng mě. Bonchí o-sét ḿgbán emen o/fu, kúng mú wǎsíng a-ca ne nyǐ ké kyikit-boné.

²⁰ Mú ḿgbán ámu o-yip mú wǎsíng o-da-kye ǎ boné. Boné o-yip ǎ o-fé ké byiká tete esû e-kán, wǎn ámu o-kpú.

²¹ O-yip wǎn ámu o-yú kyíbóng o-ca ne nyǐ ké nfût mú Elásha, o-da-ren ǎ ké karíng ńké Elásha, o-cít dyifyi o-dim.

²² Ne o-kó otyép emen o-sét ǎ o/fu, twóm ḿgbán obónge o-bâ nyín ne kaanyam-atû. N-kún-wâa ng n-kâm Elásha mú mkpábé mú odasét byiraa-Osówo. M-bwa ng esim abeabe.

²³ Otyép emen o-bí ǎ o/fu, ebóng amu a-wâa ng kurún. Kurún, *chí dyicí-ékwâbashi* nang ńdyí dyijî-kyifen ńkyí otukáku mú ofyîfî*. Mú onyinyi o-faa ǎ o/fu, *dachi a-kérê*.

²⁴ Ne o-sét ḿgbán emen o/fu, obwá kakyúng ké kaanyam-atû, o-sét ḿgbán ámu o/fu, chi kaanyam-atû ka-zóngê ne busa, *dachi a-chi ka-jwâa asa* tete n-sét ǒ.

²⁵ Ne odim kâng o-wâa ké kaku ńké Kámel, ké kyikit ńkyí Elásha o/mû. Elásha o/bwom o-ri ǎ ké mu o-bâ, ńdyí o/mû o/tôong tíbítíbí, ne o-sét Geháze mú ḿgbán emen o/fu, kan achi a-ri, onyinyi mú o/fím Shúnem nké mu o-bâ éné.

²⁶ Zóngê a-kâm ǎ, a-bí ǎ, â nyǐ ne otyép emen ne wǎn emen mbe kanong. Mú onyinyi ámu o-sét Geháze o/fu, kángkáng byěm mbyi kanong.

²⁷ Nké ké nkéré mú o/kâm Elásha, nyǐ o/tíngê kyísí ké bushú emen o-tím ǎ byizim ké byiká. Geháze o/mû o-kú o-bâ ǎ ejê biǐsâ-abwô, nké Elásha o/sét ǎ o/fu, mîng ǎ. Wo a*fí a-ri ng a/fu, mu ké kiǐtí-bafip*? Ne Óburúkpâbí o*da mě esét ne chwǒm kyi-kim ne nkyí*.

²⁸ Mú onyinyi ámu o-bí Elásha o/fu, bonchí, me m/bí ǒ n/fu, kye mě wǎn-onyinchéng? N*da ǒ esét n/fu, *dachi a-chi mě n-tî okabe*?

²⁹ Elásha o-bírî o-sét Geháze o/fu, chi ochéé óchee. Kúng ochí ejí a-dim. *Dachi a-bwom a/fu, a-ta ng nang yeě mú a/kwárê ne nyǐ kyiraa*. Â nang onet o/ta ǒ kyiraa, bángê ochéé óchee a-shwôm. Ca ocǎng ké kyise a-da-níbî ochí ámu kyíbóng-wǎn ámu.

³⁰ Mú onyinyi o-sét Elásha o/fu, ké ofê mú mu n-kyâ Óburúkpâbí mú mu okpó ne wo to, me n/sem n/fu, me mm*ba/chi m-mîng ǒ*. Ne mbé ashí afee ba-dim ba-bwa esim burwám.

³¹ Geháze o/bwóp kámbé kashú o-da-níbî ochí kyíbóng-okúsí-wǎn ámu. Nké wǎn ámu o*da/faa ojá* nang ekap ekíri e*da/tông e/fu, oo/jwóbê*. Ne o-bwa esim kâng o-da-kâm Elásha, o/fu, wǎn ámu o*da/jwóbê*.

³² Ké nkéré mú Elásha o/ribi, o/dim kǎnchí o-da-nung ké nfût o-da-ri ké kyikwóm-wǎn ámu kyi/firi ké karíng sáre.

³³ O-fín dyifyi, o-fé nshwam o-kye Óburúkpâbí.

³⁴ Ne o-rí o-nye wǎn ámu, ocím emen ne achi emen ne abwô emen byi-tyeem ne ocím ne achi ne abwô nyí wǎn ámu. Ké nkéré mú o/rí o-cít mú wǎn ámu, enyam-byiko-wǎn ámu e-kpet esóng.

³⁵ Elásha o-bûu, o-cen o-wáp ké nfût, o-chîbwa esim o-da-rí o-cít mú wǎsíng. Mú wǎn ámu o-jâa ejâ kampén káchâtkányi, o-bâa achi.

³⁶ Elásha o-kó Geháze o/fu, okó boné-wǎn ámu o-bâ. Ké nkéré mú mú onyinyi o/banung, Elásha o-sét ǎ o/fu, di wǎn eyên i.

³⁷ Mú onyinyi o-myii Elásha ké byiká, bushú emen bu-ta kyísí. Ne o-kúng wǎn emen o-dim.

Akat Akíri Afee

³⁸ Nkéré obónge, ké nkéré mú esong e/róng ké oshê omúmú, Elásha o/bwa esim ké Gyígal. Ké nkéré mú o/mû mu o-tángê e dyizu-bamkpábé ḿbé badasét byiraa-Osówo, nyǐ o/sét ḿgbán emen o/fu, otû kiimbâng-katí ké okwâ, o-rám kasu o-kye kámbé.

³⁹ Onet obónge ké burwám ebe o-dim ké dyikán eshǎan-byichí ebóng. O-ri orí-dyikán, o-bóng byirim emen eringe nyí odaman etû. O-bâ ne mbyí o-ba-ját kámbyí o-fé ké kasu ánke, o*da/nyît dyizong-byirim-byichí ḿbyí byi/mû*.

⁴⁰ Ba-fé kasu ánke ba-kye banet ba/fu, baryí, nké mbé ba-ta ng kánké ké ocím ba-bâ, ba-wonge ba-sét Elásha ba/fu, baa/fé chwǒm ńkyí onet odaryí o-kpú, ba-né eryí.

⁴¹ Elásha o-sét kámbé o/fu, bakpere onyin-filáwa ba-kye ǎ, ne o-yip kámú o-fé ké kafâ-katí ánke, o-sét kámbé o/fu, bachîkpé kasu ánke ba-kye kámbé. Kyibî-chwǒm kyi*da/chîchi ké kasu ánke*.

⁴² Ké nkéré okíri, onyinchéng obónge o/fím Bâl-Shalísha o-bâ Elásha ne byirim-berêt bujam ḿbyí ba/chi ké bambwôp kashú-esang-byichí nyí badakó bályi, nyí ba/bóng ké dyije ándyi, ne esang-byichí ekíri nyí ba/bóng ekpó ekpó. Elásha o-sét ḿgbán emen o/fu, oyip byiryíng ámbyi o-kye bamkpábé ḿbé badasét byiraa-Osówo.

⁴³ Nké ḿgbán emen o/faa ǎ o/fu, wo a/kabe a/fu, ḿbyín byi-kwárê ng bajam-banet batánge? Elásha o-faa ǎ o/fu, kye kámbé ba-ryí, ké nǎ, Óburúkpâbí oo/sét o/fu, ba/chi ba-ryí byi-waa kyísí.

⁴⁴ Ne ḿgbán ámu o-yip byiryíng ámbyi o-kye kámbé, ne wǎ eringe nyí Óburúkpâbí o/mû o/sét, mbé ashí kángkáng ba/ryí kyicê kyi-waa kyísí.