2 Kyîng 3 - Bokyi Bible

Byití ḿbyí Ézerel ba/nwa ne Mówep

¹ Ké aje onyiryiká ne achât nyí Otu Jehósháfat o/ryí butu ké Júda, Jóram mú wǎn-Otu Éhap o/ryí butu ké Ézerel, ne o/rí aje diǐkpú ne afee ké butu, ké Samérya.

² Nyǐ o/chi kyibî ké bushú ḿbú Óburúkpâbí, nké nyǐ o/mû o*da/bên wǎ bonchí emen* nang wǎ eringe nyí Jézébel mú boné emen o/mû o/bên*. Nyǐ o/bên orim-bukye mú bonchí emen o/mû o/chi o/fu, bakûkye Bâl ofê.

³ Nké nyǐ o/chi banet-Ézerel ba-róng ké kyibî, o*da/chi kámbé ba-mîng* wǎ eringe nyí Otu Jérobâm mú wǎn-Nébat, mú o/mû o/ryí kpá butu o/mû o/chi.

⁴ Otu Mésha mú Mówep o/mû o-tî ng etám-ebû, ne kángkáng dyije o/mû o-kyâ otu mú Ézerel égot-etám-ebû ne eríp nyí égot-etám-ebû etánge etánge ké bajam-byikit batánge wǎ akpuga-dyishí.

⁵ Nké ké nkéré mú Otu Éhap o/kpú, Otu Mésha o/bírî bunwa ne Ézerel.

⁶ Otu Jóram o*da/bên nkéré* o-dim ké Samérya o-kpî kángkáng basúja emen.

⁷ O-twóm ejá e-kâm Otu Jehósháfat mú Júda o/fu, otu mú Mówep oo/bírî bunwa ne me. A-bâ ne me ké kyikû byi-da-nwa byití ne nyǐ dí. Otu Jehósháfat o/faa o/fu, m-bâ. Me mu ne wo ne banet ejí ne bubyî-orá ejí.

⁸ Kiǐfáng kyirá ńkyí byi/chi byi-cen ne byi-da-nwa byití ámbyi. Otu Jóram o-sét ǎ o/fu, byi/chi byi-cen ké kiǐfáng ńkyí tíbítíbí, ńkyí kyidashwôm ké kyikim-dyikán ńkyí Édom.

⁹ Ne Otu Jóram kâng ne batu ḿbé Júda ne Édom ba-dim. Ké nkéré mú baa/cen bucen ké ací káchâtkányi, omu ebe o-man, mang onyin o*da/waa mú banet ebe nang boonyam-atû ebe budajwáp*.

¹⁰ Otu Jóram o-raa o/fu, bii/kpú. Óburúkpâbí oo/kúng bě ashí achât o-fé ké abwô nyí otu mú Mówep.

¹¹ Otu Jehósháfat o-bí o/fu, mkpábé mú odasét byiraa-Osówo mu nyín? mú byida ǎ esét o-bí Óburúkpâbí? Onet-dyishí-basúja ḿbé Otu Jóram o-faa o/fu, Elásha mú wǎn-Sháfat mu nyín. Nyǐ nké o/mû o-chwáp ng Elája.

¹² Otu Jehósháfat o-raa o/fu, nyǐ o-chi i mkpábé mú odasét byiraa-Osówo mú ntûntû. Ne batu ámbe ashí achât ba-dim ba-kâm Elásha.

¹³ Elásha o-bí otu mú Ézerel o/fu, ebóng ńkyí me nda ǒ ekye ochwâp. Ca a-da-bí bamkpábé-ńchân ne ńnân eyên ḿbé ba/mû ba-bí ng kámbé. Otu Jóram o-faa o/fu, aa*wááng*. Óburúkpâbí nké oo/fé bě batu ḿbén ashí achât ké abwô nyí otu mú Mówep.

¹⁴ Elásha o-faa o/fu, ké bubwô ḿbú Óburúkpâbí mú mu okpó, mú me mu n-fâ ǎ, me mu n-sem m n/fu, â kyi/mû kyi*fí ké ofê mú Jehósháfat mú Júda* mú ocín eyên* me m/mû n*fí ne chwǒm ńkyí ndachi ne wo*.

¹⁵ Kántîk, kyé n̂g mě nkim ane. Ké nkéré mú nkim ane o-kú o-kim m dyícîng emen, busa ḿbú Óburúkpâbí bu/nung Elásha ké byiko,

¹⁶ ne n-raa o/fu, něen nké Óburúkpâbí o/fu, sím m̂ ewo ké kángkáng kace ńkén, ńké kaa/núng.

¹⁷ Nang baa*ba/chi ba-ri omu mú o/chi o-na* nang afú nyí a/chi a-tugi* kace ńkén ńké kaa/núng ka/chi ka-sú ne omu, ne ben ne byitú enen ba/chi ba-já omu chwóó mú badajwáp.

¹⁸ Elásha o-raa o-ca kashú o/fu, ńkyín *chí chwǒm ńkyí kyidasóng Óburúkpâbí echi*. Nyǐ o/chi o-chi běn to ba-kpógê banet ḿbé Mówep.

¹⁹ Ben ba/chi ba-kpógê kángkáng eshê ebe nyí enong enong, nyí ba/bi ekpe ba-wâng kányí. Ben ba/chi ba-twom kángkáng byichí ebe ḿbyí byidazím byirim, ba-cít ajwáng ebe, ba-bên kángkáng byifát ebe ḿbyí byidabát byiryíng, ké aká nyí ba/chi ba-kúng ba-cít kámbyí.

²⁰ Ké orî-dyicófóróng, ké nkéré mú badachi kyifen ńkyí dyicófóróng, omu o/fím ké kyicê ńkyí Édom o-sen n o-bâ, o-cít esí emúmú.

²¹ Ké nkéré mú banet ḿbé Mówep ba/jwo ba/fu, batu ámbe bachât baa/bê ebanwa ne mbé, kángkáng banet ḿbé badaman enwa byití kyi-fím ké ḿbé ba/tôong bwǎsíng kyi-ribi ké ḿbé baa/kán ba-shwôm ba/kó kámbé ba-tî kámbé ké buti-esí.

²² Ké nkéré mú ba/jwóbê ké orî-dyicófóróng, óbyísû o/mû mu o-san n ké omu ámu, o-chi kámú o-kûrángê wǎ baróng.

²³ Mbé ba-raa ba/fu, baróng. Banet-bushwôn eten ámbe bachât baa/nwa byití ba-ju barî. Byiwâa n̂g byi-da-wuri byěm ké bampyep ebe.

²⁴ Nké nkéré mú mbé ba/ribi ké bampyep ámbe, banet ḿbé Ézerel ba/kye kámbé bunwa, ba-ró kámbé ba-bwa esim. Banet ḿbé Ézerel [ba/rim ne mbé ké kyikû] ba-ju ng banet-Mówep,

²⁵ ba-bên n eshê ebe ba-câ. Â ba/shwôm kyifát nang kyirá ńkyí nkyi kyi-nwa ng, onet-Ézerel nang orá o-twóp buká ké nkyí, tete ké nkuli kyikû ba-cít kángkáng byifát ebe ne aká. Ba/cít to ajwáng ebe, ba-twom byichí ebe ḿbyí byidazím byirim. Ké nkuli kyikû, [dyityém-oshê-Mówep mú badakó Kî-Héres nké nke] o/waa, ne bantîm aká ké boǒkpi ba-wâng kámú, ba-kye kámú bunwa.

²⁶ Ké nkéré mú otu mú Mówep o/ri o/fu, ba-kú ba-kpógê ng ǎ ké byití, o/kúng égot-banet ḿbé badanwa byití ké bushwám echât ne bajam-banet batánge o-kan o/fu, nyǐ o-nung ng banet-bushwôn emen ké otyém, nyǐ o-chêe o-kâm otu mú [Syírya,] nké kyi*da ǎ ebyí dyishí*.

²⁷ Ne o-kúng kâng ókpá-wǎn emen mú onyinchéng, mú o/mû o/chi o-kúng kyikit emen wǎ otu o-ju, o-chi kyifen kyíbóng-ekpe-oshê o-kye orím-bukye mú Mówep. Bushî bu-róng banet ḿbé Ézerel, ba-dim ba-mîng oshê ámu, ba-bwa dyijê ké oshê ebe.