2 Kyîng 25 - Bokyi Bible

Jerúsélem o/róng

¹ Otu Zedekyâ o/bírî bunwa ne Otu Nébúkanéza mú Bábyílon, ne ké bubwô ámbu, Otu Nébúkanéza o/bê ne kángkáng basúja emen o-ba-kye Jerúsélem bunwa, ké ací diǐkpú, ké etukáku diǐkpú nyí aje kátángekányi nyí Otu Zedekyâ o/ryí butu. Mbé ba/bi bampyep-byití ké bukô-oshê, ba-bi byikit ḿbyí badayú ké ekpe ba-wáp oshê,

² ba-kye kámú bunwa tete Otu Zedekyâ o-rí aje diǐkpú ne din ké butu.

³ Ké ací kátángekányi, [ké etukáku enyii] ké dyije ándyi, ńdyí esong e/nung nyí banet ba*fí to ne chwǒm ńkyí badaryí*

⁴ ba-bú ekpe-oshê. Nang ké basúja ḿbé Bábyílon ba/mû baa/wâng oshê, kángkáng basúja ba/chêe ne buchú. Ba/cen ké kiǐfáng ńkyí kyifát-otu, ba-byí ké dyifyi ńdyí dyi/cibi ekpe ányi efee, ba-chêe ba-jâ ḿbú owo mú Jódan.

⁵ Nké basúja ḿbé Bábyílon ba/rim ne Otu Zedekyâ ké kyikû, ba-kám ǎ ké ndegeńdege-esí mú Jéríku, ne kángkáng basúja emen ba-chêe ba-mîng ǎ.

⁶ Ba-kúng Otu Zedekyâ ba-ca ne nyǐ kyikit-Otu Nébúkanéza mú o/mû ké oshê-Ryíbila. Ányi nké Otu Nébúkanéza o/pan ǎ mpan.

⁷ Ba-kúng bwǎn-Otu Zedekyâ ba-ju ké bushú-bonchí ebe. Ne Otu Nébúkanéza o-fuu Otu Zedekyâ achi, o-fé ǎ bamgbokobá, o-kúng ǎ o-dim ne nyǐ Bábyílon.

Ba/bên Kiǐtí-Kyise-Kyifen-Osówo echi

⁸ Ké ací káchâtkányi, ké etukáku etánge nyí aje onyiryiká ne anyii nyí Otu Nébúkanéza mú Bábyílon o/ryí butu, Nébúzaradan mú o/mû o-kyâ otu bacê ne onet-dyishí-basúja emen to o/nung ké Jerúsélem.

⁹ O-shí kiǐtí-kyise-kyifen-Osówo echi ne kyibám-butu ne kángkáng byise ḿbyí biǐtí-banet ḿbyí Jerúsélem,

¹⁰ basúja emen ba-bú ekpe-oshê.

¹¹ Ne Nébúzaradan kâng o-kúng banet ḿbé ba/mû ba/waa, ne banet ḿbé [banchi mpwô] ne banet ḿbé ba/mû ba/chêe ba-kâm banet ḿbé Bábyílon o-dim ne mbé Bábyílon.

¹² Nké o/mîng kyicê-banet-byikpu ḿbé ba/mû ba*fí ne byěm* ké Júda, o-tî kámbé o/fu, bakûchi bǎmkpóngé ké byifát.

¹³ Basúja ḿbé Bábyílon ba/sé byikwap-borôn ne byěm-borôn ḿbyí badabírî atû, ḿbyí byi/mû ké kiǐtí-kyise-kyifen-Osówo echi, cibicibi ne kiimbâng-dyicáng-borôn, ba-kúng kángkáng borôn ba-dim ne mǔ Bábyílon.

¹⁴ Ba/kúng to basóburu ne acáng nyí badafé atông, nyí ba/mû ba-kúng ng ba-shî ng kyikit-kyifen echi ne byěm ḿbyí ba/mû ba-mee ng etyuryíkáng ne acáng nyí ba/mû ba-fâ baróng-enyam nyí badachi kyifen ne acáng nyí badashí burwan ne kángkáng byěm ḿbyí ba/chi ké borôn, ḿbyí ba/mû ba-kúng ng ba-chi i bǎmkpóngé ké kiǐtí-kyise-kyifen-Osówo echi.

¹⁵ Ba/kúng kángkáng byěm ḿbyí ba/chi ké gûl ne syílyíba, cibicibi ne boǒcáng ḿbú boǒníng ne acáng nyí badabwóp amánge-okwâ.

¹⁶ Byěm byikíri ḿbyí Otu Sólómon o/chi ké borôn, byikwap byifee ne byěm ḿbyí badabírî atû ne kiimbâng-dyicáng-borôn ḿbyí byi/mû byi-jang ng eró byi-shwôm.

¹⁷ Byikwap ámbyi byifee byi/mû jangjang, nang kyirá kyi/mû bamyíta nyíryinyi ké butang ne dyishí ńdyí ba/twôom ké dyishí emen ńdyí dyi/mû myíta obónge ne kyicê ké butang. Ké ashí nyí ba/twôom ké ashí-byikwap ámbyi, ba/sáng byirim-byichí-borôn ḿbyí badakó pamagáránat.

Ba/kúng Banet ḿbé Júda ba-dim ne Mbé Bábyílon

¹⁸ Nébúzaradan mú onet-dyishí-basúja o/kúng to Seráya mú otu-nchi kyifen-Osówo ne Zefanyâ mú nchi kyifen-Osówo, mú o/nye ǎ abwô ké esim, ne biǐtí-banet-bǎmkpóngé ḿbé kiǐtí-kyise-kyifen-Osówo echi o-dim ne mbé Bábyílon wǎ bamgbokobá.

¹⁹ Ké Jerúsélem, o/kúng to onet-dyishí-basúja ne bankye otu bacê ashí atánge ḿbé ba/mû ba/tôong ké kafâ-oshê, ne onet mú o/nye onet-dyishí-basúja abwô ké esim, mú o/mû o-tî ng banwet-byěm byi-kim ne byití, ne bajam-biǐtí-banet byikíri bachât.

²⁰ Nébúzaradan o/kúng kámbé o-ca ne mbé ké kyikit-otu mú Bábyílon, mú o/mû ké oshê mú Ryíbila,

²¹ ké kyikim-esí ńkyí Hámat. Ányi nké otu o/kye busa ba-mín kámbé, ba-ju kámbé. Éné nké ba/kúng kâng banet ḿbé Júda ké esí ebe ba-dim ne mbé wǎ básóng.

Otu Gedalyâ mú Júda

²² Otu Nébúkanéza o/chi Gedalyâ mú wǎn-Ahíkam, mú bonchí emen mú kánkán o/mû o-bángê e Sháfan, otu mú Júda, o-tî ǎ onet-dyishí mú kángkáng banet ḿbé ba*da/kúng kámbé ba-dim ne mbé Bábyílon*.

²³ Ńdyí banet-ashí-basúja ne basúja ḿbé ba*da/zú abwô ké bunwa* ba/jwo kyi-kim ne nkyí, mbé ba/dim ba-kâm Otu Gedalyâ ké Myízipa. Banet-ashí-basúja ámbe ba/mû Éshimal mú wǎn-Netanyâ ne Johánan mú wǎn-Karyâ ne Seráya mú wǎn-Tanúmet, mú o/fím oshê mú Netófa ne Jezanyâ mú o/fím Máka.

²⁴ Otu Gedalyâ o/sét kámbé o/fu, me mu n-sét ng běn ké ntûntû n/fu, bukwóp bu*fí to ḿbú ben badashî banet-ashí-bǎmkpóngé ḿbé Bábyílon*. Kyú n̂g ké esí ńnyín, ba-kye otu mú Bábyílon ofê, ne kyi/chi kyi-kyú kanong ne ben.

²⁵ Nké ké etukáku káchâtkányi nyí dyije ándyi, Éshimal mú wǎn-Natanyâ, mú bonchí mú kánkán o/mû o-bángê e Elyíshama, mú o/mû ké kyikû-butu, o/dim Myízipa ne banet ashí diǐkpú o-da-kye Otu Gedalyâ bunwa, o-ju ǎ. O-ju to banet ḿbé Bábyílon ne Ézerel ḿbé ba/mû ne nyǐ.

²⁶ Ne kángkáng banet ḿbé Ézerel, ḿbé byikpu ne ḿbé ba/mû ne esang, cibicibi ne banet-ashí-basúja ba/dim ba-jâ Éjip, ké nǎ, ba/mû ba-shî ng banet ḿbé Bábyílon.

Ba/fîm Otu Jehóyákin ké Mgbokobá

²⁷ Ké dyije ńdyí Efyimeródak o/ryí butu ḿbú Bábyílon, nyǐ o/nwa dyityém ne Otu Jehóyákin mú Júda, o-fîm ǎ ké mgbokobá. Ńkyín kyi/chi ké ací bujam esim káchâtkányi, ké etukáku diǐkpú ne efee nyí aje bujam esim onyiryiká ne afee nyí ba/mû ba/kúng Otu Jehóyákin ba-dim ne nyǐ wǎ onet-mgbokobá.

²⁸ Otu Efyimeródak o/tî ǎ kanong kanong o-kye ǎ kyikit-ofê ńkyí kyi/shwôm ńkyí o/kye batu ḿbé áku, ḿbé ba/mû ba/kám to kámbé ba-jâ ne mbé Bábyílon.

²⁹ Ne o-mîng kâng Otu Jehóyákin o-yángê byídí-mgbokobá o-fé byikíri, o-kûryí byiryíng ké ókpákpúrúk mú otu ké kyikim-dyikpen emen ńkyí kyi/waa.

³⁰ Kángkáng dyicí, ké kyikim-dyikpen emen ńkyí kyi/waa, ba/kye ǎ akpuga nyí odaré byěm ḿbyí mu o-ryuu ng.