2 Kyîng 23 - Bokyi Bible

Otu Josáya o/chi ba-mîng Bakye esháng

¹ Otu Josáya o-kó kángkáng banet-ashí ḿbé Júda ne Jerúsélem,

² ne mbé ashí amúmú ba-dim ké kiǐtí-kyise-kyifen-Osówo echi. Banchi kyifen-Osówo ne bamkpábé ḿbé badasét byiraa-Osówo ne kángkáng burwám-banet ḿbé áku ba-ca ne mbé ké kyikû, banfang-banet ne banet-byikpu. Otu o/bwom ké bushú ebe kángkáng o-kó nwet ámu kángkáng mú ba/ri ké kafâ-kiǐtí-kyise-kyifen-Osówo echi.

³ O-bwom ké kyikwap-butu o-ryí ocím ne Óburúkpâbí o/fu, nyǐ o-fâ ǎ, o-tî byije emen ne byěm ḿbyí byi/sét ne kángkáng dyityém emen, nyǐ o-chi i kángkáng byěm ámbyi, ḿbyí ba/sáng ké nwet ámu. Ne kángkáng banet ba-bángê to ba/fu, mbé ba-tî ng ocím eryí ámu.

⁴ Ne Otu Josáya kâng o-kye Hyíkya mú otu-nchi kyifen-Osówo ne banchi kyifen-Osówo ḿbé mbe ba-chwáp ng ǎ ne banet-mbâm ḿbé ba/mû ké bǎmkpóngé ba-bám m ocím-dyifyi mú kiǐtí-kyise-kyifen-Osówo echi busa o/fu, bafîm kángkáng byěm ḿbyí ba/mû ba-kúng ng ba-kyâ Bâl ne Ashéra mú osówo-onyinyi ne ékpére ofê ba-byí ne mbyí ké kafâ-kiǐtí-kyise-kyifen-Osówo echi. Otu o/kúng kángkáng byěm ḿbyín o-byí ne mbyí ké kafâ-oshê o-shí kámbyí fáráng ne owo mú Kyídoron, ba-kúng atông ebe ba-dim ne nyǐ Bétel.

⁵ O-fîm banchi kyifen ḿbé batu ḿbé Júda ba/mû ba/chi kámbé ba/fu, [bakûchi byifen] ké biinchéng-bakye ké eshê nyí Júda ne ké byikit ḿbyí byi/fárâng Jerúsélem, kángkáng banchi kyifen ḿbé ba/mû ba-chi i byifen ba-kyâ Bâl ne óbyísû ne otukáku ne byěm ḿbyí mbyi kyíbóng ne ékpére.

⁶ O-fîm orím-bukye mú Ashéra mú osówo-onyinyi o-byí ké kafâ-kiǐtí-kyise-kyifen-Osówo echi, o-kúng kámú o-byí ne mǔ ké kafâ-oshê, o-ca ne mǔ ké owo mú Kyídoron, o-shí kámú, o-kíbî ecíbí emen rugirugi, o-wuri kányí o-pwó ké kyikit ńkyí mbe ba-ryii ng banet.

⁷ O-bên kyikit ńkyí nkyi ké kiǐtí-kyise-kyifen-Osówo echi ńkyí banyinyi-akpara ba/mû ba-kyú u. Ké kyikit ánkyi nké banyinyi ba/mû ba-tím m byídí ḿbyí ba/mû ba-bwá ng, ba-kyâ Ashéra ofê.

⁸ O-kúng banchi kyifen-bakye esháng ḿbé ba/mû ba-kyú u ké eshê nyí Júda o-bâ ne mbé ké Jerúsélem, o-bên kángkáng byikit ḿbyí ba/mû ba-sháng ng bakye ké oshê omúmú. O-bên to byikit-byifen echi ḿbyí ba/mû ba/chi ba-tî byitî-bací ḿbyí mbyi wǎ ebû, fáráng ne dyifyi ńdyí Jóshwa mú o/mû onet-dyishí-oshê ámu o/bi, ńdyí dyi/mû ké kyicê-bubwô-eku-dyifyi ńdyí dyiryên â onet o-kú o-nung ng ké oshê.

⁹ O*da/bángê banchi kyifen ámbe ba-chi bǎmkpóngé ké kafâ-kiǐtí-kyise-kyifen-Osówo echi* nké ba/mû ba-man n eryí berêt mú ba*da/fé bukye ḿbú odamut* mú ba/mû ba-kyâ bábe-banchi kyifen-Osówo.

¹⁰ Otu Josáya o/bên to kyikit ńkyí ba/mû ba-sháng ng bakye ké owo mú Hyínom, ńkyí ba/mû ba-kó ng Tófet, eringe nyí onet oo*man to ekúng wǎn emen o-chi kyifen ńkyí badashí o-kye osówo ebe mú badakó Mólek*.

¹¹ O-fîm to bubyî-orá ḿbú batu ḿbé Júda ba/mû ba/kúng ba-tî ké ofê ekye mú ba/mû ba-kyâ óbyísû, o-bên bamútu ḿbé bubyî-orá ámbu bu/mû bu-tut ng kyi-kim ne ofê ámu. Ba/mû ba-tî ng kámbé ké kafâ-kabám-kiǐtí-kyise-kyifen-Osówo echi, fáráng ne dyifyi ńdyí dyi/mû dyi*da/tíbî ne kyise ńkyí Nátan-Mélek mú kiǐtí-onet-bǎmkpóngé o/mû o-kyú u*.

¹² Byikit-bakye esháng ḿbyí batu ḿbé Júda ba/mû ba/bi kyíbóng-kyise-Otu Éhaz, Otu Josáya o/bú kámbyí, cibicibi ne byikit-bakye esháng ḿbyí Otu Manáse o/bi ké bufâ-kabám bufee ḿbú kiǐtí-kyise-kyifen-Osówo echi. [O/sé byikit ámbyi rugirugi] o-wuri kámbyí o-pwó ké owo mú Kyídoron.

¹³ Otu Josáya o/bên byikit-bakye esháng ḿbyí Otu Sólómon o/mû o/bi ké kyicê-Jerúsélem ńkyí esû edabyí, ké busyísen-kaku-ólif, ḿbyí ba/mû ba-kyâ banunut-erím-bakye nyí Asatáte mú osówo-onyinyi mú Sádon ne Kémoshi mú osówo mú Mówep ne osówo mú Ámon ofê.

¹⁴ Otu Josáya o/sé aká-ociring rugirugi, o-bên orím-bukye-Ashéra mú osówo-onyinyi, o-yip byikúú-banet o-cít esí nyí erím-bakye ányi e/mû.

¹⁵ Otu Josáya o/bú to kyikit ńkyí ba/mû ba-sháng ng bakye ké Bétel, ńkyí Otu Jérobâm mú wǎn-Nébat o/mû o/bi, mú o/chi Ézerel ba-róng ké kyibî. Otu Josáya o/bú kyikit-kyifen echi ánkyi, [o-sé aká emen rugirugi,] o-kíbî kányí a-firi édúkǎndú. O/shí to orím-bukye-Ashéra.

¹⁶ Ne Otu Josáya o-bírî achi o-ri akun nyí a/mû ányi kyíbóng-kaku. O/fu, bafuu byikúú ḿbyí byi/mû ké akun ányi o-shí kámbyí ké kyikit-kyifen echi ánkyi. Ké bukwóp ámbu, o/bên kyikit-kyifen echi ánkyi, o-chi ńkyí mkpábé mú odasét byiraa-Osówo o/mû o/sét kyikû ké esim, [ké nkéré mú ba/mû ba/sháng bakye, ńdyí Otu Jérobâm o/mû o/bwom ké kyikit-kyifen echi ánkyi. Otu Josáya o-bírî achi o-ri dyikun ńdyí mkpábé mú odasét byiraa-Osówo] mú o/mû o/sét chwǒm ánkyi.

¹⁷ O-bí o/fu, dyikun ńdyín ńdyí yeě. Banet ḿbé Bétel ba-faa ba/fu, dyi-chi i ńdyí mkpábé mú odasét byiraa-Osówo mú o/fím Júda ne o-ba-sét kyi-kim ne byěm ḿbyí wo aa/chi kyi-kim ne kyikit-kyifen echi ńkyín.

¹⁸ Otu Josáya o-kye busa o/fu, mîng n̂g kándyí dyi-kyú eringe nyí ndyi. *Da n̂g echi ba-fuu byikúú emen*. Ké bubwô ámbu, ba*da/fuu byikúú emen*. Nang ḿbyí mkpábé mú odasét byiraa-Osówo, mú o/fím Samérya ba*da/fuu*.

¹⁹ Ké oshê nang orá ké Ézerel, Otu Josáya o/bú kángkáng byikit ḿbyí ba/mû ba-sháng ng bakye, ḿbyí batu ḿbé Ézerel ba/mû ba/bi, ḿbyí byi/chi kafâ ka-sa Óburúkpâbí. O/chi kángkáng byikit-byifen echi ámbyi wǎ eringe nyí o/chi ké Bétel.

²⁰ O/ju kángkáng banchi byifen-bakye esháng ké byikit-byifen echi ḿbyí ba/mû ba-chi i bǎmkpóngé, o-shí byikúú-banet ké kyikit-kyifen echi nang kyirá. Ne o-bwa esim kâng ké Jerúsélem.

Otu Josáya o/tî Dyijî-Kyifen ńkyí Shwôm

²¹ Otu Josáya o/kye busa o/fu, nang yeě nang yeě ochi dyijî-kyifen ńkyí Shwôm ké ofê mú Óburúkpâbí mú mu Osówo ebe, eringe nyí ba/sáng ké nwet ámu.

²² Otu mú Ézerel nang Júda nang obónge o/mû o*da/tî ne dyizong-dyijî-kyifen ńkyí Shwôm wǎ ńdyín* kyi-fím ké nkéré mú banet-ashí-Ézerel ḿbé kpákpá ba/mû ba-tún n oshê wǎ batu*.

²³ Ké nkuli kyikû, ké aje onyiryiká ne achât nyí Otu Josáya o/ryí butu nké ba/chîchi dyijî-kyifen ńkyí Shwôm ké Jerúsélem.

Byěm Byikíri ḿbyí Otu Josáya o/chi

²⁴ Eringe nyí o/chi o-chi banet ba-tî byije ḿbyí ba/sáng ké nwet mú Hyíkya o/ri ké kafâ-kiǐtí-kyise-kyifen-Osówo echi, Otu Josáya o/fîm kángkáng bansô epé ne bampem ne bakúsí ba-byí ké Jerúsélem. O/fîm to erím-bakye ne kángkáng byěm byikíri ḿbyí byi/kim ne bakye esháng byi-byí.

²⁵ Otu okíri o/mû o*fí mú o/mû o/kyú wǎ nyǐ* mú o/fé Óburúkpâbí ne kángkáng dyityém emen* ne busa emen kángkáng* o-tî kángkáng Byije-Músis*. Otu okíri to o*fí to mú o/chîkyú wǎ nyǐ*.

²⁶ Nké kafâ ka/mû ka-kú ka-sa ng Óburúkpâbí ne Júda ké byěm ḿbyí Otu Manáse o/chi. Nang kántîk, kafâ esa ánke ka*da/man*.

²⁷ Óburúkpâbí o/raa o/fu, me n/chi n-chi Júda ńkyí n/chi Ézerel. N/chi n-ró kámbé ba-dim ké bushú ejí, ne n/chi n-né Jerúsélem mú mu oshê mú n/cá n-né to kiǐtí-kyise-kyifen-Osówo echi ńkyí nkyi kyikit ńkyí m/mû n/sét n/fu, ányi nké bada mě ekûkye ofê.

Butu ḿbú Otu Josáya bu/kúlî

²⁸ Kángkáng byěm byikíri ḿbyí Otu Josáya o/chi, ba/sáng kámbyí ké Nwet-Akpen ne Biǐshwô ḿbyí batu ḿbé Júda.

²⁹ Ké nkéré mú Otu Josáya o/mû otu, Otu Néko mú Éjip o/bê ne basúja o-ba-ribi ké kace ńké Yuférétyis o/fu, nyǐ o-bâ ng echwáp otu mú Asyírya. Otu Josáya o/kan o/fu, nyǐ o-ku ng basúja ḿbé Éjip ké Megído, ne ba-ju ǎ ké byití.

³⁰ Banet-ashí-bǎmkpóngé emen ba-kúng kyikwóm-enyam-byiko emen ba-fé ké mútu mú bubyî-orá budatut, ba-bwa esim Jerúsélem ba-ba-ryii ǎ ké oryii-batu. Banet ḿbé Júda ba-cá Jowáhaz mú wǎn-Otu Josáya ba-kúng ǎ butu.

Otu Jowáhaz mú Júda

³¹ Jowáhaz o/mû aje bujam ne achât ńdyí o/ryí butu ké Júda, ne o/kyú otu ké Jerúsélem ké etukáku echât. Boné emen o/mû o-bángê e Hamútal, mú wǎn-Jeryimáya, mú o/fím oshê mú Lyíbana.

³² Ké oleme mú o/leme banchí emen ḿbé kpákpá, nyǐ o/chi kyibî ké bushú ḿbú Óburúkpâbí.

³³ Butu emen bu/man ńdyí Otu Néko mú Éjip o/kám ǎ wǎ onet-mgbokobá ké Ryíbila, ké esí nyí Námat, o-chi Júda ba-kye égot-bakyílógaram-syílyíba onyiryiká ne efee ne bakyílógaram-gûl bujam esim diǐkpú ne enyii wǎ akpuga-dyishí.

³⁴ Otu Néko o/chi Elyǎkim mú wǎn-Otu Josáya o-kúng kyikit ńkyí bonchí wǎ otu, o-yángê ǎ dyizîn dyi-firi Jehóyákim. Otu Néko o/kúng Otu Jowáhaz o-dim ne nyǐ Éjip, o-waa áku o-kpú.

Otu Jehóyákin mú Júda

³⁵ Otu Jehóyákim o/koo akpuga-dyishí nyí a/kwárê ne akpuga nyí nang yeě o/mû o-já ng, eringe nyí odajá akpuga nyí odakwárê nyí odakye otu mú Éjip wǎ akpuga-dyishí.

³⁶ Jehóyákim o/mû aje bujam ne atánge ké nkéré mú o/ryí butu ké Júda, ne o/kyú otu ké Jerúsélem ké aje diǐkpú ne din. Boné emen o/mû o-bángê e Zebyída, mú wǎn-Pedáya, mú o/fím oshê mú Rúma.

³⁷ Ké oleme mú o/leme banchí emen ḿbé kpákpá, Otu Jehóyákim o/chi kyibî ké bushú ḿbú Óburúkpâbí.