2 Kyîng 22 - Bokyi Bible

Otu Josáya mú Júda

¹ Josáya o/mû aje nyíryinyi ké nkéré mú o/ryí butu ké Júda, ne o/kyú otu ké Jerúsélem ké aje bujam esim diǐkpú ne din. Boné emen o/mû o-bángê e Jedyída, mú wǎn-Adyâ, mú o/fím oshê mú Búzikat.

² Otu Josáya o/chi ńkyí kyi/nyîn Óburúkpâbí. Nyǐ o/leme édúú nyí Otu Dívit mú bonchí emen mú kpákpá, o-tî kángkáng byije-Osówo kerededet.

Ba/ri Nwet-Byije-Músis

³ Ńdyí Otu Josáya o/rí aje onyiryiká ne achât ké butu, nyǐ o/twóm nsâng banwet emen mú odabángê Sháfan, mú wǎn-Azalyâ, mú bonchí emen mú kánkán o/mû o-bángê e Meshúlam o/fu, oca ké kiǐtí-kyise-kyifen-Osówo echi, o-sét ǎ o/fu,

⁴ ca a-kâm Hyíkya mú otu-nchi kyifen-Osówo o-sét ǒ ocím-akpuga mú banchi kyifen-Osówo ḿbé mbe ba-chi i bǎmkpóngé ké ocím-dyifyi-kiǐtí-kyise-kyifen-Osówo echi baa/koo ne banet.

⁵ Sét ǎ a/fu, oyip akpuga ányi o-kye banet-ashí-bǎmkpóngé-banet ḿbé mbe ba-bwât ng byikit ḿbyí byi/bên ké kiǐtí-kyise-kyifen-Osówo echi. Bakúng kányí ba-kye

⁶ bakápyínta ne bambi byise, ba-ré to dyifwá-byichí ne aká nyí ba/kúng ne ba-bwât byikit ámbyi.

⁷ Banet-ashí-bǎmkpóngé ámbe mbe banet ḿbé banong. Ké bubwô ámbu, kyi*fí to ńkyí adabí kámbé a/fu, basét eringe nyí ba/bên kányí*.

⁸ Sháfan o-sét Hyíkya kyitwóm ńkyí otu o/twóm ǎ, ne Hyíkya o-sét ǎ o/fu, nyǐ oo/ri Nwet-Byije-Músis ké kafâ-kiǐtí-kyise-kyifen-Osówo echi. Hyíkya o-kye ǎ nwet ámu, o-kó kámú.

⁹ Ne o-bwa esim kâng o-da-sét otu o/fu, bǎmgbán eyên baa/kúng akpuga nyí a/mû ké kiǐtí-kyise-kyifen-Osówo echi ba-kye banet-ashí-bǎmkpóngé ḿbé byikit ámbyi ebwât.

¹⁰ Ne o-chî ǎ esét o/fu, me mu ne nwet nyín mú Hyíkya o/kye mě. Ne o-kó kámú o-sét otu.

¹¹ Ńdyí Sháfan mu o-kó ng nwet ámu, otu o/ját byídí emen ké bafip,

¹² ne o-kye Hyíkya ne Ahíkam mú wǎn-Sháfan ne Ákobo mú wǎn-Makáya ne Sháfan mú nsâng banwet-otu ne Asáya mú ókpúrúbíp-otu busa ḿbún o/fu,

¹³ ca n̂g ba-da-bí Óburúkpâbí ké bubwô ejí ne ké ḿbú kángkáng banet ḿbé Júda kyi-kim ne byiraa ḿbyí nwet mún o/tángê. Óburúkpâbí mu o-sa ng kafâ ne be, ké nǎ, banchí eten ḿbé kpákpá ba*da/chi ńkyí nwet mún o/fu, ba-man ba-chi*.

¹⁴ Hyíkya ne Ahíkam ne Ákobo ne Sháfan ne Asáya ba-dim ba/fu, mbé ba-da ng ebí onyinyi mú odabángê Húda, mú o/mû mkpábé mú odasét byiraa-Osówo, mú o/mû o-kyú u ké kyikim-Jerúsélem ńkyí kyifyîfî. Otyép emen mú odabángê Shálum, mú wǎn-Tyíkyíba, mú bonchí emen mú kánkán o/mû o-bángê e Háras nké o/mû o-tî ng byídí ḿbyí badabwá ne ba-chi kyifen ké kafâ-kiǐtí-kyise-kyifen-Osówo echi. Mbé ba/sét onyinyi ámu ńkyí kyi/chi,

¹⁵ ne nyǐ o-sét kámbé o/fu, babwa esim ba-da-sét otu

¹⁶ kyitwóm ńkyín ńkyí kyi/fím ne Óburúkpâbí ba/fu, me mu m-bâ ebakye Jerúsélem ne kángkáng banet emen busông, wǎ eringe nyí ba/sáng ké nwet mú otu oo/kó.

¹⁷ Mbé baa/né mě, ba-chi byifen ba-kye esówo ekíri, ké bubwô ámbu, baa/buu kafâ esa ejí ké kángkáng byěm ḿbyí baa/chi. Kafâ ejí nke ka-sa ng mě ne Jerúsélem ne kaa*ba/chi ka-chee*.

¹⁸ Kyi-kim ne otu oyén, něen nké me Óburúkpâbí mú mu Osówo mú Ézerel mu n-sét ng n/fu, wo a/fwôo atông a-jwo ńkyí ba/sáng ké nwet ámu,

¹⁹ ne a/saa byiko, a-shû byiko eyên kyísí ké bushú ejí, a-tii bukyû, a-ját byídí eyên, ké nkéré mú wo a/jwo eringe nyí me nn/tî okabe mú ndakye Jerúsélem ne banet emen busông. N/chi n-chi kámú o-firi chwǒm-kiǐtí-bushî, o-firi kyikit ńkyí banet badakúng dyizîn emen wǎ kyishû. Nké me nn/jwo nshwam eyên,

²⁰ ne mm*ba/chi n-chîkye busông ḿbú n/fu, n-kyâ Jerúsélem* tete wo a-kpú. Me n/chi m-mîng ǒ a-kpú bukyû ḿbú degere. Banyinchéng ámbe ba-bwa ne kyitwóm ńkyín ba-da-sét Otu Josáya.