2 Kyîng 20 - Bokyi Bible

Otu Hezekyâ o/rwôm, o-nyange

¹ Otu Hezekyâ o/róng kyirwóm ńkyí o/nángê o-kpú. Mkpábé mú odasét byiraa-Osówo, mú odabángê Azáya, mú wǎn-Émoz, o-dim ǎ edari, o-sét ǎ o/fu, Óburúkpâbí mu o-sét ng ǒ o/fu, wo abwât byěm a-tî kanong, ké nǎ, wo aa*ba/chi a-nyange*. Kpá byiko ḿbyí adakpú.

² Otu Hezekyâ o-bírî kashú ké ekpe, o-fé nshwam o/fu,

³ zîim, ǎ Óburúkpâbí, a/fu, me nn/fé ǒ kanong kanong ne dyityém ejí, ne nn/kan kángkáng nkéré n/fu, n-chi i ńkyí wo amu a-ryuu ng o/fu, me nchi. Ne o-kpet etii kanong kanong.

⁴ Azáya o-dim o-mîng otu, nké ne o-shwôm ké otyém mú kafâ-kyibám-butu, Óburúkpâbí o/sét ǎ o/fu,

⁵ obwa esim o-kâm Otu Hezekyâ mú mu otu mú banet-Óburúkpâbí, o-da-sét ǎ o/fu, me Óburúkpâbí mú mu Osówo mú Otu Dívit mú bonchí eyên mú kpákpá, nn/jwo nshwam eyên, n-ri batíí eyên. Me n/chi n-chi ǒ a-nyange, ne ké ací achât kyi-fím kurún, wo a/chi a-ca ké kafâ-kiǐtí-kyise-kyifen-Osówo echi.

⁶ Me n/chi m-mîng ǒ a-chîrí aje onyiryiká. Me n/chi n-nyii ǒ ne oshê mún mú Jerúsélem ké abwô nyí otu mú Asyírya. Me n/chi m-bwom bunwa ké oshê mún ké bubwô ḿbú ofê mú ejí ne ké ḿbú ocím mú n/ryí Otu Dívit mú ḿgbán ejí.

⁷ Ne Azáya kâng o-sét bǎmgbán-otu o/fu, bakíbî [byirim-kyichí ńkyí badakó fyîk ba-lák Otu Hezekyâ ké kiimumudúng ńkyí kyi/mut ǎ, ne o/chi o-nyange.]

⁸ Otu Hezekyâ o-bí o/fu, ebóng ekap nyí me n/chi n-kúng ne n-nyît n/fu, Óburúkpâbí o/chi o-chi mě n-nyange, ne ké ací nyí nyi a-bâ achât, me n/chi m-man enung ké kafâ-kiǐtí-kyise-kyifen-Osówo echi.

⁹ Azáya o-faa ǎ o/fu, Óburúkpâbí o/chi o-tông ǒ ekap nyí e/chi e-tông e/fu, nyǐ o/chi o-tî ocím emen mú o/ryí. Kántîk, wo amu a-ryuu ng a/fu, kiǐríribí ńkyí ké [kyikit ńkyí mbe ba-yú u ba-jâ kyíbóng-kyise kyishû ké byikit ḿbyí badakan abe diǐkpú kyi-jâ kyíbóng aa kyísí?]

¹⁰ Otu Hezekyâ o-faa o/fu, kii*sóng echi kiǐríribí kyi-yú ké [abe diǐkpú kyi-jâ kyíbóng*. Chi kánkyí kyi-bwa kyísí ké abe diǐkpú.]

¹¹ Azáya o-fé nshwam o-kye Óburúkpâbí, ne Óburúkpâbí o-chi kiǐríribí ánkyi kyi-bwa kyísí ké [abe diǐkpú, ké kyikit ńkyí mbe ba-cen n ba-yú u ba-jâ kyíbóng-kyise] ńkyí Otu Éhaz o/chi.

Banet-Kyitwóm ḿbé ba/fím Bábyílon

¹² Kyi/nángê kyi-kyú ké nkéré ámu obónge, otu mú Bábyílon mú odabángê Otu Meródak-Baládan, mú wǎn-Baládan o/jwo ba/fu, Otu Hezekyâ mu o-rwôm m, ne o-twóm ǎ léta ne eyáré.

¹³ Otu Hezekyâ o/koo banet-kyitwóm ámbe kanong kanong, o-tông kámbé esang nyí nyǐ o/já, basyílyíba ne bagûl emen, ne bakút-kyinung, ne kángkáng byěm-byití emen. Chwǒm kyi/mû kyi*fí ké banfût ḿbé mbe ba-tî ng byěm* nang ké kyikit kyikíri ké kyikit-butu emen* ńkyí o*da/tông kámbé*.

¹⁴ Ne Azáya o-dim kâng o-kâm Otu Hezekyâ o-bí ǎ o/fu, banet ḿbén ba/fím nyá, ne ba/sét ǒ ebóng. Otu Hezekyâ o-faa o/fu, ba/fím ké oshê mú tíbítíbí, ké Bábyílon.

¹⁵ Azáya o/chîbí o/fu, mbé ba/ri ebóng ké kyibám-butu. Nyǐ o-faa o/fu, ba/ri kángkáng byěm, chwǒm kyi*fí ké banfût ḿbé mbe ba-tî ng byěm* ńkyí n*da/tông kámbé*.

¹⁶ Ne Azáya o-sét kâng otu o/fu, Óburúkpâbí oo/sét o/fu,

¹⁷ nkéré mu o-bâ mú ba/chi ba-kúng kángkáng byěm ḿbyí mbyi ké kyibám-butu eyên ne kángkáng byěm ḿbyí banchí eyên ḿbé kpákpá ba/wuri ba-tî tete kyi-byí kurún, ba-jâ ne mbyí Bábyílon. Baa*mîng nang chwǒm kyibónge*.

¹⁸ Ba/chi ba-kúng kyicê-bwǎn ḿbé eyên wo oyén ba-dim ne mbé ba-da-pê kámbé, ba-kûchi bǎmkpóngé ké kyibám-butu ńkyí otu mú Bábyílon.

¹⁹ Otu Hezekyâ o/kúng ńkyín kyi-byí ǎ kyi/fu, bunyîn-dyityém bu/chi bu-chi ké nkéré mú nyǐ odakyú okpó, ne o-faa o/fu, kyitwóm ńkyí wo a/koo ne Óburúkpâbí a-ba-kye mě kyi/nwa.

Nkuli Kyikû-Butu ḿbú Otu Hezekyâ

²⁰ Kángkáng byěm byikíri ḿbyí Otu Hezekyâ o/chi, byěm-bukân emen ḿbyí o/chi, ne eringe nyí nyǐ o/sím kiǐdé-omu ne owo mú odakûbê ne omu ké kafâ-oshê, ba/sáng kámbyí kángkáng ké Nwet-Akpen ne Biǐshwô ḿbyí batu ḿbé Júda.

²¹ Otu Hezekyâ o/kpú, ne Manáse mú wǎn emen nké o/kúng kyikit emen wǎ otu.