2 Kyîng 2 - Bokyi Bible

Óburúkpâbí o/kúng Elája o-jâ ne Nyǐ Kyíbóng

¹ Nkéré o-ba-fyi mú Óburúkpâbí odakúng Elája ké bufú ḿbú budawáp kerékeré o-jâ ne nyǐ kyíbóng. Elája ne Elásha ba/dim ké Gyígal,

² ne ńdyí mbe ba-cen n ba-câ ké bukwóp, Elája o/sét Elásha o/fu, bwom nyín, Óburúkpâbí oo/sét mě o/fu, me nca Bétel. Nké Elásha o/faa ǎ o/fu, me n/sem ké ofê mú Óburúkpâbí mú mu okpó ne ké ofê mú eyên to n/fu, me mm*ba/chi m-mîng ǒ*. Ne ba-dim kâng ba-wâa Bétel.

³ Dyizu-bamkpábé ḿbé badasét byiraa-Osówo, ḿbé mbe ba-kyú u ké Bétel ba-dim ba-kâm Elásha, ba-bí ǎ ba/fu, wo amu a-nyît ng a/fu, Óburúkpâbí mu o-bâ ebakúng bonchí eyên o-dim o-mîng ǒ kurún? Elásha o-faa o/fu, âa, me mu n-nyît ng, nké byi*dachi byi-raa kyi-kim ne nkyí*.

⁴ Ne Elája o-sét Elásha kâng o/fu, kyú nyín, Óburúkpâbí oo/sét mě o/fu, me nca Jéríku. Nké Elásha o/faa ǎ o/fu, me n/sem ké ofê mú Óburúkpâbí mú mu okpó ne ké ofê mú eyên n/fu, me mm*ba/chi m-mîng ǒ*. Ne ba-dim kâng ba-wâa Jéríku.

⁵ Dyizu-bamkpábé ḿbé badasét byiraa-Osówo, ḿbé mbe ba-kyú u ké Jéríku ba-dim ba-kâm Elásha, ba-bí ǎ ba/fu, wo amu a-nyît ng a/fu, Óburúkpâbí mu o-bâ ebakúng bonchí eyên o-dim o-mîng ǒ kurún? Elásha o-faa o/fu, âa, me mu n-nyît ng, nké byi*dachi byi-raa kyi-kim ne nkyí*.

⁶ Ne Elája o-sét Elásha kâng o/fu, kyú nyín, Óburúkpâbí oo/sét mě o/fu, me nca ké kace ńké Jódan. Nké Elásha o/faa ǎ o/fu, me n/sem ké ofê mú Óburúkpâbí mú mu okpó ne ké ofê mú eyên to n/fu, me mm*ba/chi m-mîng ǒ*. Ne ba-dim kâng ba-ca kashú,

⁷ ne bajam-bamkpábé ḿbé badasét byiraa-Osówo bafee esim diǐkpú ba-dim ne mbé ké kyikû ba-wâa ké kace ńké Jódan. Elája ne Elásha ba/bwom ké bukô-kace, bamkpábé ámbe ba-bwom ké esim cát.

⁸ Ne Elája kâng o-pii ágbádá emen o-fút kányí, o-yip o-díp ké kace. Kace ka-kyii, ne nyǐ ne Elásha ba-nyáng kace ké esí nyí yéyé ba-jâ esim nyí áku.

⁹ Ányi nké Elája o/bí Elásha o/fu, sét mě ńkyí amu a-ryuu ng a/fu, me nchi n-kye ǒ ne ba-kúng mě ba-dim ne me. Elásha o-faa ǎ o/fu, kye mě kyicê-busa eyên ńkyí kyi/chi kyi-chi mě n-kyú onet mú odakúng kyikit eyên.

¹⁰ Elája o-sét ǎ o/fu, ńkyí a/bí éné kyi-sóng ng echi. Nké wo a/chi a-koo busa ámbu â wo a/ri mě ké nkéré ba-kú ba-kúng ng mě n-dim m-mîng ǒ. Â a*da mě eri* aa*koo kámbú*.

¹¹ Mbé ba/wâa ba-pem m ba-câ, ba-cen n ba-câ. Ne ké abe ányi, mútu-okwâ ne bubyî-orá ḿbú mbu bu-tut ng kámú o-byí o-nung kámbé ké otyém, ne bufú ḿbú budawáp kerékeré bu-yip Elája bu-jâ ne nyǐ kyíbóng.

¹² Elásha o/ri ńkyí kyi/chi, ne o-wonge o-kó Elája o/fu, bonchí ejí, kiǐtí-onet-bunwa mú Ézerel, wo aa/jé. Ne o*da/chîri Elája*. Ké bafip, Elásha o-ját ágbádá emen byicê byifee.

¹³ Ne o-kúng kâng ágbádá nyí Elája nyí a/pii ǎ a-róng kyísí, o-bwa esim o-da-bwom ké bukô-kace ńké Jódan.

¹⁴ O-yip ágbádá ányi o-díp ké kace, o-raa o/fu, Óburúkpâbí mú Osówo mú Elája mu nyá. Ne o-chîdíp kace ánke ne ka-kyii, o-cen o-nyáng o-jâ esim nyí áku.

¹⁵ Bamkpábé ámbe ba-ri ǎ, ba-raa ba/fu, busa ḿbú Elája bu/firi Elásha ké byiko. Ba-dim ba-kâm ǎ, ba-tíngê kyísí ké bushú emen,

¹⁶ ba-raa ba/fu, be byimu nyín bajam bafee esim diǐkpú kángkáng ne busa. Byidim byi-da-kyé bonchí eyên. Katô Busun ḿbú Óburúkpâbí boo/kúng ǎ bu-da-mîng kyíbóng-kaku kabónge, kakíri ké kafâ-owo. Elásha o-faa kámbé o/fu, aa*wááng*. Baa*man ba-ca*.

¹⁷ Nké mbé ba/tú dyishí tete Elásha o-mîng kámbé ba-dim. Burwám ebe ámbu bajam bafee esim diǐkpú ba-dim ba-da-kyé Elája ké eku ne ké ewo, ké ací achât, nké ba*da ǎ eri*.

¹⁸ Ne ba-bwa esim kâng ba-kâm Elásha mú o/mû mu o-bám m kámbé ké Jéríku, ne nyǐ o-bí kámbé o/fu, me n*da běn esét n/fu, *da n̂g ece*?

Akat nyí Elásha o/chi

¹⁹ Banet ḿbé ba/fím Jéríku ba/dim ba-kâm Elásha ba-sét ǎ ba/fu, wǎ eringe nyí wo amu a-nyît ng, ǎ bonchí, nyín oshê mú onong, nké omu mú eten oo*nwa* mu o-chi i banyinyi afít a-byí i.

²⁰ Elásha o-sét kámbé o/fu, fé n̂g bano ké dyicáng ńdyí dyifyîfî, ba-kúng ba-bâ mě ne mbé. Ba-kúng kámbé ba-da-kye ǎ,

²¹ ne o-dim o-wâa ké dyijwáng, o-yip bano ámbe o-fé ké omu, o-raa o/fu, něen nké Óburúkpâbí o/raa o/fu, me nn/chi omu mún o-firi kanong, ne oo*ba/chi o-chîchi banet ba-kpú* nang afít a-chîbyí banyinyi*.

²² Kyi-fím ké nkéré ámu kâng, omu ámu o/firi kanong, wǎ eringe nyí Elásha o/sét o/fu, o/chi o-firi kanong.

²³ Elásha o/dim ké Jéríku o/fu, nyǐ o-câ Bétel. Ńdyí mu o-cen n o-câ ké bukwóp, bwǎn-banyinchéng ba/byí ké oshê ba-kpet ǎ efát kiikuku, ba-wonge e ba/fu, dim nyín, ǎ onet-kiǐkpárám-dyishí.

²⁴ Elásha o/bírî achi o-tún kámbé, o-shú kámbé ké dyizîn ńdyí Óburúkpâbí. Ne byibî-enyam byifee byi-fím ké dyikán byi-ba-ját bajam-bwǎn-banyinchéng ámbe bafee esim bafee boǒcê boǒcê.

²⁵ Elásha o-dim o-wâa ké kaku ńké Kámel, ka-bwon o-bwa esim ké Samérya.