2 Kyîng 19 - Bokyi Bible

Otu Hezekyâ o/bí Azáya Bacê

¹ Ńdyí Otu Hezekyâ a-jwo ng ńkyí ba/sét ǎ o-bâ, o-ját byídí emen ké bafip, o-yip byídí-dyikán eta o-fé, o-dim ké kiǐtí-kyise-kyifen echi ńkyí Óburúkpâbí.

² O-twóm Elyǎkim mú onet-dyishí-kyibám-butu ne Shébana mú nsâng banwet-otu ne banchi kyifen-Osówo ḿbé kánkán kyikit-Azáya mú wǎn-Émoz, mú o/mû mkpábé mú odasét byiraa-Osówo. Mbé to ba/mû ba/fé byídí-dyikán eta.

³ Něen nké o/sét kámbé o/fu, basét Azáya ba/fu, kurún, dyicí ńdyí bafip eri. Ba-kú ba-kyâ bě busông, ba-wuri ng bě éshwân. Be byi/firi wǎ onyinyi mú o-kú o-bâ efwon, nké busa bu*fí ǎ ḿbú odafwon*.

⁴ Otu mú Asyírya oo/twóm onet-dyishí-basúja emen o-ba-shú Osówo mú mu okpó. Kyi/bát Óburúkpâbí mú mu Osówo eyên ojwo byishû ḿbyín o-kye banet ḿbé ba/shú ǎ busông. Ké bubwô-ámbu, fé nshwam a-kye Osówo ké bubwô-banet eten ḿbé ba/waa bakpó.

⁵ Ńdyí Azáya o/koo kyitwóm ńkyí Otu Hezekyâ o/twóm,

⁶ Azáya o/twóm ejá ńnyín e-bwa esim e-kâm ǎ o/fu, Óburúkpâbí mu o-sét ng ǒ o/fu, wo a*dachi a-mîng banet ḿbé Asyírya ba-fé ǒ bushî ké byiraa ebe ḿbyí mbe ba-raa ng* ba/fu, nyǐ oo*man ǒ echwáp*.

⁷ Óburúkpâbí o/chi o-chi otu mú Asyírya o-jwo kyitwóm ńkyí kyi/chi kyi-chi ǎ o-bwa esim dyijê ké oshê emen, ne o/chi o-chi ba-ju ǎ.

Banet ḿbé Asyírya ba/chîfé Bushî Bukíri

⁸ Onet-dyishí-basúja ḿbé Asyírya ámu o/jwo ba/fu, otu ebe oo/dim ké Lákyishi o-kú o-nwa ng byití ne oshê mú Lyíbana, mú mu ányi fáráng. Ne o-dim kâng ké oshê ámu o/fu, nyǐ o-da ng epem ne nyǐ.

⁹ Ejá e-kâm banet ḿbé Asyírya ba/fu, Otu Tyiráka mú Sudân oo/kúng basúja ḿbé Éjip o-bâ kámbé bunwa ekye. Ké nkéré mú otu mú Asyírya o/jwo ńkyín, o/twóm léta o-kye Otu Hezekyâ mú Júda,

¹⁰ o-sét ǎ o/fu, Osówo mú wo a/fé dyityém ne nyǐ oo/sét ǒ o/fu, me mm*ba/chi m-kpógê ǒ* nké *dachi a-mîng ńkyí ánkyi kyi-nîm ǒ*.

¹¹ Wo aa/jwo ńkyí otu mú Asyírya odachi oshê nang orá mú nyǐ o/fu, nyǐ o-bên n. Wo a/kabe a/fu, wo a/chi a-fem dí.

¹² Banchí ejí ḿbé kpákpá ba/bên eshê nyí Gózan ne Háran ne Rézep, ba-ju banet ḿbé Bétédin ḿbé ba/mû ba-kyú u ké Telása, osówo ebe nang obónge o*da/man enyii kámbé*.

¹³ Batu ḿbé eshê nyí Hámat ne Ápat ne Sefabîm ne Héna ne Éba mbe nyá.

¹⁴ Otu Hezekyâ o/koo léta ámu ne banet ḿbé ba/twóm kámbé, o-kó kámú. Ne o-dim kâng ké kafâ-kiǐtí-kyise-kyifen-Osówo echi, o-kúng léta ámu o-tî ányi ké bushú ḿbú Óburúkpâbí,

¹⁵ o-fé nshwam o/fu, ô Óburúkpâbí, Osówo mú Ézerel, mú amu ké kakyúng-butu eyên kyíbóng-biǐnyám ámbyi ḿbyí ba/mee ne abyibabang táttát. Wo kǎnchí nké amu Osówo mú mu o-tún n kángkáng batu ḿbé ké ejíí. Wo nké a/chi bubóng ne esí.

¹⁶ Kántîk, ǎ Óburúkpâbí, kan achi a-ri ńkyí nkyi kyi-chi i bě. Fwôo atông a-jwo kángkáng byiraa ḿbyín ḿbyí Otu Senakaríp mu o-raa ng o-shú u ǒ wo Osówo mú mu okpó.

¹⁷ Be kángkáng byimu byi-nyît ng, ǎ Óburúkpâbí, byi/fu, batu ḿbé Asyírya baa/bên eshê chwóó, esí ebe e-firi kafâ dyikáá,

¹⁸ ba-shí kángkáng erím-bakye ebe nyí e/mû e*fí esówo* e/mû erím-bakye-byichí ne aká nké nke nyí banet ba/chi ké abwô ebe.

¹⁹ Kántîk, ǎ Óburúkpâbí mú mu Osówo eten, nyii bě ké abwô nyí banet ḿbé Asyírya, eringe nyí kángkáng eshê nyí ké ejíí e/chi e-nyît e/fu, wo kǎnchí, ǎ Óburúkpâbí, nké amu Osówo.

Kyitwóm ńkyí Azáya o/twóm kyi-kâm Otu Hezekyâ

²⁰ Ne Azáya kâng o-twóm kyitwóm o-sét Otu Hezekyâ o/fu, ké nshwam mú otu o/fé,

²¹ Óburúkpâbí oo/faa o/fu, oshê mú Jerúsélem mu o-jwó ng ǒ, o-fát ng ǒ kiikuku, ǎ Otu Senakaríp.

²² Wo a/kabe a/fu, amu a-shú u yeě, a-fát ng ǎ kiikuku. Wo a*da mě ekye ofê* me Osówo mú mu kanong, mú Ézerel.

²³ Wo a/twóm banet-kyitwóm eyên a/fu, baba-tông byiko ké bushú ejí, a/fu, wo aa/kúng kángkáng bamútu eyên ḿbé bubyî-orá budatut a-kpógê eku nyí e/nyâam e-shwôm ké Lebánon. Wo a/tông byiko a/fu, ké eku ányi, wo a/twom byichí-séda ḿbyí byi/kwóp byi-shwôm, ne byichí-sápurus ḿbyí byi/nwa byi-shwôm, wo a-nung ké kafâ-kyizinge ńkyí ké kafâ ké kafâ.

²⁴ Wo aa/nyîim esim a/fu, wo a/sím abíng, a-jwáp omu ké nyǐ ké esí-bacinbánet, basúja eyên ba-cím kace ńké Nâl ka-núng.

²⁵ Wo a*da/jwo ne a/fu, me nké n/chi kyikû ké esim n/fu, byěm ḿbyín kángkáng byichi*? Ne kántîk nn/chi kámbyí. Me n/kye ǒ busa n/fu, bírî eshê nyí ba/bi ekpe ba-wâng kányí e-firi dyizu-biǐbyém.

²⁶ Banet ḿbé ba/mû ba-kyú u ké eshê ányi ba*fí ne busa*. Bushî bu/róng kámbé, asa a-man kámbé. Mbé ba/mû wǎ aro nyí ké kyifát ne wǎ biǐbyâa ḿbyí byidabyí ké mbwôm-kyise [ké nkéré mú kiǐsínsóng-bufú ḿbú budafím ké kyicê ńkyí esû edabyí kyidashí kámbyí.]

²⁷ Nké me mu n-nyît ng kángkáng byěm kyi-kim ne wo, byěm ḿbyí amu a-chi i ne kyikit ńkyí amu a-wâa ng. Me mu n-nyît ng eringe nyí wo amu a-bírî ng bunwa ne me.

²⁸ Me nn/koo ejá kyi-kim ne bunwa ámbu ne byiko eyên etông ámbyi, ne kántîk, n/chi n-fé ǒ byílôp ké ozóng, n-fé ǒ kaǎkím-kaǎré ké ocím, n-kúng ǒ ké kiǐfáng ńkyí a/cen ne a-bâ, a-bwa esim.

²⁹ Ne Azáya o-sét Otu Hezekyâ o/fu, nyín ekap nyí chwǒm ńkyí kyi/chi kyi-chi. Ké dyije ńdyín ne nnyinyěng, wo a/chi a-ryí esang-byichí-dyikán nké nke. Nké ké orî-dyije, wo a/chi a-man ekwón esang-byichí nyí eyên, a-bóng kányí, a-kwón byichí, a-ryí byirim emen.

³⁰ Banet ḿbé Júda, ḿbé ba/chi ba-kpen ba/chi ba-byet wǎ byichí ḿbyí eriri ebe e/jé kyísí kyísí, byi-zím byirim.

³¹ Banet ba/chi ba-kyú ké Jerúsélem ne ké kaku ńké Záyon ḿbé ba/chi ba-waa bakpó, ké nǎ, Óburúkpâbí oo/tî dyityém o/fu, ńkyín kyichi.

³² Něen nké Óburúkpâbí oo/raa kyi-kim ne otu mú Asyírya. O/fu, oo*ba/chi o-nung ké oshê mún* o-ché nang dyibán dyibónge ké mǔ*. Súja nang obónge mú mu ne édem mú o/chi o-fárâng kámú o*fí* ne baa*ba/chi ba-bi kyikit nang kyibónge* ńkyí ba/chi ba-yú ké ekpe emen*.

³³ Nyǐ o/chi o-bwa esim ké kiǐfáng ńkyí o/cen ne o-bâ, ké oshê mún oo*nung*. Me Óburúkpâbí nké n/sét.

³⁴ Me n/chi m-bwom bunwa ké oshê mún, n-ku kámú, ké bubwô ḿbú ofê mú ejí ne ké bubwô-ocím mú n/ryí Otu Dívit mú ḿgbán ejí.

³⁵ Ké buchú ámbu, orím mú Óburúkpâbí o/ce ké bampyep-byití ḿbé banet-Asyírya o-da-ju égot-basúja etánge etánge ké bajam-égot-byikit banyii ne bajam-byikit nyâchât esim byitánge. Ńdyí dyicófóróng dyi/cé ké orî-dyicí, basúja ámbe ashí kángkáng ba/firi byikwóm kyísí.

³⁶ Ne Otu Senakaríp mú otu mú Asyírya o-bwa esim dyijê Nyínyíve.

³⁷ Dyicí dyibónge, ńdyí nyǐ mu o-fâ nshwam ké kyise-kyifen echi ńkyí osówo emen mú badakó Nyísorok, bwǎn emen ashí afee, Adaramélek ne Sharéza, ba/yip bushwám ba-ju ǎ, ba-chêe ba-jâ ké esí nyí Arárat. Esahádon mú wǎn emen mú obónge o-kúng kyikit emen wǎ otu.