2 Kyîng 18 - Bokyi Bible

Otu Hezekyâ mú Júda

¹ Ké aje achât nyí Otu Hoshâ mú wǎn-Éla o/ryí butu ké Ézerel, Hezekyâ mú wǎn-Otu Éhaz o/ryí butu ké Júda,

² nké nkéré o/mû aje bujam ne atánge, ne o/kyú otu ké Jerúsélem ké aje bujam esim kátángekányi. Boné emen o/mû o-bángê e Abyíja, mú wǎn-Zákaryâ.

³ Ké édúú nyí Otu Dívit mú bonchí emen mú kpákpá nyí nyǐ o/kúng, nyǐ o/chi ńkyí kyi/nyîn Óburúkpâbí.

⁴ Nyǐ o/bên byikit ḿbyí ba/mû ba-sháng ng bakye, o-sé aká-ociring, o-bên erím-bakye nyí Ashéra mú osówo-onyinyi. O/sé to efyi nyí Músis o/mû o/mee ké borôn rugirugi, nyí ba/mû ba-kó ng kányí Nehúshítan. Tete kyi-ribi ké nkéré ámu, banet ḿbé Ézerel ba/mû ba-shí i burwan ba-kyâ kányí ofê.

⁵ Otu Hezekyâ o/fé dyityém ne Óburúkpâbí mú Osówo mú Ézerel. Banet ḿbé Júda ba*da/chîjá ne otu okíri wǎ nyǐ* nang ké nkéré mú kashú*.

⁶ Nyǐ o/fé dyityém ne Óburúkpâbí, o*da/né chwǒm emen nang kyibónge echi* ne o/tî kángkáng byije kanong kanong ḿbyí Óburúkpâbí o/kye Músis.

⁷ Ké bubwô ámbu, Óburúkpâbí o/mû ne nyǐ ké kyikû, ne kángkáng byěm ḿbyí o/chi byi/ce ǎ kanong. Nyǐ o/bírî bunwa ne otu mú Asyírya, o-né o/fu, nyǐ oo*kye ǎ to ofê*.

⁸ Nyǐ o/kpógê banet ḿbé Fyilíta, o-bên eshê ebe kyi-fím ké mú o/sîi o-shwôm tete kyi-ribi ké mú o/rêe o-shwôm, cibicibi ne Gáza ne esí nyí e/fárâng kámú.

⁹ Ké aje anyii nyí Otu Hezekyâ o/ryí butu, ányi kii/rí aje káchâtkányi nyí Otu Hoshâ o/ryí butu ké Ézerel, Otu Shamanéze mú Asyírya o/bê bunwa ne Ézerel, o-wâng Samérya.

¹⁰ Ńdyí byití ámbyi byi/rí aje achât, Samérya o-róng. Ányi kii/rí aje nyâchât nyí Otu Hezekyâ o/ryí butu, ne aje kátángekányi nyí Otu Hoshâ o/ryí butu.

¹¹ Otu mú Asyírya o-kúng banet ḿbé Ézerel o-dim ne mbé Asyírya wǎ básóng, o-da-tî kyicê ké oshê mú Hála, kyicê fáráng ne kace ńké Hábu, ké kyikim-oshê ńkyí Gózan, ne kyicê ké eshê nyí Médya.

¹² Samérya o/róng, ké nǎ, banet ḿbé Ézerel ba*da/chi ńkyí Óburúkpâbí mú mu Osówo ebe o/sét kámbé*. Nké ba/bên ocím mú o/mû o/ryí ne mbé, ba-bên kángkáng byije ḿbyí Músis mú ḿgbán-Óburúkpâbí o/kye. Mbé ba*da/jwo* ne ba*da/chi ńkyí o/sét kámbé*.

Banet ḿbé Asyírya ba/kan ba/fu, mbé ba-nwa ng ne Jerúsélem

¹³ Ké aje diǐkpú ne anyii nyí Otu Hezekyâ o/ryí butu, Otu Senakaríp mú otu mú Asyírya o/kye eshê-Júda nyí ba/bi ekpe ba-wâng kányí bunwa, o-kpógê kányí.

¹⁴ Otu Hezekyâ o-twóm kyitwóm kyi-kâm Otu Senakaríp mú o/mû ké Lákyishi o/fu, me nn/chi kyibî. Kamgbe, mîng bunwa eyên, me n/chi n-kye ǒ nang ebóng ńkyí amu a-ryuu ng. Ejá nyí Otu Senakaríp o/kye e/mû něen, o/fu, Otu Hezekyâ otwóm ǎ égot-bakyílogaram-syílyíba etánge etánge ké byikit diǐkpú ne égot-bakyílogaram-gûl etánge.

¹⁵ Otu Hezekyâ o-twóm ǎ kángkáng syílyíba mú o/mû ké kiǐtí-kyise-kyifen-Osówo echi ne mú ba/mû ba-tî ng ké kyibám-butu.

¹⁶ O/bâa to gûl mú ba/mû ba/lák ké afyi nyí kiǐtí-kyise-kyifen-Osówo echi ne gûl mú nyǐ oyén o/mû o/lák byichí-afyi, o-twóm kámú kángkáng ba-kye Otu Senakaríp.

¹⁷ Otu mú Asyírya o-twóm bujê-basúja ba-fím ké Lákyishi o/fu, bada-kye Otu Hezekyâ bunwa ké Jerúsélem. Basúja ámbe ba/mû ké abwô nyí banet-ashí-basúja ḿbé kánkán bachât. Ké nkéré mú ba/ribi ké Jerúsélem, mbé ba/kyú ké bukwóp ḿbú kyikit ńkyí banet ḿbé mbe ba-chi i byídí mbe ba-chi i bǎmkpóngé, ké owo mú omu mú mu o-fím m ké kiǐdé ńkyí bushûyû mu o-sen n.

¹⁸ Ne ba-twóm kâng ba/fu, bakó Otu Hezekyâ ne banet-ashí-bǎmkpóngé emen ashí achât ba-ca ba-kâm kámbé. Banet-ashí ámbe ba/mû Elyǎkim mú wǎn-Hyíkya, mú o/mû onet-dyishí-kyibám-butu ne Shébana mú nsâng banwet-otu ne Jówa mú wǎn-Ásap, mú o/mû o-tî ng banwet.

¹⁹ Onet-dyishí-basúja ḿbé Asyírya obónge o-sét kámbé o/fu, otu mu o-ryuu ng o/fu, nyǐ o-nyît ng chwǒm ńkyí nkyi kyi-jang ng erêe Otu Hezekyâ dyityém.

²⁰ O-bí o/fu, ben bamu ba-kabe ng ba/fu, ejá e-man n ekúng kyikit ńkyí busa ḿbú byití? Ben ba/kabe ba/fu, yeě o/chi o-chwáp běn ba-bírî bunwa ne Asyírya.

²¹ Ben bamu ba-tî ng achi ba/fu, Éjip e/chi e-chwáp běn, nké ńkyí ánkyi kyi/chi kyi-kyú wǎ onet mú odayip kyiká-kiǐbyâa wǎ ochí-bucen. Kyi/chi kyi-byíryî, kyi-tím běn ké bubwô. Éné nké otu mú Éjip mu, â nang yeě nké o/fé dyityém ne nyǐ.

²² Onet-dyishí-Asyírya ámu o-raa o-ca kashú o/fu, ba-man n mě esét ba/fu, ben ba/jêem esim ne Óburúkpâbí mú mu Osówo enen? Byikit-byifen echi ḿbyí Óburúkpâbí nké Otu Hesekyâ o/bên, ké nkéré mú o/sét banet ḿbé Júda ne Jerúsélem o/fu, bakûfé Osówo ké kyikit-kyifen echi ńkyí nkyi ké Jerúsélem nké nke.

²³ Me n/chi n-ryí ocím ne ben ké dyizîn ńdyí otu mú Asyírya. Me n/chi n-kye běn égot-bubyî-orá diǐkpú â ben ba/chi ba-já banet ḿbé badayú kámbú.

²⁴ Ben ba*da/fyi nang ké onet-dyishí-basúja mú Asyírya mú wǎsíng* ne bamu ba-tî ng achi ba/fu, Éjip etwóm běn bamútu ḿbé bubyî-orá budatut ne banyû bubyî-orá.

²⁵ Ben ba/kabe ba/fu, *chí Óburúkpâbí nké o/chwáp mě ne n-kye oshê enen bunwa m-bên kámú? Óburúkpâbí oyén nké o/sét mě o/fu, me nkye kámú bunwa, m-bên kámú.

²⁶ Ne Elyǎkim ne Shébana ne Jówa ba-sét mú onet-dyishí-basúja ámu ba/fu, bonchí, raa ne be ké Aramîk. Be byi-jwo ng oshê ámu. *Dachi a-raa Hyíburu*. Kángkáng banet ḿbé mbe kyíbóng-ekpe mbe ba-jwo ng.

²⁷ Nyǐ o-faa o/fu, ben bamu ba-kabe ng ba/fu, ben nké nke nké otu mú Asyírya o/twóm mě o/fu, me nraa ne ben? Aa*wááng* me mu n-raa ng to ne banet ḿbé ba/yú ba-kyú ké ekpe, ḿbé ba/chi ba-ryí abîng ebe, ba-jwáp basa ebe wǎ eringe nyí ben to ba/chi ba-chi.

²⁸ Ne onet-dyishí-basúja ámu o-bûu nensang o-raa ké Hyíburu ne ejá kyíbóng kyíbóng o/fu, fwôo n̂g atông ba-jwo ńkyí otu mú Asyírya mu o-sét ng běn.

²⁹ Mu o-kuri ng běn ekó o/fu, ben ba*dachi ba-mîng Otu Hezekyâ o-nîm běn*. Otu Hezekyâ oo*man běn enyii*.

³⁰ *Da n̂g echi ba-mîng ǎ o-chi běn ba-jêem esim ne Óburúkpâbí*. *Da n̂g echi ba-kabe ba/fu, Óburúkpâbí o/chi o-nyii běn* ne o/chi o-níbî basúja eten ḿbé Asyírya baa*kpógê oshê enen*.

³¹ *Da n̂g ejwo Otu Hezekyâ*. Otu mú Asyírya mu o-sét ng běn o/fu, ben babyí ké kafâ-oshê ba-zú abwô ké bunwa. Byi/chi byi-mîng běn ashí enen amúmú ba-ryí byirim-byichí ḿbyí ben bayén ba/kwón, ba-jwáp omu ké abíng-omu enen,

³² tete otu mú Asyírya o-da-tî běn ké oshê mú mu wǎ mú enen, ké kyikit ńkyí byifát-byirim-byichí mbyi kô, ḿbyí badachi bato ne esang-byichí nyí badachi berêt. Esí ányi nyi ne ólif ne bakút-ólif ne bakút-bukwan. Â ben ba/chi ńkyí nyǐ mu o-sét ng, ba/chi ba-kpen, baa*ba/chi ba-kpú*. *Da n̂g echi ba-mîng Otu Hezekyâ o-nîm běn o/fu, Óburúkpâbí o/chi o-nyii běn*.

³³ Esówo nyí eshê nyí áku e/man enyii eshê ebe ké abwô nyí otu mú Asyírya?

³⁴ Esówo ányi nyi nyá, esówo nyí Hámat ne Ápat. Esówo nyí Sefabîm ne Héna ne Éba nyi nyá. Mu kô nang obónge mú o/nyii Samérya?

³⁵ Nkéré orá mú esówo ńnyín nang obónge oo/nyii eshê ebe ńnyín ké abwô nyí otu mú eten. Ebóng kâng nkyi kyi-chi i běn ba-kabe ng ba/fu, Óburúkpâbí o/chi o-man n enyii Jerúsélem.

³⁶ Banet ḿbé ba/mû ányi ba/cíbî pyêp wǎ eringe nyí Otu Hezekyâ o/mû o/sét kámbé. Ba*da/faa nang ojá*.

³⁷ Ne Elyǎkim ne Shébana ne Jówa ba-ját byídí ebe ké bafip, ba-dim ba-da-sét otu ńkyí onet-dyishí-basúja ḿbé Asyírya o/sét.