2 Kyîng 16 - Bokyi Bible

Otu Éhaz mú Júda

¹ Ké aje onyiryiká ne afee nyí Otu Péka mú wǎn-Remalyâ o/ryí butu ké Ézerel, Éhaz mú wǎn-Otu Jótam o/ryí butu ké Júda,

² ńdyí oo/rí aje bujam, ne o/kyú otu ké Jerúsélem ké aje onyiryiká ne din. Nyǐ o*da/kúng édúú nyí enong nyí Otu Dívit mú bonchí emen mú kpákpá*. O/bwa o-chi ńkyí kyi*da/nyîn Óburúkpâbí mú mu Osówo emen*.

³ Nyǐ o/kúng édúú nyí batu ḿbé Ézerel. O/kúng ne wǎn emen mú onyinchéng o-shí ǎ o-kye erím-bakye, o-kúng banunut-édúú nyí banet ḿbé Óburúkpâbí o/mû o/ró kámbé ké esí ányi, ńdyí banet ḿbé Ézerel mbe ba-bâ.

⁴ Ké byikit ḿbyí mbe ba-sháng ng bakye, ké eku ne ké kángkáng byichí ḿbyí mbyi ne asi, Otu Éhaz o/chi byifen, o-shí burwan.

⁵ Otu Rézen mú Syírya ne Otu Péka mú Ézerel ba/kye Jerúsélem bunwa, ba-wâng kámú, nké ba*da/man ekpógê Otu Éhaz*.

⁶ Ké nkéré ámu obónge, [otu mú Édom] o/chîkoo oshê mú Élat, o-ró kángkáng banet ḿbé Júda ḿbé ba/mû ba-kyú u ányi. Banet ḿbé Édom ba-kyú ké Élat, ne ba/tôong ba-kyú u ányi.

⁷ Otu Éhaz o/twóm banet ba-ca kyikit-Otu Tyígalat-Pyílese mú otu mú Asyírya ne kyitwóm ńkyín o/fu, me n-chi i ḿgbán eyên mú mu o-fâ ǒ. Bâ a-ba-nyii mě ké abwô nyí otu mú Syírya ne mú Ézerel, ḿbé mbe ba-kyâ mě bunwa.

⁸ Otu Éhaz o/kúng gûl ne syílyíba mú o/mû ké kiǐtí-kyise-kyifen-Osówo echi ne mú mbe ba-tî ng ké kyibám-butu o-twóm wǎ eyáré ba-kye otu ámu.

⁹ Otu Tyígalat-Pyílese o/jwo arông nyí ba/tîm ǎ, o-bâ ne basúja emen o-ba-nwa ne oshê mú Damásákus, o-koo kámú, o-ju Otu Rézen, o-kám banet o-jâ ne mbé oshê mú Kî wǎ bamgbokobá.

¹⁰ Ké nkéré mú Otu Éhaz o/dim Damásákus o/fu, nyǐ o-da ng eri Otu Tyígalat-Pyílese, nyǐ o/ri kyikit-kyifen echi áku, ne o-sáng kángkáng eringe nyí badachi kánkyí kerededet o-twóm ba-kye Oráya mú nchi kyifen-Osówo.

¹¹ Ne Oráya o-bi kyikit-kyifen wǎ eringe nyí ba/sáng ba-kye ǎ, o-man kánkyí ne Otu Éhaz o-fyi.

¹² Ńdyí o/fyi Damásákus, Otu Éhaz o/ri o/fu, kyikit-kyifen echi ánkyi kii/man,

¹³ ne o-shí enyam ne esang-byichí o-chi kyifen ké nkyí. O-pwó to bato-kyifen ne baróng ḿbé kyifen ńkyí kyikwáré ne Óburúkpâbí ké nkyí.

¹⁴ Kyikit-kyifen echi ńkyí ba/chi ké borôn ba-jware ba-kye Óburúkpâbí kyi/mû ké otyém ne otyém mú kyikit-kyifen echi ńkyí kyifyîfî ne kiǐtí-kyise-kyifen-Osówo echi. Ne Otu Éhaz kâng o-yip kánkyí o-tî ké kyicê ńkyí bushûyû-kyikit-kyifen echi emen ńkyí kyifyîfî.

¹⁵ Ne o-sét Oráya o/fu, kúng kiimbâng-kyikit-kyifen echi ejí ńkyín a-kûchi byifen-dyicófóróng ḿbyí badashí byirim-byitú ne ḿbyí dyikurúku, ḿbyí esang-byichí, a-kûchi to byifen ḿbyí badashí oshǐng ne ḿbyí esang-byichí, ḿbyí otu ne banet ḿbé kwán ne byifen-bato ebe. Kúng kángkáng baróng-enyam ḿbé badachi kyifen a-pwó ké nkyí. Nké tî mě kyikit-kyifen echi ńkyí borôn n-kûsô epé ké nkyí.

¹⁶ Oráya o/chi wǎ eringe nyí otu o/sét ǎ.

¹⁷ Otu Éhaz o/kúng byěm-borôn ḿbyí badabírî atû, ḿbyí mbyi ké kiǐtí-kyise-kyifen-Osówo echi o-fîm byipang ebe ne acáng nyí ba/mû ba/twôom ké mbyí. O/kúng to kiimbâng-dyicáng-borôn ńkyí ba/mû ba/twôom ké bampong ḿbé ba/mee ké borôn diǐkpú ne bafee o-twôom ké aká nyí ba/fé kyísí. [

¹⁸ Eringe nyí o/chi o-chi kyi-nyîn otu mú Asyírya, o/bú to kyikit ńkyí badatî kakyúng-butu ké kafâ-kiǐtí-kyise-kyifen-Osówo echi, o-cít dyifyi ńdyí otu kǎnchí odacen ne o-nung ké kafâ-kiǐtí-kyise-kyifen-Osówo echi.]

¹⁹ Kángkáng byěm byikíri ḿbyí Otu Éhaz o/chi, ba/sáng kámbyí ké Nwet-Akpen ne Biǐshwô ḿbyí batu ḿbé Júda.

²⁰ Otu Éhaz o/kpú, ba-ryii ǎ ké oryii-batu, ké oshê mú Otu Dívit, ne Hezekyâ mú wǎn emen o-kúng kyikit emen wǎ otu.