2 Kyîng 15 - Bokyi Bible

Otu Ozáya mú Júda

¹ Ké aje bujam esim káchâtkányi nyí Otu Jérobâm mú nnyinyěng o/ryí butu ké Ézerel, Osáya mú wǎn-Amazáya o/ryí butu ké Júda,

² ńdyí oo/rí aje onyiryiká ne din, ne o/kyú otu ké Jerúsélem ké bajam-aje bafee esim diǐkpú ne afee. Boné emen o/mû o-bángê e Jekolyâ, mú o/fím Jerúsélem.

³ Ké kyiká-édúú ńkyí bonchí ńkyí o/kúng, nyǐ o/chi ńkyí kyi/nyîn Óburúkpâbí.

⁴ Nké o*da/bên byikit ḿbyí ba/mû ba-sháng ng bakye* ne banet ba/ce kashú ba-chi i byifen, ba-shí i burwan ké byikit ámbyi.

⁵ Óburúkpâbí o/twóp Otu Ozáya kyibî-orwôm ńkyí kyi*da/man* tete o-kpú. Nyǐ o/kyú ké kyise ńkyí emen nyǐ oyén, o-zú abwô ké kángkáng bǎmkpóngé-butu o-kye Jótam mú wǎn emen o-kûtún oshê.

⁶ Kángkáng byěm byikíri ḿbyí Otu Ozáya o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Júda.

⁷ Otu Ozáya o/kpú, ba-ryii ǎ ké akun-batu, ké oshê mú Otu Dívit, ne Jótan mú wǎn emen o-kúng kyikit emen wǎ otu.

Otu Zákaryâ mú Ézerel

⁸ Ké aje bujam esim onyiryiká ne achât nyí Otu Ozáya o/ryí butu ké Júda, Zákaryâ mú wǎn-Jérobâm mú nnyinyěng o/ryí butu ké Ézerel, ne o/kyú otu ké Samérya ké etukáku nyâchât.

⁹ Wǎ batu ḿbé ba/shwôm ké esim, nyǐ o/chi kyibî ké bushú ḿbú Óburúkpâbí. Nyǐ o/kúng byibî-édúú ḿbyí Otu Jérobâm mú wǎn-Nébat, mú o/chi Ézerel ba-róng ké kyibî.

¹⁰ Shálum mú wǎn-Jábeshi o/nam Otu Zákaryâ dyiju, ne o-ju ǎ [ké Ébyam,] o-kúng kyikit emen wǎ otu.

¹¹ Kángkáng byěm byikíri ḿbyí Otu Zákaryâ o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

¹² Ké bubwô ámbu, kyi/chi wǎ ocím mú Óburúkpâbí o/mû o/ryí Otu Jéhu o/fu, bwǎn eyên tete kyi-ribi ké byikim-banet byinyii ba/chi ba-kyú batu ké Ézerel.

Otu Shálum mú Ézerel

¹³ Ké aje bujam esim onyiryiká ne anyii nyí Otu Ozáya o/ryí butu ké Júda, Shálum mú wǎn-Jábeshi o/ryí butu ké Ézerel, ne o/kyú otu ké Samérya ké otukáku obónge.

¹⁴ Menáhem mú wǎn-Gádyi o/dim ké Tyíza o-wâa Samérya, o-da-ju Otu Shálum, o-kúng kyikit emen wǎ otu.

¹⁵ Kángkáng byěm byikíri ḿbyí Otu Shálum o/chi, cibicibi ne eringe nyí o/nam Otu Zákaryâ dyiju, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

¹⁶ Ńdyí Otu Menáhem o/fím Tyíza mu o-câ ké bukwóp, nyǐ o/bên oshê mú [Tápwa] kángkáng ne banet emen ne eshê nyí e/fárâng ányi, ké nǎ, oshê ámu o*da/jwâa asa o-kye ǎ*. O-tím ne banyinyi ḿbé ba/mû ne afít boompyi ké afít, bwǎn ba-byí kyíjí.

Otu Menáhem mú Ézerel

¹⁷ Ké aje bujam esim onyiryiká ne anyii nyí Otu Ozáya o/ryí butu ké Júda, Menáhem mú wǎn-Gádyi o/ryí butu ké Ézerel, ne o/kyú otu ké Samérya ké aje diǐkpú.

¹⁸ Nyǐ o/chi kyibî ké bushú ḿbú Óburúkpâbí, o-kúng kyibî-édúú ńkyí Otu Jérobâm mú wǎn-Nébat, mú o/chi banet-Ézerel ba-róng ké kyibî, tete o-kpú.

¹⁹ Otu Tyígalat-Pyílese mú otu mú Asyírya o/kye Ézerel bunwa, ne Otu Meháhem o-kye ǎ égot-bakyílogaram-syílyíba etánge etánge ké byikit bujam esim diǐkpú ne byinyii eringe nyǐ odabángê ne nyǐ o-fé Otu Menáhem busa ḿbú odawaa otu ké oshê.

²⁰ Otu Menáhem o/koo akpuga ányi ne banfang-banet ḿbé ké Ézerel ké busa, o-tírîng nang yeě nang yeě o-kye bajam-akpuga-basyílyíba bafee esim diǐkpú. Ne Otu Tyígalat-Pyílese o-bwa kâng esim dyijê ké oshê emen.

²¹ Kángkáng byěm byikíri ḿbyí Otu Menáhem o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

²² Nyǐ o/kpú, ba-ryii ǎ, ne Pekahyâ mú wǎn emen o-kúng kyikit emen wǎ otu.

Otu Pekahyâ mú Ézerel

²³ Ké bajam-aje bafee esim diǐkpú nyí Otu Ozáya o/ryí butu ké Júda, Pekahyâ mú wǎn-Otu Menáhem o/ryí butu ké Ézerel, ne o/kyú otu ké Samérya ké aje afee.

²⁴ Nyǐ o/chi kyibî ké bushú ḿbú Óburúkpâbí, o-kúng kyibî-édúú ńkyí Otu Jérobâm mú wǎn-Nébat, mú o/chi Ézerel ba-róng ké kyibî.

²⁵ Onet-dyishí-basúja ḿbé Otu Pekahyâ, mú odabángê Péka, mú wǎn-Ramalyâ o/cibi ne bajam-banet bafee esim diǐkpú ḿbé ba/fím Gyílet, ba-ju Otu Pekahyâ ké kyise ńkyí badabwom ba-nwa byití, ńkyí ké kafâ, ké kyibám-butu, ké Samérya, Péka o-kúng kyikit emen wǎ otu.

²⁶ Kángkáng byěm byikíri ḿbyí Otu Pekahyâ o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

Otu Péka mú Ézerel

²⁷ Ké bajam-aje bafee esim-aje diǐkpú ne afee nyí Otu Ozáya o/ryí butu ké Júda, Péka mú wǎn-Ramalyâ o/ryí butu ké Ézerel, ne o/kyú otu ké Samérya ké aje bujam.

²⁸ Nyǐ o/chi kyibî ké bushú ḿbú Óburúkpâbí, o-kúng kyibî-édúú ńkyí Otu Jérobâm mú wǎn-Nébat, mú o/chi Ézerel ba-róng ké kyibî.

²⁹ Kyi/mû ké nkéré mú Otu Péka o/mû otu nké Otu Tyígalat-Pyílese mú otu mú Asyírya o/koo eshê nyí Éjon ne Ébel-Bét-Máka ne Jánwa ne Kédeshi ne Házo ne byikim-esí ḿbyí Gyílet ne Gályílyi ne Nafatályi, o-kám banet o-dim ne mbé Asyírya wǎ básóng.

³⁰ Ké aje bujam nyí Jótan mú wǎn-Otu Ozáya o/ryí butu ké Júda, Hoshâ mú wǎn-Éla o/nam Otu Péka dyiju ne o-ju ǎ, o-kúng kyikit emen wǎ otu.

³¹ Kángkáng byěm byikíri ḿbyí Otu Péka o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

Otu Jótan mú Júda

³² Ké nnyinyěng-dyije ńdyí Otu Péka mú wǎn-Remalyâ o/ryí butu ké Ézerel, Otu Jótam mú wǎn-Otu Ozáya o/ryí butu ké Júda,

³³ ké nkéré mú oo/rí aje bujam ne atánge, ne o/kyú otu ké Jerúsélem ké aje onyiryiká ne din. Boné emen o/mû o-bángê e Jerúsha, mú o/mû wǎn-Zádok.

³⁴ Ké édúú nyí Otu Ozáya mú bonchí emen nyí o/kúng, Otu Jótam o/chi ńkyí kyi/nyîn Óburúkpâbí.

³⁵ Nké o*da/bên byikit ḿbyí ba/mû ba-sháng ng bakye* ne banet ba/ce kashú ba-chi i byifen, ba-shí i burwan ké byikit ámbyi. Otu Jótam nké o/fé dyifyi ńdyí badakó Bushûyû, ńdyí ké kiǐtí-kyise-kyifen-Osówo echi.

³⁶ Kángkáng byěm byikíri ḿbyí Otu Jótam o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Júda.

³⁷ Kyi/mû ké nkéré mú nyǐ o/mû otu nké Óburúkpâbí o/kpet etwóm Otu Rézen mú Syírya ne Otu Péka mú Ézerel o/fu, baba-kye Júda bunwa.

³⁸ Otu Jótam o/kpú, ba-ryii ǎ ké oryii mú batu, ké oshê mú Otu Dívit, ne Éhaz mú wǎn emen o-kúng kyikit emen wǎ otu.