2 Kyîng 13 - Bokyi Bible

Otu Jehóháhaz mú Ézerel

¹ Ké aje bujam ne achât nyí Otu Jówashi mú wǎn-Otu Aháza o/ryí butu ké Júda, Jehóháhaz mú wǎn-Otu Jéhu o/ryí butu ké Ézerel, ne o/kyú otu ké Samérya ké aje onyiryiká ne afee.

² Wǎ Otu Jérobâm mú o/mû o/chi kyibî, Otu Jehóháhaz to o/chi kyibî ké bushú ḿbú Óburúkpâbí, o-chi Ézerel ba-chi kyibî. O*da/mîng byibî-akwóp emen*.

³ Ké bubwô ámbu, kafâ ka/sa Óburúkpâbí ne Ézerel, ne o-mîng Otu Házil mú Syírya ne wǎn emen Otu Benhádat ba-kpógê Ézerel kampén kampén.

⁴ Ne Otu Jehóháhaz o-fé nshwam kâng o-kye Óburúkpâbí, ne ńdyí Óburúkpâbí o/ri dyizong-kyibî-ocît ńkyí otu mú Syírya o/mû o-cít ng banet ḿbé Ézerel, o-jwo nshwam emen.

⁵ Óburúkpâbí o/twóm kámbé onet-dyishí mú o/chi kámbé ba-fem ké abwô nyí banet ḿbé Syírya, ne ké bubwô ámbu, ba-kyú ké bunyîn-dyityém wǎ eringe nyí ba/mû ba-kyú u kpákpá.

⁶ Nké mbé ba*da/mîng byibî ḿbyí Otu Jérobâm o/chi Ézerel ba-nung*. [Ba/waa ba-chi i kámbyí ba-câ kashú,] ne orím-bukye mú Ashéra, mú osówo-onyinyi o/waa ké Samérya.

⁷ Otu Jehóháhaz o/mû o*fí to ne basúja chwóó* kyi-cibi ne banyû bubyî-orá bajam bafee esim diǐkpú* ne bamútu diǐkpú ḿbé bubyî-orá budatut* ne bajam-égot-basúja ḿbé badacen kyísí bafee esim diǐkpú* ké nǎ, otu mú Syírya o/mû oo/ju burwám ḿbú áku, o-cím kámbé o-fé kyísí wǎ édúkǎndú.

⁸ Kángkáng byěm byikíri ḿbyí Otu Jehóháhaz o/chi, ne kángkáng byěm-bukân emen, ba/sáng kámbyí ké Nwet-Akpen ne Biǐshwô ḿbyí Batu ḿbú Ézerel.

⁹ Nyǐ o/kpú, ba-ryii ǎ ké Samérya, ne Jehóháshi mú wǎn emen o-kúng kyikit emen wǎ otu.

Otu Jehóháshi mú Ézerel

¹⁰ Ké aje bujam esim onyiryiká ne afee nyí Otu Jówashi mú Júda o/ryí butu, Jehóháshi mú wǎn-Otu Jehóháhaz o/ryí butu ké Ézerel, ne o/kyú otu ké Samérya ké aje onyiryiká ne din.

¹¹ Nyǐ to o/chi kyibî ké bushú ḿbú Óburúkpâbí, o-kúng kyibî-édúú wǎ Otu Jérobâm mú o/chi Ézerel ba-nung ké kyibî.

¹² Kángkáng byěm byikíri ḿbyí Otu Jehóháshi o/chi, cibicibi ne bukân emen ḿbú o/tông ké byití ḿbyí o/nwa ne Otu Amazáya mú Júda, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

¹³ Otu Jehóháshi o/kpú ba-ryii ǎ ké akun-batu, ké Samérya, ne Jérobâm mú nnyinyěng, mú wǎn emen, o-kúng kyikit emen wǎ otu.

Elásha o/kpú

¹⁴ Elásha mú mkpábé mú odasét byiraa-Osówo o/róng kyibî-orwôm, ne ńdyí mu o-kpú u, Otu Jehóháshi mú Ézerel o/dim ǎ edari. O-tii o-raa o/fu, ô bonchí ejí, ô bonchí ejí. Wo nké amu kiǐtí-onet-bunwa mú Ézerel.

¹⁵ Elásha o-sét ǎ o/fu, kúng búre ne abán. Otu Jehóháshi o-kúng kámbyí,

¹⁶ ne Elásha o-sét ǎ o/fu, okpá byiko ḿbyí odaché. Otu o-kpá byiko, ne Elásha o-yip abwô emen o-twôom ké nyí otu.

¹⁷ Ké bacê ḿbé Elásha o/kye kâng, otu o/bâa wíndu mú o/bírî kashú ḿbú Syírya. Elásha o-sét ǎ o/fu, ché dyibán. Otu a-châ dyibán ándyi o-bâ, Elásha o-raa o/fu, wo a-chi i dyibán ńdyí Óburúkpâbí, ńdyí o/chi o-kúng o-kpógê Syírya. Wo a/chi a-nwa ne banet ḿbé Syírya ké Áfek tete a-kpógê kámbé.

¹⁸ Ne Elásha o-sét otu o/fu, oyip abán nyí áku o-díp kyísí. Otu o-yip kányí o-díp kyísí kampén kachât o-mîng.

¹⁹ Ńkyín kyi/chi Elásha o-sa kafâ, ne o-raa ne otu o/fu, a/mû a/chi a-díp kampén katánge nang nyâchât, ne a/mû a/chi a-kpógê banet ḿbé Syírya kángkáng. Nké kántîk, a/chi a-kpógê kámbé kampén kachât nké nke.

²⁰ Elásha o-kpú, ba-ryii ǎ. Kángkáng dyije, azu-banet ḿbé Mówep ba-fwam m ekye Ézerel bunwa.

²¹ Nkéré obónge, ńdyí banet-Ézerel ba/kúng okúsí ba-wâa edaryii, ba/ri dyizu-banet-Mówep dyibónge, ba-bwa ne okúsí ámu ba-twóp ké dyikun ńdyí Elásha [ba-chêe.] Ńdyí kyikwóm-enyam-byiko ánkyi kyi-ta ng ké dyikun ńdyí Elásha kyi-bâ, onyinchéng ámu o-jwóbê ké bukyû, o-bûu o-bwom cip.

Byití ḿbyí Ézerel ne Syírya

²² Otu Házil mú Syírya o/cít banet-Ézerel ké kángkáng kyikim-nkéré ńkyí Otu Jehóháhaz o/mû otu,

²³ nké Óburúkpâbí o/mû o/cángê dyityém ne mbé, o-ri kámbé bafip. O*da/bángê ba-ju kámbé* nké o/chwáp kámbé, ké bubwô ḿbú ocím mú o/ryí ne Ébarahâm ne Ázik ne Jekôp. O*da/ráp ne banet emen nang kabónge*.

²⁴ Ńdyí Otu Házil mú Syírya o/kpú, Benhádat mú wǎn emen o-ryí butu.

²⁵ Ne Otu Jehóháshi mú Ézerel o-kpógê kâng Otu Benhádat kampén kachât o-koo eshê nyí Otu Benhádat o/mû o/koo ké nkéré mú Otu Jehóháhaz mú bonchí-Otu Jehóháshi o/mû otu.