2 Kyîng 12 - Bokyi Bible

Otu Jówashi mú Júda

¹ Ké aje káchâtkányi nyí Otu Jéhu o/ryí butu ké Ézerel, Otu Jówashi o/ryí butu ké Júda, ne o/kyú otu ké Jerúsélem ké bajam-aje bafee. Boné emen o/mû o-bángê e Zibyâ, ne o/mû o/fím oshê mú Byíshíba.

² Ké kángkáng dyikpen emen, Otu Jówashi o/chi ńkyí kyi/nyîn Óburúkpâbí, ké nǎ, Jehóyáda mú nchi kyifen-Osówo o/kye ǎ bacê.

³ Nang ké o/kyú kanong éné, o*da/shí byikit-bakye esháng* ne banet ba/ce kashú ba-chi i byifen, ba-shí i burwan ké mbyí.

⁴ Otu Jówashi o/kó banchi kyifen-Osówo o-kye kámbé busa o/fu, bakûtî akpuga nyí mbe ba-kyâ kyi-kim ne byifen echi, cibicibi ne akpuga nyí mbe ba-kyâ ké byifen ḿbyí kángkáng ací echi ne nyí mbe ba-kyâ wǎ eyáré-dyityém.

⁵ Nchi kyifen nang orá otî akpuga nyí banet ḿbé o/chi kámbé kyifen, ne ba-kûkúng akpuga ányi ba-bwât kyikit-kiǐtí-kyise-kyifen-Osówo echi nang kyirá ńkyí kyi/bên.

⁶ Nké tete kyi-ribi aje bujam ne achât nyí Otu Jówashi o/ryí butu, banchi kyifen-Osówo ba*da/bwât ne nang chwǒm kyibónge ké kafâ-kiǐtí-kyise-kyifen-Osówo echi*.

⁷ Ne otu o-kó kâng Jehóyáda ne banchi kyifen-Osówo ḿbé áku o-bí kámbé o/fu, ebóng ba*fí ba-bwât ng kiǐtí-kyise-kyifen-Osówo echi*. Kyi-fím kurún kyi-ca kashú, *da n̂g echîtî akpuga nyí bamu ba-koo ng*. Ba-man ba-kûbê ne nyǐ, eringe nyí badakúng kányí ba-bwât kiǐtí-kyise-kyifen-Osówo echi.

⁸ Banchi kyifen-Osówo ba-bángê ké ńkyí o/sét, ba-bángê to ba/fu, mbé baa*bwât kiǐtí-kyise-kyifen-Osówo echi*.

⁹ Ne Jehóyáda o-kúng mkpukpu o-rim mbyí ké kiinkíbí, o-tî kámú ké bukô-kyikit-kyifen-Osówo echi, ké kyicê-bubwô-etyebéng â a/nung ké kiǐtí-kyise-kyifen-Osówo echi. Banchi kyifen-Osówo ḿbé mbe ké bǎmkpóngé ba/fé kángkáng akpuga nyí banet ḿbé mbe ba-fâ Osówo mbe ba-kyâ, ké mkpukpu ámu.

¹⁰ Nang nkéré orá nké akpuga a/jê ké kafâ-mkpukpu, nsâng banwet-otu ne otu-nchi kyifen-Osówo ba-bâ, ba-kúng syílyíba ámu [ba-nyange, ba-kan kámú ké órúmá.]

¹¹ Ké nkéré mú baa/nyît ocím mú o/byí, ba-yip syílyíba ámu ba-kye banet-ashí-bǎmkpóngé ké kiǐtí-kyise-kyifen-Osówo echi, ba-kúng akpuga ányi ba-kye bakápyínta ne bambi byise

¹² ne bansê aká, ba-ré byichí ne aká nyí badakúng ba-bwât kyise, ba-kye to ké kángkáng byěm byikíri ḿbyí ba/chi.

¹³ Ba*da/kúng akpuga ányi nang onyin* ba-kye ké bankôp* nang acáng* nang bantán* ḿbyí ba/mû ba-chi i ké syílyíba* nang ké byěm ḿbyí ba/mû ba-mee ng etyuryíkáng* nang ké chwǒm kyikíri ńkyí ba/chi ké gûl nang syílyíba*.

¹⁴ Ba/kúng kányí kángkáng ba-kye banet-bǎmkpóngé, ba-ré to byěm ḿbyí badakúng ba-bwât kiǐtí-kyise-kyifen-Osówo echi.

¹⁵ Banet-ashí-bǎmkpóngé ámbe ba/mû banet ḿbé banong ḿbé baa*chi buchwáá-akpuga* ne ké bubwô ámbu, kyi/mû kyi*da/chîkwárê* mú badabí kámbé ba/fu, basét eringe nyí ba/bên akpuga ányi*.

¹⁶ Akpuga nyí ba/kye ké byifen ḿbyí afwá eré ne nyí byifen ḿbyí byibî efîm ba/mû ba*da/fé ké mkpukpu ámu*. Nyí ányi a/já banchi kyifen-Osówo.

¹⁷ Ké nkéré ámu, Otu Házil mú Syírya o/kye oshê mú Gât bunwa o-koo kámú. Ne o-kabe o/fu, nyǐ o-kyâ Jerúsélem bunwa.

¹⁸ Otu Jówashi mú Júda o-kúng kángkáng eyáré nyí batu ḿbé nyǐ o/kúng kyikit ebe, Otu Jehósháfat ne Otu Jehóram ne Otu Aháza, nyí ba/mû ba/kye Óburúkpâbí, o-cibi to ne eyáré nyí emen nyǐ oyén ne kángkáng gûl mú ba/mû ba-tî ng ké kiǐtí-kyise-kyifen-Osówo echi ne ké kyibám-butu, o-twóm kámbyí kángkáng ba-kye Otu Házil wǎ eyáré, ne otu ámu o-kúng basúja emen o-dim o-mîng Jerúsélem.

¹⁹ Kángkáng byěm byikíri ḿbyí Otu Jówashi o/chi, ba/sáng kámbyí ké Nwet-Akpen ne Biǐshwô-Batu ḿbé Júda.

^20-21 Banet-ashí-bǎmkpóngé ḿbé Otu Jówashi ba/nam ǎ dyiju, ne banet ashí afee ké burwám ebe, Józáka mú wǎn-Shímyat ne Jehózábat mú wǎn-Shúme, ba-ju ǎ ké kyise ńkyí ba/bi ké esí nyí ba/fé ecing ké nyǐ, ké kyicê-Jerúsélem ńkyí esû edabyí, ké bukwóp ḿbú mbu bu-jâ Sála. Ba/ryii Otu Jówashi ké akun-batu, ké oshê mú Otu Dívit, ne Amazáya mú wǎn emen o-kúng kyikit emen wǎ otu.