2 Kyîng 11 - Bokyi Bible

Otu Atalyâ mú Júda

¹ Ńdyí Atalyâ mú boné-Otu Aháza o-jwo ng o-bâ kyi-kim ne dyiju ńdyí ba/ju wǎn emen, o/kye busa o/fu, baju kángkáng kyikû-banet-butu.

² Jówashi mú wǎn-Aháza nké nke o/fem. Ba/mû ba/chi ba-ju ǎ ne burwám-banet ḿbé áku, nké Jehóshéba mú wǎn-boné-bonchí emen nké o/nyii ǎ, mú o/mû wǎn-Otu Jehóram mú onyinyi ne wǎn-boné-Otu Aháza. Jehóshéba o/kúng ǎ ne onet mú mu o-nen n ǎ o-da-tî kámbé ké nfût mú kiǐtí-kyise-kyifen-Osówo echi, o-rôo ǎ ányi eringe nyí Atalyâ oo*ri ǎ*. Ké bubwô ámbu kâng nké ba*da ǎ eju*.

³ Jehóshéba o/nen wǎn ámu, o-rôo ǎ ké aje nyâchât ké kiǐtí-kyise-kyifen-Osówo echi, ké nkéré mú Atalyâ o/kúng butu ḿbú oshê.

⁴ Nké ké aje káchâtkányi, Jehóyáda mú nchi kyifen-Osówo o/twóm ba-kó banet-ashí-bambâm otu ne ḿbé kyibám-butu, o-sét kámbé o/fu, babâ ké kiǐtí-kyise-kyifen-Osówo echi, ké kyikit ńkyí o/chi kámbé ba-ryí ocím, ba-bángê ne ńkyí nyǐ o/nam o/fu, nyǐ o-chi i. Nyǐ o/tông kámbé Jówashi mú wǎn-Otu Aháza,

⁵ ne o-sét kámbé byěm ḿbyín ḿbyí badachi o/fu, â ba/bê bǎmkpóngé ebachi ké dyicí-ékwâbashi, kyikim-banet kyibónge ké byikim byichât bakûbám kyibám-butu.

⁶ Kyikim ńkyí nnyinyěng kyikûbám dyifyi ńdyí Sôo. Kyikim ńkyí nkuli kyikû kyi-bám m dyifyi ándyi to, ké esim nyí banet-mbâm ḿbé áku.

⁷ Azu-banet-mbâm nyí áku afee nyí a*fí ké bǎmkpóngé echi ké dyicí-ékwâbashi* bakûbám kiǐtí-kyise-kyifen-Osówo echi eringe nyí chwǒm kii*chi Jówashi*.

⁸ Ba-man ba-kûbám Jówashi ne bushwám ké abwô, ba-kyú ne nyǐ nang o-ca nyá. Nang yeě mú o/fárâng běn, ju n̂g ǎ.

⁹ Banet-ashí ámbe ba-chi ńkyí Jehóyáda o/sét kámbé, ba-kúng banet ebe ba-ba-kye ǎ, banet ḿbé badachi bǎmkpóngé ké dyicí-ékwâbashi ne ḿbé baa*chi*.

¹⁰ O-kye banet-ashí ámbe [byíbye] ne édem ḿbyí Otu Dívit, ḿbyí ba/mû ba/tî ké kafâ-kiǐtí-kyise-kyifen-Osówo echi.

¹¹ Ne o-tî banet ne bushwám ḿbú baa/zú ba-níbî ké abwô ba-wâng bushú-kiǐtí-kyise-kyifen-Osówo echi eringe nyí badaku Jówashi.

¹² Ne Jehóyáda o-kúng Jówashi o-byí ne nyǐ kyíjí, o-yip etam-butu o-cít ǎ ké dyishí, o-yip [nwet mú ba/sáng byije ḿbyí butu eryí] o-kye ǎ. Ne ba-pwó Jówashi bakút ké dyishí ba-kúng ǎ butu. Banet ḿbé ba/mû ányi ba-shwóm akwâ ba-wonge ba/fu, otu okpen o-wu.

¹³ Otu Atalyâ o/jwo kyicoge ńkyí banet ne bambâm otu ba/chi, ne o-dim ochéé óchee o-wâa ké kiǐtí-kyise-kyifen-Osówo echi, ké kyikit ńkyí dyizu-banet ándyi dyi/mû.

¹⁴ Ányi nké o/ri otu mú ofyîfî ké o/bwom ké kyikwap ńkyí ké ocím-dyifyi mú kiǐtí-kyise-kyifen-Osówo echi, wǎ eringe nyí édúú ebe e/mû. Banet-ashí-basúja ne banjwâ bantán ba/wâng ǎ ba-fé ké otyém, ne kángkáng banet ba/mû ba-wonge e ne bunyîn-dyityém, ba-jwá ng bantán. Otu Atalyâ o-ját byídí emen ké byiko ké kafâ esa, o-wonge o/fu, baa/bwom bunwa ne me.

¹⁵ Jehóyáda o*da/ryuu o/fu, baju Otu Atalyâ fáráng ne kiǐtí-kyise-kyifen-Osówo echi* ne o-kye banet-ashí-basúja busa o/fu, kúng n̂g ǎ ba-shwôm ne nyǐ ké otyém-banet-mbâm, ju n̂g nang yeě mú o/kan o/fu, nyǐ o-nyii ng ǎ.

¹⁶ Ne ba-níbî ǎ ba-kúng ǎ ba-jâ ne nyǐ ké kyibám-butu, ne ba-ju ǎ ányi ké dyifyi ńdyí badakó Kabyî-Orá.

Byěm ḿbyí Jehóyáda o/bwât o-chi

¹⁷ Jehóyáda mú nchi kyifen-Osówo o/chi Otu Jówashi ne banet ḿbé Júda ba-ryí ocím ne Óburúkpâbí ba/fu, mbé ba-kyú u banet ḿbé Óburúkpâbí. Nyǐ o/chi to otu ne banet ḿbé Júda ba-ryí ocím ne barî.

¹⁸ Ne banet ba-dim kâng ké kyise-kyifen echi ńkyí Bâl ba-da-bú kánkyí ba-twóp kyísí. Ba/bên byikit-byifen echi ne erím-bakye, ba-ju Mátan mú nchi kyifen-Bâl ké bushú-kyikit-kyifen echi. Jehóyáda o/tî banet-mbâm ké kiǐtí-kyise-kyifen-Osówo echi,

¹⁹ ne nyǐ kâng ne banet-ashí-basúja ne bambâm otu ne bambâm kyibám-otu ba-kúng otu ké kiǐtí-kyise-kyifen-Osówo echi ba-sí ǎ o-jâ ké kyibám-butu, kángkáng banet ba-ca ne mbé ké kyikû. Otu Jówashi o/cen ké dyifyi ńdyí badakó Banet-Mbâm o-nung ne o-kúng kyikit emen wǎ otu.

²⁰ Bunyîn-dyityém bu/sú kángkáng banet, ne oshê o/chee ńdyí ba/ju Otu Atalyâ ké kyibám-butu.

²¹ Jówashi o/ryí butu ké Júda ńdyí oo/rí aje káchâtkányi.