2 Kyîng 10 - Bokyi Bible

Ba/ju Kyikû-Banet ńkyí Otu Éhap

¹ Bajam-banet ḿbé kyikû-banet ńkyí Otu Éhap ba/mû bachât esim diǐkpú ḿbé ba/mû ba-kyú u ké oshê mú Samérya. Otu Jéhu o/sáng léta o-kye banet ḿbé ba/mû ba-tún n [oshê ámu] ne biǐtí-banet-oshê ámu ne banet ḿbé ba/mû ba-tún n kyikû-banet ńkyí Otu Éhap. O/sáng léta ámu něen o/fu,

² ben nké kyikû-banet ńkyí otu nkyi ké abwô enen, ne ben bamu ne bamútu ḿbé bubyî-orá budatut ne bubyî-orá ne byěm-byití ne eshê nyí ba/bi ekpe ba-wâng kányí. Ké bubwô ámbu kâng, â ba-koo ng léta mún ba-bâ,

³ fím m̂ onet mú o/kwárê o-shwôm ké burwám-kyikû-banet ńkyí otu ba-kúng ǎ butu, ba-bwom ba-nwa bunwa ba-tî ǎ wǎ otu.

⁴ Bushî bu-róng banet ḿbé ba/mû ba-tún n Samérya, ba-raa ba/fu, be byi-cen n nǎ ne byi-bwom bunwa ne Otu Jéhu, mú Otu Jóram ne Otu Aháza ba*da/man ebwom ne nyǐ*.

⁵ Ké bubwô ámbu, onet-dyishí-kyibám-otu ne onet-dyishí-oshê cibicibi ne biǐtí-banet-oshê ne banet ḿbé mbe ba-tún n kyikû-banet-otu ba-twóm ejá ńnyín e-kâm Otu Jéhu ba/fu, be byi-chi i bǎmgbán eyên ne bii/kpá byiko ḿbyí byidachi nang ebóng chwǒm ńkyí wo a/sét. Nké bii*ba/chi byi-kúng onet nang obónge butu*. Chi nang ebóng chwǒm ńkyí wo a/kabe a/fu, kyi/nwa kyi-shwôm.

⁶ Otu Jéhu o-sáng kámbé léta okíri o/fu, â ben bamu ne me, ne ba/fu, ba-chi i nang ebóng chwǒm ńkyí me n/sét běn, ké nkéré mún nencí, bâ n̂g ne ashí nyí banet ḿbé kyikû-banet ńkyí Otu Éhap ba-ba-kye mě ké Jézerel. Banet-kyikû-banet ńkyí Otu Éhap ḿbé ba/mû bajam bachât esim diǐkpú ba/mû ké abwô nyí biǐtí-banet ḿbyí Samérya, ḿbé ba/mû ba-nen n kámbé.

⁷ Ńdyí ba/koo léta mú Otu Jéhu, banet-ashí-oshê mú Samérya ba/ju kángkáng banet-kyikû-banet ńkyí Otu Éhap ámbe bajam bachât esim diǐkpú, ba-yip ashí ebe ba-fé ké bookye, ba-twóm kányí a-kâm Otu Jéhu ké Jézerel.

⁸ Ńdyí ba/sét Otu Jéhu ba/fu, baa/bê ne ashí nyí banet ámbe, o/kye busa o/fu, batî kányí ké azu afee, ké ocím-dyifyi-oshê, ba-mîng kányí a-waa ányi tete orî-dyicí.

⁹ Ké dyicófóróng, o/dim o-wâa ké dyifyi-oshê ándyi, ne o-raa ne banet ḿbé ba/mû ányi o/fu, me nké n/nam ne n-ju Otu Jóram. *Chí ben nké ba/ju ǎ*. Nké yeě o/ju kángkáng banet ḿbén.

¹⁰ Ńkyín kyi/tông kyi/fu, kángkáng byěm ḿbyí Óburúkpâbí o/raa kyi-kim ne kyikû-banet ńkyí Otu Éhap byi-man byi-chi. Óburúkpâbí oo/chi ńkyí nyǐ o/mû o/ryí ocím ké ocím mú Elája mú mkpábé mú odasét byiraa-Osówo.

¹¹ Ne Otu Jéhu o-ju kâng kángkáng bwǎn-bané ḿbé Otu Éhap bakíri ḿbé ba/mû ba-kyú u ké Jézerel, ne kángkáng banet-ashí-basúja emen ne bacín emen ḿbé dyityém ne banchi kyifen emen. Nang onet obónge o*da/waa okpó*.

Otu Jéhu o/ju Bwǎn-Bané-Otu Aháza

¹² Otu Jéhu o/dim ké Jézerel o/fu, nyǐ o-câ Samérya. Ńdyí mu o-cen n o-câ ké bukwóp, ké kyikit ńkyí badakó Boompyep-Bambâm Ebû,

¹³ o/kwárê ne kyicê-bwǎn-bané ḿbé okúsí-Otu Aháza mú Júda, ne o-bí kámbé o/fu, ben ebóng banet. Mbé ba-faa ǎ ba/fu, be byi-chi i bwǎn-bané-Otu Aháza. Be mu byi-wâa ng Jézerel byi-da-ri bwǎn ḿbé Jézébel mú onyi-otu ne kyikû-banet ńkyí otu kángkáng ké bukyû.

¹⁴ Otu Jéhu o-kye banet emen busa o/fu, kúng kámbé bakpó ashí amúmú. Ba-kám kámbé, o-ju kámbé fáráng ne dyibíng ńdyí dyi/mû ányi. Mbé ashí kángkáng ba/mû bajam bafee esim-banet bafee. Ba*da/mîng nang onet obónge okpó*.

Otu Jéhu o/ju Kángkáng Bwǎn-Bané-Otu Éhap ḿbé ba/waa

¹⁵ Otu Jéhu o-chîdim bucen, ne ńdyí o/ribi ké bukwóp, o/kwárê ne Jónádap mú wǎn-Rékap. Otu Jéhu o/ta ǎ kyiraa, o-raa ne nyǐ o/fu, me ne wo byimu byi-kabe ng eringe ebónge. Wo a-bwom m ne me ké kyikû dí. Jónádap o-faa o/fu, m-bwom m. Otu Jéhu o-sét ǎ o/fu, fé mě dyikwâ kâng. Mbé ba-fé barî dyikwâ, ne Otu Jéhu o-chwáp ǎ o-yú ké mútu mú bubyî-orá budatut,

¹⁶ o-sét ǎ o/fu, bâ ne me ké kyikû a-kúng achi eyên a-ri eringe nyí me mm/kpá byiko ḿbyí ndachi bǎmkpóngé n-kye Óburúkpâbí. Ne ba-kyú ké mútu ámu ba-dim Samérya.

¹⁷ Ké nkéré ba/ribi áku, Otu Jéhu o/ju kángkáng bwǎn-bané ḿbé Otu Éhap, nang obónge o*da/mîng*. Něen nké Óburúkpâbí o/mû o/sét Elája o/fu, kyi/chi kyi-chi.

Otu Jéhu o/ju Banet ḿbé ba/mû ba-kyâ Bâl Ofê

¹⁸ Otu Jéhu o/kó banet ḿbé Samérya kyikit kyibónge o-sét kámbé o/fu, Otu Éhap o/fé osówo-Bâl kaǎníngéníngê, nké me n/chi n-fé ǎ n-shwôm éné.

¹⁹ Kó n̂g kángkáng bamkpábé ḿbé badasét byiraa-Bâl ne kángkáng banet ḿbé mbe ba-fâ Bâl ne banchi kyifen emen kyikit kyibónge. Onet o*dachi o-waa*. Me mu m-bâ ebachi kiǐtí-kyifen n-kye Bâl, ne nang yeě mú o*da/bê* ba/chi ba-ju ǎ. Otu Jéhu o/kúng ńkyín wǎ byinyídíng ḿbyí o/chi o-yip ne o-ju kángkáng banet ḿbé mbe ba-kyâ Bâl ofê.

²⁰ Ne Otu Jéhu o-kye kâng busa o/fu, tî n̂g dyicí ńdyí byi/chi byi-kye Bâl ofê. Ne ba-tî dyicí ándyi,

²¹ ne Otu Jéhu o-kye ejá e-ca ké kángkáng esí nyí Ézerel. Kángkáng banet ḿbé mbe ba-fâ Bâl ba-bâ. Nang onet obónge mú o/né ebê o*fí*. Mbé kángkáng ba-dim ké kyise-kyifen echi ńkyí Bâl, ba-sú ké nkyí kyi-fím ké dyishí-kyise dyibónge ba-ribi ké ńdyí áku.

²² Ne Otu Jéhu o-kye nchi kyifen mú o/mû o-tî ng byídí-kyifen echi busa o/fu, obâ ne mbyí o-kye banet ḿbé mbe ba-fâ Bâl.

²³ Ńdyí baa/chi éné, Otu Jéhu oyén o-nung ké kyise-kyifen echi ánkyi ne Jónádap mú wǎn-Rékap o-sét banet ḿbé mbe ké kafâ o/fu, kpúrî n̂g achi ba-ri ba/fu, banet ḿbé mbe ba-fâ Bâl nké nke mbe nyín, onet nang obónge mú mu o-fâ Óburúkpâbí o*fí mú o/nung nyín*.

²⁴ Ne nyǐ kâng ne Jónádap ba-nung ké kafâ ba-wâa byifen echi ne ḿbyí badashí oshǐng ba-kye Bâl. Nyǐ o/mû oo/tî bajam-banet banyii kyíjí o-sét kámbé o/fu, ba-man ba-ju kángkáng banet ḿbén. Nang yeě nké o/mîng onet o-fem, onet ámu o-kyâ kyitông emen.

²⁵ Ńdyí Otu Jéhu o-man n byifen ámbyi echi o-bâ, o-sét banet ḿbé ba/mû ba-bám m ne banet-ashí ebe o/fu, nung n̂g ké kafâ ba-ju kámbé kángkáng. *Da n̂g emîng nang onet obónge o-chêe*. Ba-zú bushwám ba-nung ké kafâ, ba-ju kámbé kángkáng ba-tut byikwóm ebe ba-pwó kyíjí. Ne ba-nung ké kafâ-kyikit-ociring ńkyí kyise-kyifen echi ánkyi

²⁶ ba-byí ne kyikwap-ociring ńkyí kyi/mû ányi ba-shí kánkyí.

²⁷ Ne ba-bên kâng kyikwap-ociring ne kyise-kyifen echi ánkyi, ba-bírî kánkyí kyi-firi kiǐkóng-abîng ńkyí kyi/tôong tete kurún.

²⁸ Éné nké Otu Jéhu o/chi ne ba-mîng Bâl efé ké Ézerel.

²⁹ Nké nyǐ to o/kúng bukwóp-kyibî ńkyí Otu Jérobâm mú o/chi banet-Ézerel ba-róng ké kyibî ńkyí ba/fé bampong ḿbé ba/mee ké gûl, ḿbé o/tî ké Bétel ne ké Dǎn.

³⁰ Óburúkpâbí o-raa ne Otu Jéhu o/fu, wo aa/chi kyikû-banet ńkyí Otu Éhap kángkáng byěm ḿbyí n/fu, chi kámbé. Ké bubwô ámbu, me mu n-ryí i ǒ ocím n/fu, bwǎn eyên tete kyi-ribi ké byikim-banet byinyii ba/chi ba-kyú batu ḿbé Ézerel.

³¹ Nké Otu Jéhu o*da/tî byije ḿbyí Óburúkpâbí mú mu Osówo mú Ézerel ne dyityém emen kángkáng*. Nké o/kúng kyiká-édúú ńkyí Otu Jérobâm mú o/chi banet-Ézerel ba-róng ké kyibî.

Otu Jéhu o/kpú

³² Ké nkéré ámu, Óburúkpâbí o/kpet esît esí nyí Ézerel. Otu Házil mú Syírya o/koo kángkáng byikim-esí ḿbyí Ézerel

³³ ḿbyí mbyí ké kyicê-Jódan ńkyí esû edabyí tete kyi-ribi ké oshê mú Áro ké kace ńké Ánon, ké kyicê ńkyí busyísen. Esí ányi e/fé byikim-esí ḿbyí Gyílet ne Báshan ké kafâ, ké esí nyí byikû-banet ḿbyí Gât ne Rúben ne kyicê-Manáse ńkyí esû edabyí ba/mû ba-kyú u.

³⁴ Kángkáng byěm byikíri ḿbyí Otu Jéhu o/chi, cibicibi ne bukân emen, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.

³⁵ Otu Jéhu o/kpú ba-ryii ǎ ké Samérya, ne Jehóháhaz mú wǎn emen o-kúng kyikit emen wǎ otu.

³⁶ Otu Jéhu o/kyú ké Samérya wǎ otu mú Ézerel ké aje bujam esim nyíryinyi.