2 Kyîng 1 - Bokyi Bible

Elája ne Otu Aháza

¹ Ké nkéré mú Otu Éhap mú Ézerel o/kpú, oshê mú Mówep o/bírî bunwa ne Ézerel.

² Otu Aháza mú Ézerel o/róng enyóng emen ké Samérya, o-némê kanong kanong. Ké bubwô ámbu, o-twóm banet-kyitwóm o/fu, bada-sô epé ne Bâl-Zébwop mú mu orím-bukye mú oshê-Ékoron, mú Fyilíta, eringe nyí nyǐ odanyît â o/chi o-nyange, aa oo*ba/chi o-nyange*.

³ Nké orím mú onong mú Óburúkpâbí o/sét Elája mú mkpábé mú odasét byiraa-Osówo, mú o/fím Tyíshíbe o/fu, oca o-da-kâm banet ḿbé Otu Aháza o/twóm kámbé, o-bí kámbé o/fu, ebóng bamu ba-dim m epé edasô ne Bâl-Zébwop mú mu orím-bukye mú Ékoron. Nkyi, ké nǎ, bamu ba-kabe ng ba/fu, Osówo o*fí ké Ézerel dí*.

⁴ Sét n̂g otu ba/fu, Óburúkpâbí o/sét o/fu, wo aa*ba/chi a-nyange ké dyinéme eyên ńdyí a/némê*. Wo a/chi a-kpú. Elája o/chi wǎ eringe nyí Óburúkpâbí o/sét ǎ,

⁵ ne banet-kyitwóm ámbe ba-bwa esim ba-kâm otu. Otu o-bí kámbé o/fu, ebóng ben ba/bwa esim.

⁶ Mbé ba-faa ǎ ba/fu, be byi/kâm onyinchéng obónge mú o/sét bě o/fu, be byibwa esim byi-ba-sét ǒ byi/fu, Óburúkpâbí mu o-bí ng ǒ o/fu, ebóng wo amu a-twóm m banet ba-ca epé edasô ne Bâl-Zébwop mú mu orím-bukye mú Ékoron. Nkyi, ké nǎ, wo amu a-kabe ng a/fu, Osówo o*fí ké Ézerel dí*. Wo aa*ba/chi a-nyange ké dyinéme eyên ńdyí a/némê*. Wo a/chi a-kpú.

⁷ Otu o-bí kámbé o/fu, onyinchéng ámu o/mû nǎ.

⁸ Mbé ba-faa ǎ ba/fu, [o/mû o/fé ágbádá nyí ba/zim ké ekwop-enyam,] o-sît emâp-ekwop-enyam. Otu o-faa o/fu, o-chi i Elája.

⁹ Ne o-twóm kâng onet-dyishí-basúja ne bajam-basúja bafee esim diǐkpú o/fu, bada-kám Elája. Otu-dyishí-basúja ámu o-ri ǎ ké oo/kyú kyíbóng-káku, o-sét ǎ o/fu, onet-Osówo, otu oo/kye busa o/fu, wo ashû kyísí.

¹⁰ Elája o-faa o/fu, â me n-chi i onet-Osówo, okwâ ofím kyíbóng o-shû kyísí o-ba-ju ǒ ne banet eyên. Ké abe ányi, okwâ o-fím kyíbóng o-ba-ju onet-dyishí-basúja ámu ne banet emen.

¹¹ Otu o-chîtwóm onet-dyishí-basúja okíri ne bajam-basúja bafee esim diǐkpú mú [o/dim] o-da-sét Elája o/fu, onet-Osówo, otu mu o-kyâ busa o/fu, wo ashû kyísí kántîk.

¹² Elája o-faa o/fu, â me n-chi i onet-Osówo, okwâ ofím kyíbóng o-ba-ju ǒ ne banet eyên. Ké abe ányi, okwâ mú Osówo o-shû kyísí o-ba-ju onet-dyishí-basúja ámu ne banet emen.

¹³ Otu o-chîtwóm kâng onet-dyishí-basúja okíri ne bajam-basúja bafee esim diǐkpú. Onet-dyishí-basúja ámu o-yú kyíbóng-kaku o-da-tím arông kyísí ké bushú-Elája, o-tîm ǎ arông o/fu, onet-Osówo, ri mě bafip ne banet ejí. *Da bě eju*.

¹⁴ Okwâ o/fím kyíbóng o-ba-ju banet-ashí-basúja ḿbé áku bafee ne banet ebe. Nké kamgbe, ri mě bafip.

¹⁵ Orím mú onong mú Óburúkpâbí o-raa ne Elája o/fu, shû kyísí ne nyǐ. *Dachi a-shî*. Ne Elája kâng o-shû kyísí ne onet-dyishí-basúja ámu ba-dim kyikit-otu,

¹⁶ ne Elája o-raa ne otu o/fu, něen nké Óburúkpâbí o/sét. O/fu, ké nǎ, wo a/twóm banet a/fu, bada-sô epé ne Bâl-Zébwop mú mu orím-bukye mú Ékoron, éné wǎ Osówo o*fí ké Ézerel mú wo ada ǎ ebí* wo aa*ba/chi a-nyange*. Wo a/chi a-kpú.

¹⁷ Otu Aháza o-kpú wǎ eringe nyí Óburúkpâbí o/sét Elája. Nyǐ o/mû o*fí ne wǎn-onyinchéng nang obónge* ne [wǎn-boné emen] kâng, mú odabángê Jóram, o-kúng kyikit emen wǎ otu, ké nnyinyěng-dyije ńdyí Jehóram mú wǎn-Otu Jehósháfat oo/ryí butu ké Júda.

¹⁸ Kángkáng byěm byikíri ḿbyí Otu Aháza o/chi, ba/sáng kámbyí ké Nwet-Akpen ne Biǐshwô ḿbyí Batu ḿbé Ézerel.