2 Korónyíkil 2 - Bokyi Bible

Byiko ekpá ḿbyí Kiǐtí-Kyise-Kyifen-Osówo echi ebi

¹ Otu Sólómon o-tî okabe o/fu, nyǐ o-bi ng kiǐtí-kyise-kyifen-Osówo echi ńkyí badakûkye Óburúkpâbí ofê, ne mú odabi to kyibám-butu ńkyí emen.

² Nyǐ o/fé égot-banet etánge etánge ké bajam-byikit bachât esim diǐkpú ké bǎmkpóngé ḿbé byěm-kyise etû, o-fé etánge etánge ké bajam-byikit banyii ké bǎmkpóngé-aká esé. Banet ḿbé ba/mû ba-tún n bǎmkpóngé ámbe ba/mû égot-banet onyiryiká ne echât.

³ Otu Sólómon o-twóm kyitwóm kyi-kâm Otu Hyíram mú Táya o/fu, shee mě byěm wǎ eringe nyí a/shee Otu Dívit mú bonchí ejí, ké nkéré a/shee ǎ byikim-byichí ḿbyí badakó séda, ḿbyí o/bi kyibám-butu emen.

⁴ Me mu m-bi ng kiǐtí-kyise-kyifen echi ké dyizîn ńdyí Osówo Óburúkpâbí ejí. Nkyí kyi/chi kyi-kyú kyikit-ociring ńkyí banet ejí ne me byida ǎ ekûkye ofê ké bakút-kyinung eshí. Kyi/chi kyi-kyú kyikit ńkyí byida ǎ ekûkye berêt-ociring kángkáng nkéré ne ńkyí byi/chi byi-shí byifen byi-kye ǎ kángkáng dyicófóróng ne dyikurúku ne ké ací-ékwâbashi eten ne ké ajî-byifen ḿbyí otukáku mú ofyîfî ne ací-ociring akíri nyí badakye Osówo Óburúkpâbí eten ofê. Nyǐ oo/kye Ézerel busa o/fu, bakûchi ńkyín kángkáng nkéré.

⁵ Me n/tî okabe mú n/fu, m-bi ng kiǐtí-kyise-kyifen-Osówo echi ńkyí kyi/rêe, ké nǎ, Osówo mú eten o/rêe o-shwôm Osówo nang orá.

⁶ Nang ké nkyi éné, onet o*fí nang obónge mú odaman ebi Osówo kiǐtí-kyise-kyifen echi* ké ebóng, nang baryên bamúmú ḿbé bubóng baa*kwárê ǎ*. Me n-cen n nǎ kâng ne m-man ebi kiǐtí-kyise-kyifen-Osówo echi ńkyí kyidabyí chwǒm kyi-shwôm kyikit ńkyí badashí burwan ba-kye Osówo.

⁷ Ké bubwô ámbu, twóm mě onet-mpwô mú mu o-man n echi bǎmkpóngé ké gûl ne syílyíba ne borôn ne áyon, ne o-man n echi to byídí ḿbyí shíshét ne ḿbyí bulûbulu. Nyǐ o/chi o-kûchi bǎmkpóngé ne banet-mpwô ḿbé Júda ne Jerúsélem, ḿbé Otu Dívit mú bonchí ejí o/cá.

⁸ Me mu n-nyît ng eringe nyí bantwom byichí ḿbé eyên badaman echi bǎmkpóngé. Ké bubwô ámbu, twóm mě byikim-byichí ḿbyí badakó séda ne ḿbyí badakó sápurus ne ḿbyí badakó júnipe, ḿbyí byi/fím Lebánon. Me mm/kpá byiko ḿbyí ndatwóm banet ejí ba-bâ ba-ba-chwáp ḿbé eyên

⁹ ké byikim-byichí chwóó ekyé ba-tî, ké nǎ, kiǐtí-kyise-kyifen-Osówo echi ńkyí me n/tî okabe n/fu, m-bi ng něen, kyi/chi kyi-rêe, ne kyi/chi kyi-nwa bunong.

¹⁰ Me n/chi n-twóm ba-kye banet-bǎmkpóngé eyên égot-batôn ḿbé métirik-esang-byichí-wît diǐkpú, ne égot-batôn ḿbé métirik-esang-byichí-bályi diǐkpú, ne égot-balyíta-bato etánge etánge ké égot-byikit efee ne égot-balyíta-bakút-ólif etánge etánge ké égot-byikit efee.

¹¹ Otu Hyíram o-sáng Otu Sólómon léta o-faa ǎ o/fu, ké bubwô ḿbú banet eyên mbe ba-jê ng Óburúkpâbí, nyǐ oo/chi ǒ otu ebe.

¹² Kye n̂g Osówo Óburúkpâbí mú Ézerel, mú Nchi bubóng ne esí akpee. Nyǐ oo/kye Otu Dívit wǎn mú mu ne bubong, ne mu ne byinyídíng, ne o-man n echi bǎmkpóngé, mú oo/tî okabe kántîk mú odabi Óburúkpâbí kiǐtí-kyise-kyifen emen echi ne kyibám-butu ńkyí emen.

¹³ Me mu n-twóm m ǒ onet-mpwô obónge mú odabángê Húram, mú mu ne bubong.

¹⁴ Boné emen o/mû onet-kyikû-banet ńkyí Dǎn, ne bonchí emen o/mû onet-Táya. Nyǐ mu o-nyît ng eringe odachi byěm ké gûl ne syílyíba ne borôn ne áyon ne byichí. Nyǐ o-man n echi bǎmkpóngé ké byídí ḿbyí shíshét ne ḿbyí bulûbulu ne kyídí-okpówo. Nyǐ o-man n esáng byěm ké aká, ne o-man n echi dyizong-ekap nang dyirá eringe nyí ba/fu, ochi. Mîng ǎ o-chi bǎmkpóngé ne banet-mpwô eyên ne ḿbé Otu Dívit mú bonchí eyên.

¹⁵ Ké bubwô ámbu, twóm bě wît ne bályi ne bato ne bakút-ólif ḿbyí a/ryí ocím.

¹⁶ Be byi/chi byi-két kángkáng byichí ḿbyí badakó séda ké eku nyí Lebánon, ḿbyí amu a-ryuu ng, byi-bwá kámbyí ké akan byi-sen kámbyí ké baya ḿbé Medeterényan tete byi-byí Jópa, eringe adaman eyip kámbyí ányi a-jâ ne mbyí Jerúsélem.

Ba/kpet Kiǐtí-Kyise-Kyifen-Osówo echi ebi

¹⁷ Otu Sólómon o/pan ocím-bacinbánet kángkáng ḿbé mbe ba-kyú u ké esí-Ézerel wǎ eringe nyí Otu Dívit mú bonchí emen o/mû o/pan. Bacinbánet ḿbé ba/mû ba-kyú u ányi ba/mû égot-banet etánge etánge ké bajam-byikit káchâtkányi esim diǐkpú ne byichât ne égot echât.

¹⁸ Nyǐ o/kyii bǎmkpóngé ḿbé byěm-kyise etû o-kye égot-banet etánge etánge ké bajam-byikit bachât esim diǐkpú, o-kye to égot-banet etánge etánge ké bajam-byikit banyii ké bǎmkpóngé-aká esé ké eku, ne o/cá égot-banet-ashí-bǎmkpóngé onyiryiká ne echât ḿbé badari ba/fu, baa/chi bǎmkpóngé.