2 Korónyíkil 1 - Bokyi Bible

Otu Sólómon o/fé Nshwam o/fu, Osówo okye ǎ Bubong

¹ Otu Sólómon mú wǎn-Otu Dívit o/níbî oshê mú Ézerel shwaneshwane wǎ otu, ne Óburúkpâbí mú Osówo emen o/jware ǎ, o-chi ǎ o-firi ne busa kanong kanong.

² Otu Sólómon o/kye busa o/fu, kángkáng banet-ashí-basúja, ḿbé égot-basúja etánge mbe ké bubwô ebe, ne banet-ashí-basúja ḿbé bajam-basúja batánge mbe ké bubwô ebe, ne kángkáng batu-ashí-oshê, ne kángkáng banet-ashí-byikû-abóng, ne kángkáng banet

³ baca ne nyǐ ké kyikû ba-wâa ké kyikit ńkyí mbe ba-kyâ Osówo ofê, ké Gyíbwon. Mbé ba/ce ányi, ké nǎ, ányi nké kyi/mû kyikit ńkyí ba/bi mpyep mú Óburúkpâbí odakyú, mú Músis mú ḿgbán-Óburúkpâbí o/mû o/chi ké kyikim-dyikán.

⁴ Mkpukpu-byěm-Osówo o/mû ké Jerúsélem, ké kafâ-mpyep mú badabi ké byídí, mú Otu Dívit o/mû o/bi ké nkéré o/fím ne mkpukpu ámu ké Kyíryat-Jérim o-bâ ne mǔ.

⁵ Kyikit-kyifen echi ńkyí ba/chi ké borôn, ńkyí Bézalel mú wǎn-Orí, mú o/mû wǎn-Hôo o/mû o/chi, kyi/mû to ké Gyíbwon, ké kashú-mpyep mú Óburúkpâbí odakyú, Otu Sólómon ne kángkáng banet ba/kye Óburúkpâbí ofê ányi.

⁶ Ányi ké bushú-mpyep ámu nké Otu Sólómon o/kye Óburúkpâbí ofê ké byifen echi, ké kyikit-kyifen echi ńkyí ba/chi ké borôn. O/ju égot-byitú etánge, o-shí byirim ebe kángkáng ányi.

⁷ Ké buchú ámbu, Osówo o/byí o-kâm Otu Sólómon, o-bí ǎ o/fu, ebóng chwǒm ńkyí nkyi kyi-nyîn n ǒ a/fu, me nkye ǒ.

⁸ Otu Sólómon o-faa o/fu, wo kángkáng nkéré a/tông Otu Dívit mú bonchí ejí kiǐtí-kyijé, ne kántîk, wo aa/mîng mě n-kúng kyikit emen wǎ otu.

⁹ Ô Osówo Óburúkpâbí, tî ocím eyên mú a/ryí bonchí ejí. Wo aa/chi mě n-firi otu mú banet ḿbé ba/jê, ḿbé baa*nwa epan*.

¹⁰ Ké bubwô ámbu, kye mě bubong ne byinyídíng ḿbyí ndaman ekyú kámbé otu. Â kyi*fí éné* me n-cen n nǎ ne m-man ekyú otu mú biǐtí-banet eyên ḿbén.

¹¹ Osówo o-faa Otu Sólómon o/fu, wo a/cá ńkyí kyi/nwa. Ńkyí wo a/mû a/chi a-bí esang nang dyizîn ebyí nang bukyû buju banet-bushwôn eyên nang dyikpen ńdyí wo aa*wá ekpú* wo aa/bí a/fu, me nkye ǒ bubong ne byinyídíng eringe nyí wo adaman ekyú otu mú banet ejí ḿbé me n/chi ǒ otu ebe.

¹² Me n/chi n-kye ǒ bubong ne byinyídíng. N/chi n-kye ǒ to esang chwóó ne kiǐtí-dyizîn dyi-shwôm nang ńdyí otu nang orá mú o/mû, ne nang mú o/chi o-chîkyú.

Busa ne Esang nyí Otu Sólómon

¹³ Otu Sólómon [o-dim] kâng ké kyikit ńkyí mbe ba-kyâ Osówo ofê, ké Gyíbwon, ńkyí mpyep mú Óburúkpâbí odakyú, o-fyi ké Jerúsélem. Ányi nké o/kyú otu mú Ézerel.

¹⁴ Nyǐ o/ré bamútu ḿbé bubyî-orá budatut ne bubyî-orá-byití. Bamútu ámbe ba/mû égot káchâtkányi, ne bubyî-orá-byití ámbu bu/mû égot etánge etánge ké byikit diǐkpú ne byifee. O/tî kyicê ké Jerúsélem, ne ḿbé ba/waa o/kúng o-tî ké eshê ekíri.

¹⁵ Ké nkéré nyǐ o/mû otu, syílyíba ne gûl byi/mû byi*fí to ké bukaa* wǎ aká* ké Jerúsélem* ne kyichí ńkyí badakó séda kyi/mû kyi/jê wǎ kyichí ńkyí badakó sékomo. [

¹⁶ Bancen busî-Otu Sólómon nké ba/mû ba-ré ng kángkáng bubyî-orá ḿbú mbu bu-fím m ké eshê nyí [Músiryi] ne Silyísha

¹⁷ ne kángkáng bamútu ḿbé bubyî-orá budatut, ḿbé mbe ba-fím m Éjip. Mbé ba/shee batu ḿbé Hyítat ne Syírya bubyî-orá ne bamútu ḿbé bubyî-orá budatut. Ba/shee bamútu ámbe ké égot-akpuga-syílyíba echât ké mútu obónge, ba-shee bubyî-orá ámbu ké bajam-akpuga-syílyíba káchâtkányi esim diǐkpú ké kabyî-orá kabónge.]