2 Koríntyan 9 - Bokyi Bible

Ochwâp mú Barî-Banet ḿbé ba/bángê ké Karâs

¹ Kyi*da/kwárê ké ntûntû* ńkyí me nda běn esáng kyi-kim ne ochwâp mú banet mbe ba-twóm m banet-Osówo ḿbé mbe ké Judyâ*.

² Me mu n-nyît ng n/fu, ben bamu ba-ryuu ng ba/fu, ba-chwáp ng, ne mm/kpee běn n-sét banet ḿbé Masedónya. N/sét kámbé n/fu, barî-banet eten ḿbé mbe ké Girîs baa/kpá byiko ḿbyí badachwáp kyi-fím ké dyije ńdyí dyi/shwôm ké esim. Oryuu enen mú ba/mû ba-jang ng eryuu ba/fu, ba-chwáp ng o/chi bujê-banet ké burwám ebe ba-firi to ne kyijé ńkyí badachwáp.

³ Kántîk, me mu n-twóm m bwǎn-bané eten ḿbén, eringe nyí byiko ḿbyí bii/jang etông kyi-kim ne ben bii*ba/chi byi-waa ké ejá éja*. Nké wǎ eringe nyí me n/sét, ben ba/chi ba-kpá byiko ba-kye ochwâp mú enen.

⁴ Â kyi*fí éné* â banet ḿbé ba/fím Masedónya ba/bê ne me, ba-ri ba/fu, ben ba*da/kpá ne byiko* éshwân e/chi e-wuri bě, me nn*zîim nang éshwân nyí enen* ké dyityém ńdyí n/jang efé ne ben.

⁵ Ké bubwô ḿbún, me n/kabe n/fu, nkyi kanong ńkyí ndatîm bwǎn-bané eten ḿbén arông n/fu, babâ ba-kâm běn kpá, ne me n-kûbê, eringe nyí badakye eyáré nyí ben ba/mû ba/ryí ocím ba/fu, ba-kyâ, ba-tî kyikû ké esim. Eyáré ányi e/chi e-kyú kyísí ké nkéré mú mm/bê, ne kyi/chi kyi-tông kyi/fu, ben ba/kye kányí, ké nǎ, ben bamu ba-ryuu ng ba/fu, ba-kyâ, *chí wǎ ba/tírîng běn otíríng*.

⁶ Zîim m̂ ńkyín ba/fu, onet mú mu o-kwón n boǒnyín-esang-byichí, esang-byichí ee*zím ǎ chwóó*. Onet mú mu o-kwón n chwóó, e-zím m ǎ to chwóó.

⁷ Nang yeě nang yeě kâng okye eringe nyǐ oo/kabe o/fu, nyǐ o-kyâ. O*dachi o-chi ájângmé* o-bwa o-kúng nang kánkyí wǎ chwǒm ńkyí nyǐ odaman o-chi* ké ebóng, Osówo mu ne kyijé ne onet mú mu o-kyâ ne bunyîn-dyityém.

⁸ Ne Osówo o-man n běn ekye kyi-shwôm ńkyí bamu ba-ryuu ng. Eringe nyí ben kángkáng nkéré ba/chi ba-kyú ne ńkyí bamu ba-ryuu ng ké byiko enen, ne kyi-jê to kyi-shwôm ńkyí badakye nang ebóng chwǒm ńkyí kyinong ńkyí bamu ba-ryuu ng.

⁹ Wǎ eringe nyí ejá-Osówo nyí ba/sáng kyísí e/sét e/fu, Osówo mu o-pwó ng banet-kyikpu banjware ké byiko. Dyityém emen ńdyí o/cángê dyi-waa ng ne banyá.

¹⁰ Ne Osówo mú mu o-kyâ nkwôn esang-byichí esang-byichí nyí mu o-kwón n ne byiryíng ḿbyí mu o-ryí i, o/chi o-kye běn to kángkáng esang-byichí nyí bamu ba-ryuu ng, o-chi kányí to e-kán, eringe nyí edazím kanong kanong ké bubwô-dyityém enen ecángê.

¹¹ Nyǐ o/chi o-chi běn to ba-fang kanong kanong, eringe nyí badakûcángê dyityém kángkáng nkéré, eringe nyí banet chwóó ké bubwô eten ba/chi ba-kó Osówo asǎma ké eyáré enen nyí mbe ba-koo ng ne ben.

¹² Ké ebóng, bǎmkpóngé ḿbén ḿbé bamu ba-chi i ba*fí ba-kwárê ng ké byěm ḿbyí banet-Osówo mbe ba-ryuu ng nké nke* nké mbe ba-chi i asǎma ekó a-byí chwóó a-kâm Osówo.

¹³ Ne ké bubwô ḿbú kyijé ńkyí bǎmkpóngé enen ḿbén ba/tông, banet chwóó ba/chi ba-kye Osówo akpee ké ofê mú ben ba/kye Bǎmpém ḿbé Banong ḿbé Karâs, ḿbé ben bamu ba-sét ng, ne ké dyityém enen ecángê ké byěm to ḿbyí bamu ba-kyii ng ne mbé ne kángkáng banet bakíri.

¹⁴ Ne ké bubwô ámbu, mbé ba/chi ba-fé nshwam ba-kye Osówo ké bubwô enen ne kiǐtí-kyijé ké dyishí enen, ké bubwô ḿbú kiǐtí-kanong ńké Osówo oo/tông běn.

¹⁵ Kó n̂g Osówo asǎma ké eyáré emen nyí ee*nwa eri* nyí o/kye bě.