2 Koríntyan 7 - Bokyi Bible

¹ Kángkáng byěm ḿbyín ḿbyí Osówo o/ryí ocím, o/tî bě be, ǎ bacín-dyityém ejí. Ké bubwô ámbu kâng, bâ n̂g byi-soo enyam-byiko eten ne basun eten ké kángkáng byěm-ociring. Bâ n̂g byi-kyú kerededet ké dyikpen ńdyí dyi/kwárê ne Osówo, ké dyikpen ekyú ne bushî ḿbú Osówo.

Bunyîn-Dyityém ḿbú Pôl

² Bâa n̂g atyém enen ba-tî bě wááng. Be byi*da/chi onet nang obónge kyibî* byi*da/chi onet nang obónge o-bên ké byibî-byěm etángê*. Byi*da/koo chwǒm ńkyí kyi/já onet okíri*.

³ Me n*fí n-sét ng ńkyín n/fu, ben ba/chi kyibî*. Ké ebóng, wǎ eringe nyí me m/mû nn/sét běn n/fu, ben bamu bě ké dyityém kanong kanong ńkyí kyi/chi bě byimu kyikit kyibónge kángkáng nkéré, nang byimu okpó, nang byi-kpú okpǔng.

⁴ Me n/fé dyityém ne ben kanong kanong. Me mu n-tông ng byiko ké bubwô enen. Ké kángkáng afaníkong eten, dyityém ejí dyi/tôong ne busa chwóó. Dyityém ejí dii/sú ne bunyîn-dyityém kanong kanong.

⁵ Nang ké nkéré byi/ribi Masedónya, be byi*da/man ejáng*. Afaníkong a/mû ké kángkáng byikit, ashwôn ne barî-banet, ne bushî ké atyém eten.

⁶ Nké Osówo mú mu o-fâ banet ḿbé mbe kyísí kyísí busa o/fé bě busa ké obê mú Tátus o/bê.

⁷ *Chí nang ké obê emen nké nke* nké ńkyí nyǐ o/sét bě to eringe nyí ben ba/fé ǎ busa. Nyǐ o/sét mě eringe ben bamu ba-ryuu ng ba/fu, ba-ri ng mě, ne eringe nyí byiko mbyi byi-kpú u běn, ne eringe nyí ben ba/kpá byiko ba/fu, ba-sét ng kanong kyi-kim ne me. Ké bubwô ḿbún kâng, me m/bwa n-firi kántîk ké bunyîn-dyityém n-shwôm.

⁸ Ké ebóng, â nang léta ejí ámu o/chi běn ba-firi ké bafip, byiko byi*fí byi-kpú u mě ké n/sáng kámú*. Byiko byi/mû byi/chi byi-kpú mě kyi-kim ne mǔ ké nkéré mú n/ri n/fu, léta ámu o/chi běn ba-kyú ké bafip ké kaǎnyín-nkéré.

⁹ Nké kántîk, n/firi ké bunyîn-dyityém, *chí ké bubwô ḿbú n/chi běn ba-kyú ké bafip* nké, ké ebóng, bafip enen ba/chi běn ba-yángê akwóp-dyikpen enen. Osówo nké o/kye běn bafip ámbe, ne ké bubwô ámbu, be byi*da běn echi kyibî*.

¹⁰ Ké ebóng, bafip ḿbé Osówo odakye ba-cen n ne byiko ekpú ne byibî emîng ḿbyí byidacen ne Osówo o-nyii bě, ne ájângmé a*fí ké kafâ*. Nké bafip ḿbé ejíí edakye ba-cen n ne bukyû.

¹¹ Ké ebóng, kan n̂ achi ba-ri ńkyí Osówo o/chi ne bafip enen ḿbé baa/chi běn ba-firi ne busa. Baa/chi běn ba-kú ba-ryuu ng ba/fu, ben ba-chi i banet ba-nyît ba/fu, ben ba*fí ne ébîn*. Ké busa-dyityém ámbu ne ofong ekédê ámu ne ékyíkéré ányi ne ofê amu ne okabe ámu mú badakye nchi kyibî busông, ben baa/tông byiko enen ba/fu, ben ba*da/chi kyibî* ké kyiraa ánkyi kyimúmú.

¹² Ké bubwô ámbu kâng, nang ké n/sáng léta ámu, kyi/mû kyi*fí ké bubwô ḿbú onet mú o/chi kyibî* nang ké bubwô ḿbú onet mú ba/chi ǎ kyibî*. Nké me n/sáng kámú n/fu, n-tông ng běn wááng ké bushú ḿbú Osówo eringe nyí ben bamu ba-fâ bě kanong kanong.

¹³ Nkyí nké kyi/chi ne be byi-firi ne busa. Tátus o*da bě efé busa nké nke* nké o/chi bě to byi-firi ké bunyîn-dyityém, ké bunyîn-dyityém emen ḿbú o/mû ne mbú kyi-kim ne eringe nyí ben ashí kángkáng ba/chi ǎ o-kyú ké bunyîn-dyityém.

¹⁴ Me m/mû m/kpee běn n-sét Tátus, ne ben ba*da mě efé bushú ké kafâ*. Be kángkáng nkéré byimu byi-sét ng běn ntûntû. Ké bukwóp ámbu bubónge, eringe nyí be byi/kpee běn byi-sét Tátus, kii/chi eringe nyí be byi/sét.

¹⁵ Ne ké bubwô ámbu, kyijé ńkyí nyǐ mu ne ben nkyi kyi-shwane e kyi-câ, nang nkéré orá nké o/zîim eringe nyí ben ashí kángkáng ba/kpá byiko ba/fu, ba-chi i ńkyí nyǐ o/sét, ne eringe nyí ba/koo ǎ ne bushî, ba-ziri ng banê.

¹⁶ Me mu ké bunyîn-dyityém kanong kanong n/fu, m-man n ejêem esim ne ben kángkáng.