2 Koríntyan 2 - Bokyi Bible

¹ Ké bubwô ámbu kâng, me n/tî dyityém ejí kyi-kim ne ńkyín. Me mm*ba/chi n-chîbê n-kâm běn* n-chi běn ba-firi ké bafip*.

² Ké ebóng, â m/mû n/fu, n-chi i běn ba-firi ké bafip, yeě o/chi o-waa mú oda mě echi n-kyú ké bunyîn-dyityém. Kyi*da/shwôm bachíchí-banet ḿbé me nn/chi ba-firi ké bafip*.

³ Nkyí nké kyi/chi ne n-sáng běn léta ámu. Me m/mû n*fí n-ryuu ng n/fu, m-bâ n-kâm běn* banet ḿbé ba/mû ba/chi ba-chi mě n-firi ké bunyîn-dyityém, ba-bwa ba-chi mě n-firi ké bafip*. Ké ebóng, me mu n-nyît ng ké ntûntû n/fu, â me mu ké bunyîn-dyityém, ben to ashí kángkáng ba-kyú u ké bunyîn-dyityém.

⁴ Me n/sáng běn ne kiǐtí-bafip ké dyityém ne batíí chwóó ké achi, *chí ké bubwô ḿbú n/fu, n-chi i běn ba-firi ké bafip* nké n/fu, n-chi i běn ashí kángkáng ba-nyît eringe nyí ben bamu ba-jê ng mě.

Opwoo mú Onet mú oda ǒ echi Kyibî

⁵ Nké â onet nang obónge oo/chi onet o-firi ké bafip, onet ámu o*da mě echi me* nké o/chi běn ben. Me n*fí n-ryuu ng n/fu, n-jang ng běn ebîn ashí amúmú* ké ebóng, banet bakíri baa*man ekyú ne abwô ké kafâ*. Katô *chí banet bamúmú nké ba/chi kánkyí*.

⁶ Busông ḿbú bujê-banet ké burwám enen ba/kye ǎ bu/kwárê.

⁷ Kántîk kâng, kyi-nwa ng ńkyí bada ǎ epwoo, ba-fé ǎ busa, eringe nyí oo*ba/chi o-firi ké bafip ḿbé bada ǎ eshwôm busa*.

⁸ Me n/tîm běn arông n/fu, chi n̂g ǎ o-nyît kâng o/fu, nyǐ ké ntûntû mu o-jê ng běn.

⁹ Me n/sáng běn léta ámu ké ochíchí-dyishí-chwǒm ńdyín. Me m/mû mu n-ryuu ng n/fu, n-nyît ng eringe nyí okan ámu o/chi běn, ne n/fu, n-nyît ng to â ben kángkáng nkéré bamu ba-koo ng bacê ḿbé me mu n-kyâ běn.

¹⁰ Â ben ba/pwoo onet ké kyibî ńkyí oo/chi, me to m-pwoo ng ǎ. Ké ebóng, â me m/pwoo onet, â ké ntûntû nkyi ńkyí me ndapwoo chwǒm nang kyibónge, mu n-chi i kánkyí ké bubwô enen, ké bushú ḿbú Karâs,

¹¹ eringe nyí mm*ba/chi m-bángê Sátan o-kpógê bě* ké ebóng, be byimu byi-nyît ng byěm ḿbyí mu o-kabe ng.

Ofong mú o/kédê Pôl ké Tórówas

¹² Ké nkéré mú n/ribi Tórówas, n/fu, n-sét ng banet Bǎmpém ḿbé Banong kyi-kim ne Karâs, me n/ri n/fu, Otu Kyítá oo/bâa bukwóp ḿbú ndachi bǎmkpóngé ámbe ké oshê ámu.

¹³ Nké ofong o/kédê mě kanong kanong, ké ebóng, n*da/ri Tátus mú wǎn-boné eten*. Ké bubwô ámbu, n/sét banet-oshê ámu n/fu, bakyú kanong, ne n-dim n-wâa Masedónya.

Okpóge ké Bubwô ḿbú Karâs

¹⁴ Nké asǎma akyú ne Osówo. Ké ebóng, ké ocibi ne Karâs, Osówo kángkáng nkéré mu o-câ bě kashú wǎ banet-mgbokobá ḿbé mbe ké otáng-banet ḿbé mbe ba-jê ng dyikpóge ńdyí Karâs o/kpógê. Osówo mu o-yip ng bě o-chi onyît mú banet kyi-kim ne Karâs o-káng kángkáng byikit wǎ chwǒm ńkyí kyidanyîn kyinung.

¹⁵ Ké ebóng, be byimu wǎ kyinung-burwan ḿbú Karâs mu o-yip ng o-chi kyifen o-kye Osówo, ńkyí nkyi kyi-káng ng kyi-câ ké burwám-banet ḿbé Osówo mu o-nyii ng kámbé ne ḿbé mbe ba-tánê e ba-câ.

¹⁶ Ké burwám-banet ḿbé mbe ba-tánê e ba-câ, burwan ámbu mbu kámbé wǎ kyibî-chwǒm ńkyí kyidaju onet. Nké ké burwám-banet ḿbé Osówo mu o-nyii ng kámbé, mbu kámbé wǎ chwǒm ńkyí kyinong ńkyí kyidakye dyikpen. Yeě kâng mú odaman echi dyizong-bǎmkpóngé ńdyín.

¹⁷ Be byi*fí wǎ banet bakíri chwóó* ḿbé mbe ba-kúng ng kyitwóm-Osówo wǎ dyitû-byěm ḿbyí bii*shwane kasî*. Nké, ké ebóng, Osówo oo/twóm bě, be byimu byi-sét ng ne ntûntû ké bushú emen wǎ bǎmgbán ḿbé Karâs.