2 Jǒn 1 - Bokyi Bible

¹ Me onet-dyishí enen nké mu n-sáng ng n-kye otu-onyinyi mú Osówo o/cá ǎ ne bwǎn emen ḿbé mbe ba-jê ng mě ké ntûntû. Ben ba*fí ba-jê ng mě me kǎnchí*. Nké bamu ba-jê ng kángkáng banet ḿbé mbe ba-nyît ng ntûntû.

² Ké ebóng, ntûntû mu ne be, ne o/chi o-waa ne be ne banyá ne banyá.

³ Kyi/bát Osówo Bonchí ne Jisos Karâs mú Wǎn-Osówo Bonchí, bakye bě ochwâp, ba-ri bě bafip, ba-kye bě to bunyîn-dyityém. Kyi/bát byěm ḿbyín byikyú ne be mú byimu byi-nyît ng ntûntû, ne byimu byi-tông ng barî kyijé.

Ntûntû ne Kyijé

⁴ Dyityém ejí dyi/nyîn mě kanong kanong ké nkéré mú n/jwo ba/fu, kyicê-bwǎn eyên mbe ba-kyú u ké édúú nyí ntûntû wǎ eringe nyí Osówo Bonchí o/kye bě kyije.

⁵ Ké bubwô ámbu kâng, me mu n-tîm m ǒ arông, ǎ otu-onyinyi n/fu, be kángkáng byikûtông barî kyijé. Nyín *chí kyije ńkyí kyifyîfî nké mu n-sáng ng n-kye běn*. Kyije ńkyín kyi-chi i kyije ńkyí byi/koo kyi-fím ké kiimkpet kyikû.

⁶ Kyijé ńkyín ńkyí me mu n-raa ng kyi/byí něen kyi/fu, be byi-man byi-kyú ké ofê mú byěm ḿbyí Osówo mu o-sét ng bě o/fu, be byichi. Wǎ eringe ben kángkáng baa/jwo kyi-fím ké kiimkpet kyikû, kyije ánkyi kyi/fu něen, ben kángkáng ba-man ba-kyú ne kyijé ne Osówo ne barî-banet.

⁷ Bannîm banet chwóó baa/káng ejíí emúmú. Mbé nké mbe banet ḿbé ba*fí ba-sét ng ba/fu, Jisos Karâs o/bê wǎ onet*. Dyizong-onet ándyi o-chi i nnîm banet, ne mu Onet-Bushwôn mú Karâs.

⁸ Bám m̂ byiko enen kâng, eringe ńkyí ben baa/chi bǎmkpóngé ba-já kii*ba/chi kyi-tánê běn*. Nké ba/chi ba-bwa ba-koo eyáré enen kerededet.

⁹ Nang yeě nké mu o-fâ byěm byikíri ké kafâ-byěm ḿbyí Karâs o/tángê, onet ámu o*fí ne Osówo ké dyityém*. Nang yeě nké mu o-waa ng ne byěm ḿbyí Karâs o/tángê, onet ámu mu ne Osówo Bonchí, ne mu to ne Wǎn-Osówo ké dyityém.

¹⁰ Nang yeě nké o/bê o-kâm běn kâng, mú o*fí o-tángê e ńkyí Karâs o/tángê* *da n̂g echi ba-koo ǎ ba-tî ké byise enen*. *Da n̂g ǎ efu nang ofu ófu bunyîn-dyityém bukyú ne wo*.

¹¹ Ké nǎ, nang yeě nké mu o-ryuu ng dyizong-onet ándyi o/fu, okyú ké bunyîn-dyityém, nyǐ to mu ne nyǐ ké byibî-byěm ḿbyí onet ámu mu o-chi i.

Nkuli Kyikû-Byiraa

¹² Me mu ne byěm chwóó ḿbyí nda běn esét. Nké n*fí n-ryuu ng n/fu, n-sét ng běn kámbyí ké kafâ-kiǐbáá-nwet ne omu-nwet*. Nké n/kabe n/fu, n/chi m-bâ m-ba-ri běn, m-pem ne ben me oyén ké ejá, eringe nyí bunyîn-dyityém eten budakwárê kerededet.

¹³ Bwǎn ḿbé wǎn-boné eyên mú onyinyi mú Osówo o/cá ǎ ba/ta běn kyiraa.