1 Tyímótyi 4 - Bokyi Bible

Bantánge Byěm kyi-kim ne Osówo ḿbyí byi*fí ké Kafâ*

¹ Busun-Osówo mbu bu-sét ng wááng bu/fu, banet bakíri ba/chi ba-mîng atyém ebe nyí ba/fé ne Karâs ké nkéré mú mu o-bâ. Mbé ba/chi ba-kûchi ńkyí bací ḿbé badasét kyisédéng mbe ba-sét ng, ba-chi to byěm ḿbyí byibî-bací mbyi byi-tángê e.

² Byěm ḿbyín ḿbyí mbe ba-tángê e mbyi byi-fím m ne bannîm banet ḿbé mbe bansêt byisédéng, ne ḿbé atyém ebe a/firi wǎ ba/tím kányí ba-ju ké osông mú oo/sóng o-bwam.

³ Azong-banet ányi nyi a-tángê e a/fu, kii*nwa ńkyí adabé onyi* ne ńkyí adaryí azong-byiryíng akíri*. Nké Osówo o/chi byiryíng ḿbyín o/fu, banet ḿbé ba/bángê ké Karâs, ne baa/nyît ntûntû baryí kámbyí ké nkéré baa/kó ǎ asǎma.

⁴ Chwǒm nang kyirá ńkyí Osówo o/chi nkyi kanong. Chwǒm kyi*fí ńkyí badané* nké bakoo kánkyí ne asǎma ekó*.

⁵ Ké nǎ, ejá nyí Osówo ne asǎma ekó ányi byi-chi i kánkyí kyi-firi chwǒm ńkyí kyinong ké bushú ḿbú Osówo.

Ḿgbán mú Onong mú Jisos Karâs

⁶ Wo a/chi a-kyú ḿgbán mú onong mú Jisos Karâs, mú Osówo mu o-nen n ké byiraa emen ḿbyí byi/kim ne dyityém efé ne Karâs, ne ké byěm ḿbyí otánge mú ntûntû ḿbyí amu a-chi i, â a/kye barî-banet eten bacê ḿbén.

⁷ Nké né biǐshwô ámbyi ḿbyí kpákpá ḿbyí byi*da/kim ne Osówo enyît*. Ḿbyí byi*da/kwárê ḿbyí badasét*. Waa ké byiko eyên etángê, ké dyikpen ńdyí Osówo ekyú.

⁸ Enyam-byiko enáng ké acáá echi kyi-chwáp ng enyam-byiko, nké dyityém enáng dyi-chwáp ng ké akwóp amúmú, ké nǎ, ndyí ndyi dyi-ryí i ocím mú dyikpen ekye kántîk, ne ké nkéré mú mu o-bâ.

⁹ Ńkyín nkyi chwǒm ńkyí ba/sét ntûntû ne kyi/kwárê ńkyí badakoo kánkyí kerededet.

¹⁰ Ké bubwô ámbu nké byimu byi-kan n byi-chi bǎmkpóngé byi-fé busa, ké nǎ, bii/tî achi eten ké Osówo mú mu okpó, mú mu Onet-Onyii mú kángkáng banet, aciringaciring banet ḿbé mbe ba-bángê e ké Karâs.

¹¹ Kye busa a-tángê byěm ḿbyín.

¹² *Dachi a-bángê onet nang obónge o-kye ǒ edángé* ké ebóng, wo amu wǎsíng*. Nké kyú wǎ kyiká-bucen ńkyí banet ḿbé ba/bángê ké Jisos, ké byiraa eyên ne ké édúú eyên ne ké kyijé eyên ne ké dyityém eyên efé ne Karâs ne dyityém kpárám.

¹³ Tî nkéré eyên ne busa eyên ké ejá-Osówo ekó gbúúl nyí ba/sáng kyísí ne ké Bǎmpém ḿbé Banong epem ne ké byiraa-Osówo etángê tete m-bâ.

¹⁴ *Dachi a-né eyáré nyí amu ne nyǐ* nyí Osówo o/kye ǒ ké nkéré mú bamkpábé ḿbé badasét byiraa-Osówo ba/raa, ne banet-ashí-ékwâbashi nyí Karâs ba-twôom ǒ abwô ebe ké byiko*.

¹⁵ Kûchi byěm ḿbyín kángkáng nkéré, a-yip byiko eyên a-kye ké mbyí, eringe nyí kángkáng banet badari ba/fu, wo amu a-câ kashú.

¹⁶ Bám byiko eyên ne byěm eyên to ḿbyí amu a-tángê e. Chi byěm ḿbyín a-ca kashú, ké ebóng, â amu a-chi i kámbyí, wo a/chi a-nyángê byiko ḿbyí eyên, cibicibi ne banet ḿbé mbe ba-jwo ng ǒ.