1 Tyímótyi 3 - Bokyi Bible

Banet-Ashí ḿbé Ékwâbashi nyí Karâs

¹ Ńkyín nkyi ntûntû ńkyí ba/fu, â onet mu o-ryuu ng o/fu, nyǐ o-kyú u onet-dyishí-ékwâbashi nyí Karâs, onet ámu mu o-ryuu ng bǎmkpóngé ḿbé banong banong.

² Onet-dyishí-ékwâbashi nyí Karâs o-man o-kyú onet mú o*fí ne kyibî*. O-man o-kyú ne onyi obónge. O-man o-kyú ne achi wááng, ne o-man n ekám byiko emen. O-man o-kyú ne ofê. Nyǐ o-man o-koo bacinbánet kanong ké kyise emen. O-man o-kyú onet mú odaman etángê.

³ Oo*man o-kyú onet mú odabwóm bato* nang mú odanwa anwa* nké o-kyú u onet mú degere ne mú bunyîn-dyityém. Oo*man o-kyú ne kyijé ńkyí akpuga*.

⁴ O-man o-kyú onet mú odaman etún kyikû-banet emen kanong, o-chi bwǎn emen ba-kûchi ńkyí badasét kámbé ne ofê ké kángkáng akwóp.

⁵ Ké nǎ, â onet o*fí o-nyît ng eringe nyí odatún kyikû-banet emen* nyǐ o-cen n nǎ ne o-man etún banet-ncibi mú Osówo.

⁶ Nyǐ oo*man o-kyú onet mú o/nung ké ékwâbashi nyí Karâs abeabe*. Â kyi*fí éné* nyǐ o/chi o-sú ne byiko etông, ne Osówo o/chi o-pan ǎ kyibî-mpan wǎ eringe o/pan Otu-Byibî-Barím.

⁷ Nyǐ o-man o-kyú onet mú banet ḿbé ba*fí ké ékwâbashi nyí Karâs* mbe ba-kyâ ǎ ofê, eringe nyí baa*kye ǎ edángé* o-róng ké kaǎtám ńké Otu-Byibî-Barím*.

Banet-Ochwâp ḿbé Ékwâbashi nyí Karâs

⁸ Banet-ochwâp ḿbé ékwâbashi nyí Karâs ba-man ba-kyú banet to ḿbé mbe ne édúú nyí enong ne ntûntû. Baa*man ba-kûjwáp bato ba-jê ba-shwôm* nang ba-kûshwam byěm*.

⁹ Mbé ba-man ba-bwom ne dyityém wááng ké ntûntû kyi-kim ne dyityém efé ne Karâs, mú o/mû Osówo ké dyityém.

¹⁰ Banet-ékwâbashi nyí Karâs ba-man ba-kye kámbé okan kpá. Ne â ba/shwôm kâng okan ámu, bafiri banet-ochwâp.

¹¹ Banyi ebe to ba-man ba-kyú ne édúú nyí enong, ne baa*man ba-kûraa byibî-byiraa byi-kim ne banet*. Ba-man ba-kyú ne achi wááng ne ntûntû to esét ké kángkáng byěm ḿbyí mbe ba-chi i.

¹² Onet-ochwâp mú ékwâbashi nyí Karâs o-man o-kyú ne onyi obónge, ne o-man n etún bwǎn emen ne kyikû-banet emen kanong.

¹³ Banet ḿbé mbe ba-chi i bǎmkpóngé ḿbé banong mbe ba-já ng ofê, ne ba-man eraa, nang onet baa*shî* kyi-kim ne dyityém ebe ńdyí ba/fé ké Jisos Karâs.

Kiǐtí-Kadip ńké Ékwâbashi nyí Karâs

¹⁴ Me n/kabe n/fu, n/chi m-bâ m-ba-ri ǒ abeabe eringe nyí mu n-sáng ng léta mún n-kye ǒ.

¹⁵ Nké â n*da/wá ebê* léta mún o/chi o-chi ǒ a-nyît eringe nyí byidatî byiko eten kanong ké kyikû-banet-Osówo ńkyí banet-ncibi mú Osówo mú mu okpó, mú mu kyikwap ne kyitíring ńkyí ntûntû.

¹⁶ Onet o*fí mú odané eringe nyí kiǐtí-kadip ńké ékwâbashi nyí Karâs nke*. Ńké ba/fu, nyǐ o/byí wááng ké dyizong ńdyí onet, Busun-Osówo bu/tông bu/fu, nyǐ o/kwárê, ne barím ḿbé banong ba/ri ǎ. Ba/pem ké ejíí kyi-kim ne nyǐ. Banet ba/bángê ne nyǐ ké ejíí, ne Osówo o/yip ǎ o-jâ kyíbóng.