1 Tyímótyi 2 - Bokyi Bible

Ofê ekye ké Kyise-Ékwâbashi nyí Karâs

¹ Mbwôp kashú-chwǒm kâng, me mu n-sét ng n/fu, byěm ḿbyí byi/fárâng bě esét ne banshwam efé ne byěm ebí ne asǎma ekó, byikûkye Osówo ké bubwô ḿbú banet kángkáng

² ne ké bubwô ḿbú batu ne kángkáng banet ḿbé mbe batu-ashí, eringe nyí byidakyú ké dyikpen ńdyí degere ne ńdyí bunyîn-dyityém ne ńdyí byidakye Osówo ofê ne édúú nyí enong.

³ Ńkyín kyi-nwa ng, ne kyi-nyîn n Osówo to dyityém mú mu Onet-Onyii eten,

⁴ mú mu o-ryuu ng o/fu, nyǐ o-nyii ng nang yeě nang yeě, ne onet ámu to o-nyît ńkyí nkyi ntûntû.

⁵ Ké ebóng, Osówo mu obónge, ne onet mu kô to obónge mú mu o-cibi ng Osówo ne banet kyikit kyibónge. Onet ámu, ányi Jisos Karâs

⁶ mú o/kye kyitông emen o-ré dyifwá ńdyí kángkáng banet. Ńkyín kyi/tông wááng ké ochíchí-nkéré, kyi/fu, Osówo mu o-ryuu ng o/fu, nyǐ o-nyii ng kángkáng banet.

⁷ Ne nkyí nké Osówo o/twóm mě wǎ onet-kyitwóm emen ne wǎ ntánge banet ḿbé ba*fí banet-Jûs* eringe nyí ndasét kyitwóm ńkyí ntûntû ne dyityém efé ne Jisos. Me n*fí n-sét ng byidîp*. Mu n-sét ng ntûntû.

⁸ Me mu n-ryuu ng n/fu, ké nkéré nang orá mú badatî ékwâbashi, banyinchéng bakûfé nshwam, banet ḿbé baa/kúng byiko ebe ba-kye Osówo, ne ba-man n ebêem abwô ebe kyíbóng ké nshwam efé, kafâ kaa*sa kámbé* nang ké dyishí to baa*kán*.

⁹ Me mu n-ryuu ng n/fu, banyinyi to ba*dakûtông byiko ba-róng ng enyam* kyi-kim ne byídí ebe* ne bakû-bwá byídí ké bukwóp ḿbú bunong, *chí ne eji nyí enong enong nyí badatím* nang byibwáng nang byirá* nang ne byídí ḿbyí byidashwane kasî*.

¹⁰ Nké bwá n̂g kámbyí ké bukwóp ḿbú byěm ḿbyí byinong echi wǎ eringe kyi/kwárê ne banyinyi ḿbé ba/fu, mbé ba-chi i banet ḿbé mbe ba-fâ Osówo.

¹¹ Banyinyi bakwâa byěm ké pyêp ecíbî ne byiko ejwâa kyísí.

¹² Me n*fí m-bángê e n/fu, banyinyi batángê banyinchéng* ba-sét nang kámbé ńkyí badachi*. Mbé ba-man ba-kyú pyêp.

¹³ Ké nǎ, Osówo o/chi Ádam kpá ne o-chi Êef.

¹⁴ Ne *chí Ádam nké Otu-Byibî-Barím o/nîm ǎ*. Kyi/mû mú onyinyi nké Otu-Byibî-Barím o/nîm ǎ, ne o-bên kyije-Osówo*.

¹⁵ Nké Osówo o-nyii ng onyinyi ké bubwô-bwǎn efwon, â nyǐ o/waa ne dyityém efé ne Karâs ne kyijé ne kanong ké bushú ḿbú Osówo ne budegere.