1 Tyímótyi 1 - Bokyi Bible

¹ Me Pôl mú mu onet-kyitwóm-Jisos Karâs ké busa ḿbú Osówo mú mu o-nyii ng bě ne ké ḿbú Jisos Karâs onet-achi etî eten nké mu n-sáng ng léta mún

² n-kye Tyímótyi mú mu wǎn ejí mú ntûntû ké dyityém efé ne Karâs. Kyi/bát Osówo Bonchí eten ne Jisos Karâs, Otu Kyítá eten bakye ǒ ochwâp, ba-ri ǒ bafip, ba-kye ǒ to bunyîn-dyityém.

Ekó ekuri kyi-kim ne Byiraa-Ékwâbashi etángê ḿbyí byi*fí ké Kafâ*

³ Me mu n-ryuu ng ǒ n/fu, waa ké Éfyísus wǎ eringe nyí n/sét ǒ ńdyí m/mû n-wâa ng Masedónya. Banet bakíri ányi ké oshê ámu mbe ba-tángê e byiraa-ékwâbashi ḿbyí byi*fí ké kafâ*. A-man a-sét kámbé ké busa ba-mîng kámbyí etángê.

⁴ Sét kámbé ba-mîng biǐshwô ámbyi ne biintintang-etáng-azîn nyí banet ḿbé kpákpá, ké nǎ, ḿbyín byi-kyâ okân ké dyishí mǔ mu. Mbyí byi*fí byi-chi i bǎmkpóngé ḿbé okabe mú Osówo* mú dyityém efé ne Osówo dyidachi ba-nyît kámú*.

⁵ Me mu n-kyâ busa ḿbún, eringe nyí kyijé kyidakyú ńkyí nkyi kyi-fîm m ké dyityém ńdyí kpárám ne ké ńdyí ndyi wááng ne ké ńdyí ba/fé ne Karâs ntûntû.

⁶ Banet bakíri baa/né byěm ḿbyín, ne baa/tánê bukwóp ebe ké enyam-bǎmpém ne barî.

⁷ Mbé mbe ba-ryuu ng ba/fu, mbé ba-kyú u bantánge Byije-Músis, nké mbé ba*fí ba-nyît ng kyikû ńkyí byiraa ebe mbé bayén byi/byí* nang kyikû ńkyí Byije-Músis ḿbyí mbé mbe ba-jang ng eraa ba/fu, mbé mbe ba-sét ng ntûntû*.

⁸ Be byimu byi-nyît ng byi/fu, kyije nkyi kyi-nwa ng, â byimu byi-tî ng kánkyí kerededet.

⁹ Byi-man byi-zîim byi/fu, *chí ké bubwô-banet ḿbé banong nké mbe ba-chi i byije*. Nké ba-chi i kámbyí ké bubwô ḿbú bambên byije ne bankakafem ne ké bubwô-banet ḿbé baa*nyît Osówo* ne ḿbé banchi byibî ne ké bubwô-banet ḿbé ba*fí ba-fâ Osówo* nang Busun emen* ne ké bubwô ḿbú banet ḿbé mbe ba-ju ng banchí ne bané ne ké bubwô ḿbú banju banet

¹⁰ ne ké ḿbú banchi byibî-byěm kyi-kim ne banet erí ne ké ḿbú banyinchéng badarí ne bábe-banyinchéng wǎ mbe ba-rí i ne banyinyi ne ké ḿbú banjii banet ne ké ḿbú banet ḿbé mbe ba-sét ng byisédéng ne ké ḿbú banet ḿbé mbe ba-bwom m ntûesé-kyisédéng, nang ḿbé mbe ba-chi i chwǒm nang kyibónge ńkyí kyi/yángê ne otánge mú ékwâbashi nyí Karâs mú ntûntû.

¹¹ Otánge ámu mu ké Bǎmpém ḿbé Banong ḿbé Osówo o/kye mě o/fu, me nsét. Bǎmpém ḿbé ba/fím ne Osówo mú badakpee busan emen ḿbú ragerage.

Byikó Osówo Asǎma ké Bafip ḿbé mu o-ri ng Bě

¹² Me mu n-kó ng Jisos Karâs, Otu Kyítá eten asǎma mú o/kye mě busa ḿbú mu n-chi i bǎmkpóngé ejí. Me mu n-kó ng ǎ asǎma ké okabe mú nyǐ o/kabe o/fu, me n/kwárê, ne o-koo mě o/fu, me nkyú ḿgbán emen.

¹³ Nang ké me m/mû mu n-raa ng byibî-byiraa ne nyǐ ké nkéré mú o/shwôm ké esim, n-kyâ ǎ busông, n-kyâ ǎ edángé. Nké Osówo o/ri mě bafip, ké ebóng, me m/mû n*da/fé dyityém ejí ne Karâs* ne ké bubwô ámbu, me m/mû n*fí n-nyît ng ńkyí mu n-chi i*.

¹⁴ Ne Otu Kyítá eten o/chi kanong emen ńké kaa*nwa ekan* ka-ta mě, ne o-chi mě n-fé dyityém ne nyǐ, o-kye mě to kyijé, ḿbyí mbyi ḿbyí eten ké ocibi ne nyǐ.

¹⁵ Nyín ochíchí-ntûntû mú banet badakoo ne mú badabángê ké mǔ to kanong ba/fu, Jisos Karâs o/bê ké ejíí, eringe nyí odanyii banchi byibî. Me m/bên n-shwôm banchi byibî kángkáng.

¹⁶ Ne kyi/mû ké bubwô ḿbún nké Osówo o/ri mě bafip, eringe nyí Jisos Karâs odatông ofit emen eryí kanong kanong ne me, ne n-kyú wǎ ekap nyí kángkáng banet ḿbé ba/chi ba-fé atyém ebe ne nyǐ ké nkéré mú mu o-bâ, ne ba-koo dyikpen ńdyí ne banyá.

¹⁷ Akpee ne ofê byikyú ne Otu mú ne banyá, mú oo*kpú* ne oo*nwa eri* nyǐ mú mu Osówo kǎnchí, ne banyá ne banyá. Kyi/bát kyikyú éné.

¹⁸ Tyímótyi mú wǎn ejí ké bubwô ḿbú Karâs, me n/kye ǒ busa ḿbún. Nkyi wǎ eringe byiraa ḿbyí bamkpábé ḿbé badasét byiraa-Osówo ba/raa kyi-kim ne wo ké nkéré mú o/shwôm ké esim chwóó. Mîng byiraa ámbyi byi-kyú ǒ byěm-bunwa ké nkéré a-kú a-nwa ng ne Sátan ne busa.

¹⁹ Tî dyityém eyên ńdyí a/fé ne Karâs, a-kyú to ne dyityém eyên wááng. Banet bakíri ba*da/jwo ne ńkyí atyém ebe nyi a-sét ng kámbé* ne baa/bên dyityém ebe ńdyí ba/fé ne Karâs.

²⁰ Himényos ne Alyikyizánda mbe ké burwám-banet ámbe ḿbé nn/yip kámbé n-kye ba/firi ké busa ḿbú Sátan, eringe nyí badatángê kámbé ba-mîng byibî-byiraa eraa ba-bât ng Osówo.