1 Tesalónyan 5 - Bokyi Bible

Kpá n̂g Byiko ké Obê mú Otu Kyítá

¹ Be bii*ba/chi byi-bên nkéré dyikáá* ǎ bwǎn-bané eten, byi/fu, byi-sáng ng běn kyi-kim ne nkéré ne bankéré ḿbé byěm ḿbyín byi/chi byi-chi*.

² Ké ebóng, ben bayén bamu ba-nyît ng kanong kanong ba/fu, Dyicí ńdyí Otu Kyítá o/chi o-bâ dyi-kyú u wǎ eringe nyí onet-kajii odabê ne buchú.

³ Ké nkéré mú banet badafu, byikit bii/chee, kángkáng byěm byi/firi kanong, nkéré ámu kâng nké byěm byidabên kámbé, nang ekpu baa*tî*. Baa*ba/chi ba-man efem*. Kyi/chi kyi-kyú wǎ bubân ḿbú onyinyi odajwo ké nkéré mú o-kú o-fwon n.

⁴ Nké ben, ǎ bwǎn-bané eten, ba*fí ké kyifip* ne Dyicí ándyi dii*ba/chi dyi-byí běn kiǐmút* wǎ onet-kajii*.

⁵ Ben ashí kángkáng bamu banet ḿbé kiinwángé, ḿbé ba/já esû. Be byi*fí banet ḿbé buchú* nang ḿbé kyifip*.

⁶ Ké bubwô ḿbún kâng, be byi*dachi byi-kûrê burê wǎ banet bakíri*. Byi-kyú u achi fúú ne achi wááng.

⁷ Ne buchú nké banet badarê burê. Ne buchú nké badabwóm bato.

⁸ Nké be byi-chi i banet ḿbé esû. Byi-man byi-kyú achi fúú ne achi wááng. Byi-man byi-fé kyijé ne dyityém eten ńdyí byi/fé ké Karâs ké byiko wǎ nkyû-byití, byi-cít to achi eten nyí byimu byi-tî ng ké onyii mú Osówo ké dyishí wǎ etam-byití.

⁹ Osówo o*da bě ecá o/fu, busa-dyityém emen buta bě*. Nké o/cá bě o/fu, be byikoo onyii ké bubwô ḿbú Jisos Karâs, Otu Kyítá eten

¹⁰ mú o/kpú ké dyishí eten eringe nyí be byidakyú kyikit kyibónge ne nyǐ, nang byimu bakpó, nang bii/kpú, ké nkéré mú nyǐ o/chi o-bâ.

¹¹ Ké bubwô ḿbún kâng, fé n̂g barî busa, ba-chwáp ng barî wǎ eringe nyí bamu ba-chi i kántîk.

Nkuli Kyikû-Bacê ne Kyiraa eta

¹² Be byimu byi-tîm m běn arông, ǎ bwǎn-bané, byi/fu, kye n̂g banet ḿbé mbe ba-chi i bǎmkpóngé ké burwám enen ochíchí-ofê. Banet ámbe ḿbé Otu Kyítá oo/cá kámbé o/fu, batún běn, ba-kye běn bacê.

¹³ Tî n̂g kámbé ne kiǐtí-ofê ne kyijé ké bubwô-bǎmkpóngé ḿbé mbé mbe ba-chi i. Kyú n̂g ké bunyîn-dyityém ne barî.

¹⁴ Be byimu byi-tírîng ng běn, ǎ bwǎn-bané, byi/fu, kuri n̂g banet ḿbé mbe ba-dare ng ekó, fé n̂g banet ḿbé mbe ba-shî ng busa, chwáp n̂g banet ḿbé mbe kyeekyee, ryí n̂g ofit ne kángkáng banet.

¹⁵ *Da n̂g echi ba-bángê onet nang obónge o-só orî ewa ké kyibî ńkyí orî-onet oda ǎ echi*. Nké ké kángkáng nkéré, kyú n̂g ne okabe mú badachi ńkyí nkyi kanong ne barî ne kángkáng banet to.

¹⁶ Kyú n̂g kángkáng nkéré ké bunyîn-dyityém.

¹⁷ Fé n̂g nshwam kángkáng nkéré.

¹⁸ Kû n̂g ekó Osówo asǎma ké kángkáng byěm. Ńkyín nké Osówo mu o-ryuu ng o/fu, ben bachi ké dyikpen enen, ké ocibi eten ne Jisos Karâs.

¹⁹ *Da n̂g echi ba-ku Busun-Osówo*.

²⁰ *Da n̂g echi ba-né kyitwóm ńkyí Busun-Osówo bu/twóm bamkpábé ḿbé badasét byiraa-Osówo ba-kye běn*.

²¹ Kan n̂ kángkáng byěm ba-ri. Tî n̂g ńkyí nkyi kanong,

²² ba-né kángkáng byibî-byěm.

²³ Kyi/bát Osówo mú mu o-kyâ bě bunyîn-dyityém ochi běn ba-firi kanong ké kángkáng akwóp, o-fîm kángkáng ébîn ké kyirim enen kángkáng ké dyityém ne ké busun ne ké enyam-byiko, ké nkéré mú Jisos Karâs, Otu Kyítá eten o/chi o-bâ.

²⁴ Nyǐ mú mu o-kó ng běn o/chi o-chi kánkyí, ké ebóng, nyǐ o-tî ng ocím emen mú o/ryí.

²⁵ Fé n̂g nshwam ba-kye Osówo ké bubwô eten to, ǎ bwǎn-bané.

²⁶ Ta n̂g kángkáng barî-banet ḿbé ba/bángê ké Karâs kyiraa ne dyirwâm ńdyí kyijé.

²⁷ Me mu n-tírîng ng běn ké busa ḿbú Otu Kyítá n/fu, kó n̂g léta mún ba-sét kángkáng barî-banet ḿbé ba/bángê ké Karâs.

²⁸ Ochwâp mú Jisos Karâs, Otu Kyítá eten okyú ne ben.