1 Tesalónyan 4 - Bokyi Bible

Dyikpen ńdyí dyidanyîn Osówo

¹ Ké nkuli kyikû, ǎ bwǎn-bané, ben ba/kwâa ne be kyi-kim ne eringe nyí badakyú dyikpen, eringe nyí kyidanyîn Osówo dyityém. Ńkyín něen ké ntûntû nkyi bukwóp ḿbú ben bamu ba-kyú u. Nké kántîk, be byimu byi-tîm m běn arông, byi-tírîng ng běn ké bubwô ḿbú Jisos, Otu Kyítá byi/fu, chi n̂g ba-câ kashú kyi-shwôm éné.

² Ké ebóng, ben bamu ba-nyît ng bacê ḿbé byi/kye běn ké busa ḿbú Jisos, Otu Kyítá.

³ Nyín okabe mú Osówo o/tî běn. Nyǐ mu o-ryuu ng o/fu, ben bakyú kanong ké bushú emen, ba-né kángkáng byibî echi ḿbyí badarí ne banet ḿbé ba*da/bé ne dyibé*.

⁴ Nang yeě nang yeě onyît eringe nyí odabé onyi ké bukwóp ḿbú bunong ne ofê.

⁵ *Chí ne okabe mú kyibî kyi-kim ne banet erí* wǎ eringe nyí banet ḿbé ba*fí banet-Jûs* ḿbé ba*fí ba-fâ Osówo* mbe ba-chi i*.

⁶ Kyi-kim ne byěm ḿbyín kâng, onet nang obónge o*dachi o-róng orî-onet emen mú o/bángê ké Karâs* o-koo nang ńkyí kyi/já orî-onet emen ámu*. Be byi/mû bii/sét běn chwǒm ńkyín, byi-kuri běn ekó kanong kanong byi/fu, Otu Kyítá o/chi o-kye banet ḿbé mbe ba-chi i azong-byibî ányi busông.

⁷ Osówo o*da bě ekó o/fu, be byikyú ké dyikpen ńdyí kyibî echi ńkyí badarí ne banet ḿbé ba*da/bé ne dyibé* nké o/fu, be byikyú ké dyikpen ńdyí dyi/kwárê ne nyǐ.

⁸ Ké bubwô ámbu kâng, nang yeě nké o/né ńkyí byi/tángê něen, o*fí o-né ng onet* mu o-né ng Osówo mú mu o-kyâ běn Busun emen.

⁹ Kii*nwa ńkyí byidabên nkéré byi/fu, byi-sáng ng běn kyi-kim ne kyijé ńkyí ben badakyú ne barî-banet enen ḿbé ba/bángê ké Karâs*. Ké ebóng, Osówo oo/tángê běn ben bayén eringe nyí ben badakyú ké kyijé ne barî.

¹⁰ Ne ben baa/tông dyizong-édúú ńdyín ne kángkáng barî-banet ḿbé ba/bángê ké Karâs, ḿbé mbe ké kángkáng oshê mú Masedónya. Ké bubwô ámbu kâng, ǎ bwǎn-bané, be byimu byi-tîm m běn arông byi/fu, chi n̂g kyi-jê kyi-shwôm éné.

¹¹ Tî n̂g okabe enen ké dyikpen ńdyí degere ekyú, ba-kûkabe kyi-kim ne byiko ḿbyí enen ben bayén, ba-chi byěm ḿbyí byida běn echwáp ké dyikpen enen wǎ eringe nyí byi/mû byi/sét běn.

¹² Â ba/chi ńkyín, ben ba/chi ba-koo ofê ké bushú ḿbú banet ḿbé ba*da/bángê ké Karâs* ne ben baa*ba/chi ba-rém onet chwǒm nang kyibónge* ńkyí bamu ba-ryuu ng*.

Obê mú Otu Kyítá

¹³ Bwǎn-bané eten, be byimu byi-ryuu ng byi/fu, ben banyît ńkyí nkyi ntûntû kyi-kim ne banet ḿbé baa/kpú, eringe nyí baa*ba/chi ba-kyú bafip báfip* wǎ eringe nyí banet ḿbé ba*fí ne achi etî ké dyikpen ńdyí ne banyá*.

¹⁴ Be byi/bángê byi/fu, Jisos o/kpú, o-jwóbê ké bukyû. Ké bubwô ámbu kâng, be byimu byi-bángê e byi/fu, Osówo o/chi o-bâ o-ba-kpî Jisos ne banet ḿbé ba/kpú ne obánge ké Jisos.

¹⁵ Ké ebóng, ńkyín něen ńkyí Otu Kyítá o/tángê, ńkyí byimu byi-sét ng běn byi/fu, be mú byi/chi byi-kyú okpó ké dyicí ńdyí Otu Kyítá o/chi o-bâ bii*ba/chi byi-bwóp banet ḿbé baa/kpú kashú*.

¹⁶ Ejá e/chi e-nyán kakânkakân, ejá nyí otu mú barím ḿbé banong, ne kyirime-ntán mú Osówo, ne Otu Kyítá oyén o/chi o-fím kyíbóng o-bâ kyísí. Banet ḿbé ba/mû ba/bángê ké Karâs ne ba-kpú nké ba/chi ba-bwóp kashú ba-jwóbê ba-bwa ké dyikpen.

¹⁷ Be kâng mú byi/chi byi-kyú bakpó ké nkéré ámu, Osówo o-kpî ng bě ashí amúmú byi-nung ké ófíbí ne mbé byi-da-kâm Otu Kyítá kyíbóng. Ne be kâng byi/chi byi-waa ne Otu Kyítá kángkáng nkéré.

¹⁸ Ké bubwô ḿbún kâng, chi n̂g nang yeě nang yeě o-firi ké bunyîn-dyityém ne byiraa ḿbyín.