1 Tesalónyan 2 - Bokyi Bible

Bǎmkpóngé ḿbé Pôl o/chi ké Tesalonáka

¹ Ké ebóng, ben bayén bamu ba-nyît ng, ǎ bwǎn-bané eten, ba/fu, obê mú be byi/bê byi-ba-ri běn o*da/waa kyísí dyikáá*.

² Ké ebóng, ben bamu ba-nyît ng eringe ba/kye bě busông ne edángé ké Fyilyípa, ne be byi-kûbê byi-kâm běn ké Tesalonáka. Nang ké byi/ri busông éné, Osówo o/fé bě busa ḿbú byida běn esét Bǎmpém ḿbé Banong ḿbé ba/fím ne nyǐ, nang ké banet ba/mû ba-ku ng bě ba/fu, byi*dasét*.

³ Ké ebóng, arông nyí be byi/tîm běn a/mû a*fí wǎ be byi/mû byi*fí byi-nyît ng* a-bwa a-kyú nang ké bukwóp ḿbú boo*nwa* byi-bwa byi-kabe nang byi/fu, byi-nîm m onet nang obónge*.

⁴ Nké be byimu byi-sét ng wǎ eringe nyí Osówo o/fu, byisét, ké ebóng, nyǐ o/bángê ne be, ne o/kye bě busa ḿbú byidasét Bǎmpém ḿbé Banong. Be byi*fí byi-kan n byi/fu, byi-chi i ńkyí banet mbe ba-ryuu ng* nké byi-chi i ńkyí Osówo mu o-ryuu ng. Osówo mú mu o-nyît ng atyém eten.

⁵ Ké ebóng, ben bamu ba-nyît ng kanong kanong ba/fu, be byi*da/bê byi/fu, byi-bâ ng běn enîm ké ejá* byi-bwa byi-yip nang ejá eten byi/fu, byi-cít ng byěm ḿbyí byimu byi-ryuu ng*. Osówo nké mu ntûesé eten.

⁶ Be byi*da/kan byi/fu, byi-koo ng akpee ké bubwô ḿbú onet nang obónge* nang ne ben* nang ne banet bakíri*

⁷ nang ké be byi/mû byi/chi byi-man běn ebí byěm wǎ banet-kyitwóm ḿbé Karâs*. Nké be byi/kúng byiko eten degere ké kyijé, ké nkéré be byi/mû ne ben. Byi/kyú ne kyijé ánkyi wǎ eringe nyí boné-wǎn odakyú ké nkéré o-kú o-nen n wǎn emen.

⁸ Ké bubwô ḿbú kyijé eten ńkyí byimu ne ben, be byi/kpá byiko ḿbyí byidakyú ne ben byi-sét, *chí nang Bǎmpém ḿbé Banong ḿbé ba/fím ne Osówo nké nke* nké byi/fu, byi-kyâ to nang kyitông eten ké dyishí enen. Ben ba/mû bě ké dyityém kanong kanong.

⁹ Ben bamu ba-nyît ng ké ntûntû, ǎ bwǎn-bané, eringe nyí be byi/chi bǎmkpóngé byi-ri busông. Be byi/chi bǎmkpóngé buchú ne esû, eringe nyí bii*kye běn afaníkong ké nkéré byimu byi-sét ng běn Bǎmpém ḿbé Banong ḿbé ba/fím ne Osówo*.

¹⁰ Ben bamu bantûesé eten, ne Osówo to o/bwom bě ntûesé. Édúú eten nyí byi/tông ne ben mú ba/bángê ké Jisos e/mû kanong, ne e/kwárê, ne e/mû e*fí ne dyibîn*.

¹¹ Ben bamu ba-nyît ng ba/fu, be byi/tî nang yeě nang yeě ké burwám enen wǎ eringe nyí bonchí-bwǎn odatún bwǎn ḿbé emen nyǐ oyén.

¹² Be byi/fé běn busa, byi-fé běn dyityém, ne byi-tírîng běn kángkáng nkéré byi/fu, bakyú dyizong-dyikpen ńdyí dyidanyîn Osówo mú mu o-kó ng běn o/fu, ben banung ké Butu emen, ba-koo to busan emen ḿbú ragerage.

¹³ Ké dyishí ńdyín to dyibónge, be byimu byi-kó ng Osówo asǎma kángkáng nkéré. Ké nkéré mú be byi/bê běn ne kyitwóm ńkyí Osówo, ben ba/jwo kánkyí, ba-koo kánkyí. *Chí wǎ kyitwóm ńkyí kyi/fím ne banet* nké ńkyí kyi/fím ne Osówo, ńkyí ké ntûntû kyi/fím ne Osówo. Ké ebóng, Osówo mu o-chi i běn mú ba/bángê ne nyǐ bǎmkpóngé ké dyityém.

¹⁴ Ben, ǎ bwǎn-bané ejí, azong-byěm abónge nyí a/chi banet-ncibi mú Osówo ḿbé mbe ké Judyâ, banet ḿbé mbe áku ḿbé ba/já Karâs, nké a/chi běn to. Ben ba/ri dyizong-busông bubónge ké abwô nyí banet-oshê enen wǎ eringe nyí mbé ba/ri ké abwô nyí banet-Jûs

¹⁵ ḿbé ba/ju Jisos, Otu Kyítá ne bamkpábé ḿbé badasét byiraa-Osówo, ḿbé ba/kye bě to busông. Banet ámbe ba-sa ng Osówo kafâ kanong kanong. Ba/bên dyityém kanong kanong ne kángkáng banet.

¹⁶ Banet-Jûs ámbe ba/kan to ba/fu, mbé ba-chi i bě byi-mîng banet ḿbé ba*fí banet-Jûs* Bǎmpém ḿbé Banong esét, ḿbé badanyii kámbé. Ńkyín nkyi nkuli kyikû-kiǐtí-kyibî ké burwám-byibî ḿbyí mbe ba-chi i kángkáng nkéré. Kántîk kâng, busa-dyityém ḿbú Osówo boo/pwôo kámbé ké byiko.

Pôl o/tî Okabe o/fu, Nyǐ o-chî ng edari Kámbé

¹⁷ Kyi-kim ne be, ǎ bwǎn-bané, ké nkéré mú byi/pap barî ké kaǎnyín-nkéré, *chí opap mú ké okabe eten* nké mú enyam-byiko nké nke, nkyi kyi-sa ng bě eringe nyí byi/mîng barî, ne kyi/mû kyi-sóng ng bě eringe nyí byi/mû byi-nwa ng byi/fu, byichîri barî.

¹⁸ Be byi/mû byi/ryuu byi/fu, byi-bwa ng esim byi-kâm běn. Me Pôl n/kan kyi-shwôm kampén kabónge n/fu, m-bwa ng esim, nké Sátan o*da bě ebángê*.

¹⁹ Â a/kabe kanong kanong, ben ba*fí kyísí kyísí ba-shwôm banet bakíri* nké bamu achi eten nyí byimu byi-tî ng ne bunyîn-dyityém eten, ne bamu ochíchí-chwǒm mú byi/chi byi-tông byiko kyi-kim ne bunwa eten ḿbú bii/kpógê ké bushú ḿbú Jisos, Otu Kyítá eten ké nkéré mú nyǐ o/chi o-bâ.

²⁰ Ké ntûntû, ben nké bamu byiko eten ḿbyí byimu byi-tông ng ne bunyîn-dyityém eten.