1 Tesalónyan 1 - Bokyi Bible

¹ Me Pôl ne Sálas ne Tyímótyi nké byimu byi-sáng ng léta mún byi-kye banet-ékwâbashi nyí Karâs ḿbé mbe ké Tesalonáka, ḿbé ba/já Osówo Bonchí eten ne Jisos Karâs, Otu Kyítá. Kyi/bát ochwâp mú Osówo ne bunyîn-dyityém byikyú ne ben.

Dyikpen ne Dyityém efé ne Osówo ńdyí Banet-Ékwâbashi nyí Karâs ḿbé mbe ké Tesalonáka

² Be kángkáng nkéré byimu byi-kó ng Osówo asǎma ké bubwô enen ashí kángkáng, byi-zîim m běn to kángkáng nkéré ké banshwam eten.

³ Ké ebóng, be byimu byi-zîim m ké bushú ḿbú Osówo eten mú mu Bonchí eten eringe nyí ben bamu ba-kúng ng dyityém enen ńdyí ba/fé ne Karâs ba-tông ng kyíjí wááng. Ne eringe kyijé enen kyi/chi běn ba-chi bǎmkpóngé ba-fé busa, ne eringe nyí achi enen nyí ba/tî ké Jisos Karâs, Otu Kyítá eten nyi shwaneshwane.

⁴ Be byimu byi-nyît ng, ǎ bwǎn-bané eten, byi/fu, ben bamu ba-jê ng Osówo, ne oo/cá běn o/fu, ben bakyú banet ḿbé emen.

⁵ Ké ebóng, *chí ké ejá nké nke nké byi/ba běn esét Bǎmpém ḿbé Banong* nké byi/ba běn esét to ne busa ḿbú Busun-Osówo ne obánge mú byi/bángê byi/fu, bǎmpém ámbe mbe ntûntû. Ben bamu ba-nyît ng eringe nyí be byi/mû byi-kyú u ké nkéré byi/mû ne ben. Byi/mû byi-kyú u ké kanong ńké enen.

⁶ Ben ba/leme bě ne Otu Kyítá. Nang ké ben ba/ri busông chwóó, ben ba/koo Bǎmpém ḿbé Banong ne bunyîn-dyityém ḿbú mbu bu-fím m ne Busun-Osówo.

⁷ Ké bubwô ámbu kâng, ben ba/tông kyiká-édúú ńkyí kángkáng banet ḿbé ba/bángê ké Jisos ké esí nyí Masedónya ne Girîs ba/chi ba-leme.

⁸ Ké ebóng, Bǎmpém ḿbé Banong kyi-kim ne Otu Kyítá ba*da/fím ne ben ba-ribi Masedónya ne Girîs nké nke* nké bǎmpém kyi-kim ne dyityém enen ńdyí ba/fé ne Osówo baa/ribi kángkáng byikit. Chwǒm kyi*fí kâng ńkyí be byidachîsét*.

⁹ Kángkáng banet ámbe mbe ba-raa ng kyi-kim ne eringe nyí ben ba/koo bě ké nkéré mú byi/ba běn eri, ne eringe nyí ben ba/mîng erím-bakye ba-bírî ba-kâm Osówo, ba/fu, ben ba-fâ Osówo mú mu ntûntû ne mú mu o-kpen n.

¹⁰ Ba/fu to, ben ba-bám m Wǎn emen mú o/chi o-fím kyíbóng ne o-bâ, Wǎn emen mú odabángê Jisos, mú nyǐ o/jwóbê ǎ ké bukyû, ne mú mu o-nyii ng bě ké kafâ esa ńké Osówo ńké ka/chi ka-bâ.