1 Sámwel 7 - Bokyi Bible

¹ Banet-Kyíryat-Jérim ba-da-yip kâng mkpukpu-byěm-Óburúkpâbí ba-da-tî ké kyise-onyinchéng obónge mú odabángê Abyínadap, mú mu o-kyú u kyíbóng-kaku. Ba-jware wǎn emen mú odabángê Elyǎza eringe nyí odakûtún kámú.

Banet-Ézerel ba/firi ké Bubwô ḿbú Sámwel

² Mkpukpu-byěm-Óburúkpâbí o/rí ké Kyíryat-Jérim kanong kanong, aje nang bujam. Nkéré ámu, banet-Ézerel bamúmú ba/tii ba-kó Óburúkpâbí ba/fu, ochwáp kámbé.

³ Sámwel o-raa ne mbé o/fu, â ben bamu ba-bwa ng esim ba-kâm Óburúkpâbí ne dyityém enen kángkáng, ben ba-man ba-zú abwô ké kángkáng bakye ḿbé áku esháng, ba-zú to abwô ké erím-bakye nyí badakó Asatáte. Kúng n̂g byiko enen byimúmú ba-kye Óburúkpâbí, ba-kû ǎ ekye nyǐ to ofê kǎnchí, ne nyǐ o/chi o-chi běn ba-fem ké abwô nyí banet-Fyilíta.

⁴ Ne banet-Ézerel ba-twóp kâng erím-bakye ebe nyí Bâl ne nyí Asatáte, ba-kûkye Óburúkpâbí kǎnchí ofê.

⁵ Sámwel o-twóm kâng o/fu, kángkáng banet-Ézerel baba-cibi ké Myízipa. O-sét kámbé o/fu, me n/chi n-fé nshwam n-kye Óburúkpâbí ányi ké bubwô enen.

⁶ Mbé ashí kángkáng ba-da-cibi kâng ké Myízipa. Ba-tó omu ba-pwó kyísí ké kyifen echi ba-kye Óburúkpâbí, ba-cíp to esong ké kyirim-dyicí ánkyi kyimúmú. Ba-raa ba/fu, be bii/chi kyibî ké bushú ḿbú Óburúkpâbí. Ányi to nké Sámwel o/nap ashwôn nyí banet-Ézerel ba/mû mbe ba-shwôn n ne barî.

⁷ Nkéré mú banet-Fyilíta ba/jwo ba/fu, banet-Ézerel baa/bacibi ké Myízipa, batu ebe ashí atánge ne basúja ebe ba-dim ba-bâ kámbé bunwa ebakye. Banet-Ézerel ba-jwo kyi-kim ne nkyí, bushî bu-róng kámbé.

⁸ Ba-sét Sámwel ba/fu, fâ nshwam a-kyâ Óburúkpâbí mú Osówo eten a-câ kashú eringe nyí oda bě enyii ké abwô nyí banet-Fyilíta.

⁹ Sámwel o-ju wǎn-etám-ebû o-shí kámú kyirim kyirim o-chi kyifen o-kye Óburúkpâbí. O-fé kâng nshwam o-kye Óburúkpâbí o/fu, ochwáp banet-Ézerel, ne Óburúkpâbí o/faa ǎ ojá ké nshwam emen mú o/fé.

¹⁰ Nkéré mú Sámwel mu o-chi i kyifen ánkyi, banet-Fyilíta ba/tín ba-bâ kashú eringe badakye bunwa. Nké ké abe, Óburúkpâbí o/nyán kámbé ne ejá nyí etare. Kyi-firi kámbé byiryibyiryi, ba-chêe ba-róng banet-Ézerel ké abwô.

¹¹ Banet-Ézerel ba-zûu ké Myízipa ba-rim ne mbé ké kyikû ba-nágê ba-ribi ne mbé Bét-Kâ, ba-ju ng kámbé ba-câ.

¹² Sámwel o-yip kâng buká o-bi ké otyém ne otyém mú Myízipa ne Shên. O-raa o/fu, Óburúkpâbí oo/chwáp bě kurún. O-fé buká ámbu dyizîn o/fu, Buká mú Ochwâp.

¹³ Ké bubwô ámbu kâng, mbé ba/kpógê banet-Fyilíta, ne Óburúkpâbí o/ku kámbé eringe nyí mbé baa*man echîkúng byití ba-kpû ne mbyí ké esí-Ézerel* ńdyí Sámwel mu okpó*.

¹⁴ Kángkáng eshê nyí banet-Fyilíta ba/mû baa/koo, ké otyém ne otyém mú Ékoron ne Gât, ba/bwa ne nyǐ ba-kye banet-Ézerel. Ne ké bubwô ámbu, banet-Ézerel ba/koo kángkáng esí ebe. Ne banet-Ézerel ba/chi to kyikwáré ne banet-Kínan.

¹⁵ Sámwel o/níbî Ézerel kángkáng nkéré mú nyǐ mu okpó.

¹⁶ Dyije nang dyirá, nyǐ o-cen n ké Bétel ne Gyígal ne Myízipa, o-nap ng kámbé ashwôn o-câ.

¹⁷ O-bwa kâng esim ké oshê emen, Ryíma, ké kyikit ńkyí nyǐ mu o-chi i to bǎmkpóngé wǎ mpan bampan. O-bi kyikit-kyifen-Osówo echi ké Ryíma.