1 Sámwel 6 - Bokyi Bible

Mkpukpu-Byěm-Osówo o/bwa Dyijê

¹ Nkéré mú mkpukpu-byěm-Óburúkpâbí oo/rí etukáku káchâtkányi ké Fyilíta,

² banet-Fyilíta ba/kó banshâng bakye ebe ne bansô epé ba-bí kámbé ba/fu, be byi-chi i nǎ ne mkpukpu-byěm-Óburúkpâbí mún. Â byi/twóm kámú o-bwa esim ké kyikit ńkyí o/mû, byi-twóm m kámú ne ebóng.

³ Mbé ba-faa kámbé ba/fu, â ben ba/bwa ne mkpukpu-byěm mú Osówo-Ézerel esim, ké ntûntû, ben ba-man ba-twóm kámú cibicibi ne eyáré nyí bada ǎ ekye ké dyishí-byibî enen. Ben baa*man ba-twóm kámú o-bwa esim abwô ábwo*. Ké bukwóp ámbu, ben ba/chi ba-nyange, ne ben ba/chi ba-kyé kyikû to ba-nyît dyishí ńdyí mǔ mu o-kyâ běn busông o-câ kashú.

⁴ Mbé ba-bí banshâng bakye ebe ne bansô epé ebe ba/fu, be byi-twóm m kámú ebóng eyáré. Mbé ba-faa kámbé ba/fu, twóm m̂ kámú ne ekap nyí kyibî-kyirwóm ánkyi etánge nyí ba/chi ké gûl ne ekap nyí efêp to etánge nyí ba/chi ké gûl, ekap nang erá e/bwom ké dyishí-otu-banet-Fyilíta ḿbé ashí atánge. Dyizong-kyibî-kyirwóm ándyi dyibónge nké Osówo o/twóm běn ashí amúmú, o-twóm to batu ámbe ashí atánge.

⁵ Ben ba-man ba-chi ekap nyí kyibî-kyirwóm ńnyín ne nyí efêp to, nyí nyi e-ju ng oshê enen, ne ba-man ba-kye to Osówo-Ézerel ofê. Katô nyǐ o/chi o-mîng běn busông ekye ne bakye enen ne esí enen.

⁶ Ebóng ńkyí ben badajang eshwane dyishí wǎ otu mú Éjip ne banet emen ba/mû. *Da n̂g echi ba-ráp eringe nyí Osówo o/chi acáá ne mbé* tete mbé ba-mîng banet-Ézerel ba-dim*.

⁷ Chi n̂g kâng mútu mú ofyîfî, ba-yip to bampong bafee ḿbé ba*da/fé ne kámbé kyifóngé ké kyitông*. Tú n̂g kámbé ké mútu ámu eringe badatut kámú, ba-ró bwǎn ebe ba-bwa esim.

⁸ Kúng n̂g mkpukpu-byěm-Óburúkpâbí ba-fé ké mútu ámu, ba-kúng to ekap ányi nyí ba/chi ké gûl ba-fé ké mkpukpu ba-tî kámú ányi fáráng ne mkpukpu-byěm-Óburúkpâbí, nyí bamu ba-twóm m ǎ o-dim ne nyǐ wǎ eyáré nyí ba/kye ǎ ké dyishí-byibî enen. Mîng n̂g bampong ámbe ba-dim kiǐfáng ńkyí ebe mbé bayén.

⁹ Bwom m̂ ányi kâng ba-ri mkpukpu-byěm-Osówo eringe nyí odadim. Â o/bírî kashú ḿbú oshê mú badakó Bét-Shémes, ányi kyi/byí, Osówo mú banet-Ézerel nké o/twóm bě kyibî-orwôm ńkyín ńkyí nkyi kyi-ju ng bě. Nké â o*da/chi éné* kyi-fím ányi byi/chi byi-nyît byi/fu, *chí Osówo ámu nké o/twóm kyibî-orwôm ńkyín* kyi*da/shwôm kyi/chi ochǐng éné*.

¹⁰ Banet-Fyilíta ba-chi ńkyí ba/sét kámbé. Ba-yip bampong bafee ba-tú kámbé ké mútu eringe badatut kámú, ba-fín bwǎn ebe ké kyise.

¹¹ Ba-fé mkpukpu-byěm-Óburúkpâbí ké mútu ámu, cibicibi ne mkpukpu mú ba/fé ekap ányi nyí ba/chi ké gûl.

¹² Bampong ámbe ba-kpet ecen ba-câ bukwóp-Bét-Shémes, ba-câ ocǎng kashú ḿbú bukwóp ámbu, ojâng ba*fí ba-jáng ng*. Ba-wonge e ba-câ. Batu ḿbé Fyilíta ba-dim ne mbé ké kyikû tete ba-ribi buti ḿbú Bét-Shémes.

¹³ Banet-Bét-Shémes ba/mû mbe ba-bóng ng esang-byichí ké ndege-esí, ké nkéré ba/bírî achi kyíbóng ba-ri mkpukpu-byěm-Óburúkpâbí. Ba-jêe dyijêe ńdyí dii*nwa eri* ké ori mú ba/ri kámú éné.

¹⁴ Mútu ámu o-ba-bwom ké kyifát-onyinchéng obónge mú odabángê Jóshwa, mú o/mû mu o-kyú u ké Bét-Shémes, o-bwom ányi fáráng ne kiimbâng-buká. Banet-Bét-Shémes ba-cere mútu ámu boǒcê boǒcê, ba-ju bampong ámbe ba-shí kámbé ba-chi kyifen ba-kye Óburúkpâbí.

¹⁵ Bǎmgbán-banchi kyifen-Osówo ba-yip mkpukpu-byěm-Óburúkpâbí ne ekap nyí ba/chi éné ké gûl, nyí nyi ké kafâ ba-twôom kányí kyíbóng-kiimbâng-buká ánkyi. Banet ámbe ba-chi kâng byifen ḿbyí enyam eshí ne byifen byikíri ba-kye Óburúkpâbí.

¹⁶ Batu ḿbé Fyilíta mbe ányi ba-ri ng eringe nyí mbe ba-chi i, ne ba-bwa kâng esim ḿbú Ékoron ké ochíchí-dyicí ándyi.

¹⁷ Banet-Fyilíta ba/twóm ekap ányi etánge nyí ba/chi ké gûl, nyí e/bwom wǎ kyibî-orwôm ba-kye Óburúkpâbí wǎ eyáré, ba-ré dyifwá ké dyishí-byibî ebe. Ekap ányi e/bwom ké ashí-eshê nyí Áshídot ne Gáza ne Áshíkelon ne Gât ne Ékoron.

¹⁸ Ba/twóm to efêp etánge nyí ba/chi ké gûl, nang erá e/bwom to ké dyishí-oshê nang orá mú batu-Fyilíta ḿbé ashí atánge mbe ba-tún n, eshê nyí ba/bi ekpe ba-wáp kányí ba-fé ké kafâ, cibicibi to ne boǒshê ḿbú ba*da/bi ekpe ba-wáp kámbú ba-fé ké kafâ*. Kiimbâng-buká ánkyi, ńkyí nkyi ké kyifát ńkyí Jóshwa mú o/fím Bét-Shémes, ńkyí ba/twôom mkpukpu-byěm-Óburúkpâbí ké nkyí, kyi/tôong áku wǎ ntûesé mú chwǒm ńkyí kyi/mû kyi/chi.

¹⁹ Óburúkpâbí o/ju bajam-banet-Bét-Shémes bachât esim diǐkpú, ké nǎ, mbé ba/jebe achi ké kafâ-mkpukpu-byěm emen. Banet-oshê ámu ba-ta dyikán, ké nǎ, Óburúkpâbí nké o/cen kámbé ne dyizong-bukyû ámbu ḿbú boo*nwa eri*.

Mkpukpu-Byěm-Óburúkpâbí ké Kyíryat-Jérim

²⁰ Banet-Bét-Shémes ba-bí kâng ba/fu, yeě odaman ebwom ké bushú ḿbú Óburúkpâbí, nyǐ mú mu Osówo mú onong. Byi-twóm m ǎ o-dim kyicê kyirá eringe nyí oo*fárâng bě to*.

²¹ Ba-twóm kâng banet-kyitwóm ba-ca Kyíryat-Jérim ba/fu, bada-sét kámbé ba/fu, banet-Fyilíta baa/twóm mkpukpu-byěm-Óburúkpâbí o-bwa esim dyijê. Bâ n̂g ba-ba-yip kámú.